በኢትዮጵያችን ማንኛውም አገር ወዳድ ዜጋ ፣ በልቡ ውሥጥ ያለውን ንፁህ እውነት ፣ ሳይፈራና ሳይሸማቀቅ ጮክ ብሎ በአደባባይ “ እኔ ሰውን በሰውነቱ እንጂ በሌላ አላውቀውም ። በአማራነቱ ፣ በትግሬነቱ ፣ በኦሮሞነቱ ፣ በጉራጌነቱ ፣ በሲዳማነቱ ፣ በሱማሌነቱ ፣ በጋምቤላነቱ ፣ በጉምዝነቱ ፣ በሐረሬነቱ ፣ በአፋርነቱ ። ወዘተ ። ሳይሆን ፣ እንደ እኔ ሰው በመሆኑ ብቻ ነው የማውቀው ። ሰውን ሰው ብሎ ከመጥራት በመግባብያ ቋንቋው ስያሜ መጥራት ሰውን እንደ ግዑዝ ነገር መከፋፈል ነውና ግብዝነትን ያራባል ። አንዱን የሰው ሰብስብ በቋንቋው አንግሶ አንዱን ባርያ እንዲሆን ያሥገድዳል ። በዚህም ሰበብ የማያባራ ግጭት ውስጥ ሰዎች ሰውነታቸውን ክደው እንዲዘፈቁ ያደርጋል ። ትብብርና መደጋገፍ በሚሻው በ21ኛው ክ/ዘ ዘመን መራራቅን እና ጥላቻን ያነብራል ። እናም ይኽ የቋንቋ ሥርዓተ መንግሥት እሥከቀጠለ ጊዜ ደረስ የውጪ ጠላቶቻችን የመጫወቻ ካርድ ሆኖ በማገልገል በሚረጩት ገንዘብ ሰበብ መገዳደላችን የማያባራ ይሆናል ።“ ብሎ ቢናገር ፤ ይኽ እውነቱ ለሥንቱ ሰው ይገባዋል ?
ከቶስ ተፈጥሮ በሂደት እኛን በክብር ከማሰናበቱ ቀድመን ትርጉም በሌለው ጥላቻ ፣ የተሻለ ለመብላት ብለን ፤ ለተሻለ የግል ኑሮ ብለን ነገ መሞታችን ላይቀር ለምን ዛሬ በስግብግብ አእምሮና በውሸት ቅስቀሳ ተገፋፍተን ጥቂቶች ብዙሃን ንፁሐንን እንደእኛው ሰው መሆናቸውን እያወቅን በቋንቋ ልዩነት ብቻ ፣ ለምን እንገድላቸዋለን ?
እኛ እንደ ህዝብ ተራ ሟች በመሆናችን ፤ ከዕውቀት በመራቃችን እና ኃይማኖተኞች ነን እንላለን እንጂ በተግባር ፀረ _ እግዚአብሔር ወይም ፀረ_ ፈጣሪ በመሆናችን ወደጥፋት ሥናመራ ፣ የሚመሩን የአገር አሥተዳዳሪዎች የባሰ በመገዳደላችን እንድንቀጥል ለምን አሥፈላጊውን ሤጣናዊ ድጋፍ ሲያደርጉ ይስተዋላሉ ? የሞትን ፅዋ መሪዎች ሣይቀሩ እንደሚጨልጦት ፍፁም ዘንግተው አይደለምን ? በመንግሥት ውሥጥስ ተራ ሟች ሰዎች አልተሰባሰቡምን ? ከጥቂት ሚኒሥትሮች ውጪስ ሌላው የመንግሥት አካል በታሪክ የሚወሳበት ሰፊ ሥፍራ ይኖረዋልን ? ከቶስ ከመሪው በሥተቀር ማነው በተደጋጋሚ ፣ ሥሙ በደግና በክፉ ሥራው የሚነሳው ? የሚወሰው ?
ራቁት መወለድ ፤ ማደግ ፣ መጎልበት ፣ መጎልመስ ማርጀት ፣ መጃጀት መሞት የተፈጥሮ ሂደት ነው ። ከነዚህ ደረጃዎች ውሥጥ በአንዱ እያሉም ፣ በህመም መሰቃየት እና መሞት የሁላችንም ዕጣ ፈንታ እንደሆነ መገንዘብም ታላቅ እውቀት ነው ። የቀድሞው የኢትዮጵያ ጠ/ሚ መለስ ዜናዊ ከመሞታቸው በፊት ጥይት ባይገድለን ባዮሎጂ ይገለናል ። ያሉት ይኽንን እውነት ይገልፀዋል ። (ጠ/ሚ አብይ አህመድ ታመው ቢሞቱ አዲስና እንግዳ ነገር ከቶም አይሆንም ። ሰው “ ተወለደ ! “ ሲባል “ ሞተ ! ማለት ነው ። “ የሚባለውም ሞት ሁሌም ከህየሸወት ጌር አብሮ በሠኖሩ ነው ። ምናልባት የሚቆጨው አንድ መሪ እንደሚሞት አሥቀድሞ በመገንዘብ መሪ ያለማዘጋጀት ነው ። ለአፍሪካ ፖለቲካ ግን ይኽ አሥፈሪ ና አሣፋሪ መንገድ ከቶም አይደለም ። )
የሰለጠኑት አገራት መሪዎች ይኽንን እውነት ከመቶ አመት በፊት ተገንዝበውታል ። እናም እንደ ሰው ሞት የማይቀርላቸው በመሆኑ ፣ የመንግሥት ቅብብሎሻቸውን ወገኛ አድርገውታል ። በአፍሪካ ግን ወገኝነት በጣት በሚቆጠሩ የአፍሪካ አገራት ብቻ ነው ያለው ።
በአውሮፓና አሜሪካ መንግሥታቱን ፣ ተቀናቃኞቻቸው እና ምሁራን በአደባባይ ቢተቿቸው እና ቢያብጠለጥሏቸው “ ለምን ሥሜ በመጥፎ ተነሳ ? “በማለት ዘረፍ አይሉም ። በመንግሥት ባለሥልጣናት ደርጊት ከበሸቀው ህዝብ ጋር በመወገን ወቅታዊውን ፖለቲካዊ ጉዳይና ፣ የህዝቡን ወቅታዊ የፍላጎት ትርታውን አድምጠው እያዋዙ ባለሥልጣናቶቻቸውን ተው ፣ እረፉ ይኽ ለዚህ ህዝብና አገር አይመጥንም ። ለእናንተም ቅሌት ነው ፤ በማለት የሚመክሩትን ኮመዲያንን ለምን ቀለድክብኝ በማለት አፍንጫቸውን በቦክስ አይሰብሩም ። በግራና ቀኙም ምንም ያህል መራራ እና የሚያንገፈግፍ ተረብ እና የትችት ናዳ ፤ ሸንቋጭ ሂሥ ና መዓት የቃላት ውርጂብኝ ቢያጋጥማቸው ፤ ባለሥልጣናቱ ከሥህተት መንገዳቸው ከመማር ባሻገር ፤ ሂሱን እንደ ስድብ በመቁጠር ፣ መንግሥት ሆኜ ሣለ ፣ ሊሰግድልኝ ሲገባ ትችትና ወቀሳ በእኔ ላይ በማዝነብ ፣ እውነትን ለህዝብ አሳውቋልና እንደ ዮኃንስ መጥመቁ አንገቱ ተቋርጦ በሳሕን ይቅረብልኝ አይሉም ። “ አፍኑት ! “ ብለው ሥውር ትእዛዝም አይሰጡም ።
እዚህ አገር አስብቶ ማረድ ፤ ልኩን አሳየው በማለት የራስ ቆዳን በማዋደድ ( ራቁታቸውን እንደተወለዱ ና ራቁታቸውን እንደሚቀበሩ በመካድ ) ዜጎች ተፈጥሮ በሰጣቸው አንደበት ለምን ተናገሩበት ብለው “ ለእግረ ሙቅ “ የሚዳርጉ ህግ አሥፈፃሚዎች ፣ እንዴት እና በማን እንደተቋቋሙ ግልፅ ባይሆንም ፣ ጤነኛና አሥተዋይ አእምሮ ላለው ማንኛውም ዜጋ ጉዳዩ እጅግ አሣሣቢና አናርኪሲዝምን የሚያሰፍን ነው ። በዙ ጥያቂም ህዝብ እንዳያነሳ ያሥገድዳል ።
“ በዚች ቅድስት አገር በመንግሥት አርቆ አሳቢነት የሚተማመኑ ፣ ንፁሐን በማሰባቸው ብቻ ዘብጥያ ለምን ይወርዳሉ ? እንዴት እውነትን ያለፍርሃት በመናገራቸው ፣ እውነቱ ለሌሎች ጠረዘኛ ፖለቲከኞች የሚጎመዝዝ በመሆኑ ብቻ የተፈጥሮ አንደበታቸው ይለጎማል ? ደግሞስ የቋንቋና የጎሣ ፖለቲካው ያመጣው መሞሻለቅ አይደለም ወይ ? … ። ሥንትና ሥንት ተሣዳቢዎች ደረታቸውን ገልብጠው በኩራት በሚራመዱባት አገር ውሥጥ እነዚህ በጣት የሚቆጠሩ መንግሥትን ለበጎ ሥራ የሚያነሳሳ ፣ ህፀፆቹን ነቅሶ በማውጣት እንዲታረም አሥቀድመው ምክረ ሃሳብ የሚለግሱ ፣ ለበጎ ሥራ ኮርኳሪ አንደበትና ብዕር ያላቸው ዜጎች ለምን ይታሰራሉ ???….. “ በማለት ዘወትር መንግሥትን የሚሞግት ጥያቄ ህዝብ ሲጠይቅ የሚሰማውም ከዚህ እውነት አፃር ነው ። በየደጁና በየቤቱ ። በየትም ሥፍራ ውሸት ሰልችቶናል ። እያለ ነው ህዝብ ።
እንደምታውቁት ከደርግ የሶሻሊዝም “ የአብዮተኛ “ እና “ የፀረ አብዮተኛ “ ፍረጃ ጀምሮ አውዳሚው ውሸት ወይም ቅጥፈት እየተለመደ መጥቷል ። ያኔ በደርግ የሶሻሊዝም ሥርዓት ፣ ንፁሐን ያለ ፍትህ ፣ ፍርድ ቤት ሣይቀርቡ ፣ በግለሰቦች የግል ውሳኔ ፣ በነፃ እርምጃ ይገደሉ ነበር ። ያም እኩይ ድርጊት “በየፍየል ወጠጤ … “ ዜማ ታጅቦ በሬዲዮ ይነገር ነበር ። ይኽ ትክክል ያልሆነው ፣ ውሸት የሆነው ማብራሪያ በሥሜት ተጆብኖ ፤ በበቀለ ወፍሮ ፤ ለህዝብ ሲቀርብ ብዙሃኑ “ አሹ “ ይል ነበር ። ከወታደራዊ መንግሥት ሥርዓት በኋላ ደሞ ፤ መልኩን ቀይሮ ብቅ ያለው ፤ በሎጂክ እንጂ በመንግሥት ሥርዓትነት በዓለም ቅቡልነት የሌለው የተጨቋኝ እና የጨቋኝ ቋንቋ ትርክትና የተረኝነት መንገድ ነው ። ኢህአዴግ ወያኔ የዚህ ሥርዓት ዋና ተዋናይና የመድረኩ ባለቤት ሆኖ የመጣበት ። ( … ። ) የሰው መግባቢያ የሆነን ቋንቋ ሲወለድ ጀምሮ በደም ውሥጥ ያለ የአንድ ጎሣ ብቻ መግባቢያ አድርጎት አረፈው እና ሰውን በቋንቋ ከፋፍሎ ክልል ብሎ አጥር ሰርቶለት አረፈው ።
በመሠረቱ ቋንቋ የሰዎች በሙሉ ቋንቋ ነው ። የአንድ ዘውግን እና ጎሣ ቋንቋ ሊሆን አይችልም ። ከተማርከው ፣ በቋንቋው ተናገሪ ቤተሰብ ውስጥ ካደክ ፤ ወይም በልዩ ለዩ አጋጣሚ ከቋንቋው ተናጋሪ ቤተሰብ ጋር ከኖርክ ፤ ቋንቋውን በቀላሉ ታውቃለህ ። አንድ ቋንቋ የእኔ ብቻ ነው ማለት በመሠረቱ ሥህተት ነው ። ሥለቋንቋ መወለድ ፣ ማደግ እና ዓለማቀፋዊ መሆን ብቻ ሣይሆን ቋንቋ እንደሚወለድ ሁሉ እንደሚሞት ያለማወቅም ነው ። ቋንቋውን በመማር ብቻ የየትኛውም አገር ዜጋ የኢትዮጵያን ቋንቋዎች የራሱ ማድረግ ይችላል ። ይሁን እንጂ የቀድሞው የወያኔ ሥርዓት የእነሱ እና የእኛ ቋንቋ በማለት ዜጎችን በቋንቋ መጥራት በመጀመሩ እና ግለሰቦች በቋንቋ ብቻ ለህብረተሰባቸው የሚፈይዱት አንዳችም ሳይኖር ፤ እውቀቱ ፣ ችሎታው ፣ ክህሎቱ ሳይኖራቸው ፣ በቋንቋ ብቻ ተደራጅተው ፣ ተቧድነው ፣ ኔት ወርክ ፈጥረው ፤ በቀላሉ ሀብት ለማፍራት የሚያሥችል ሥልጣን አሥገኘላቸው ። በደርግ የሶሻሊዝም ሥርዓተ መንግሥት “ ሁሉም ጎሣዎች እኩልናቸው ሌብነትም ጥዩፍ ነው “ ተብሎ ተጨቋኝ መደብ አሸናፊ የሆነበትና ኃይልና ሥልጣን የሰፊው ህዝብ ነው ። “ ተብሎ በገሃድ የተዜመበት ሥርዓት በቋንቋ የበላይነትና ገዢነት ሥም የጥቂቶች ፈላጭ ቆራጭነት የሚፀባረቅበት መንግሥታዊ ሥርዓትን ይዞ ብቅ አለ ። የወቅቱ ፕሬዚዳንት መለሥ ዜናዊ በቋንቋ ሥም የትግሪኛ ተናጋሪዎችን ፈላጭ ቆራጭነት አበሰሩ ። ሌብነት በወጉ ለህወሓት ፓርቲ ጥቅምና ጥቅም ብቻ እንዲውል ተደረገ ። በመለሥ ዜናዊ ዙሪያ ያሉ ጥቂት የህወሓት ዓባላትም ቢሊዮነር ሆኑ ። በሚሊዮን የሚቆጠር ዶላር ና ሀብት በአሜሪካና በአውሮፓ አከማቹ ።
ይኽ ሌብነት መለሥ ከሞቱ በኋላ በሁሉም የኢህአዴግ ዓባል ድርጅቶች ውሥጥ ተስፋፋ ። እና ህብረተሰቡ የሚጠየፈው ሌብነት እጅግ እያበጠ መጣ ። …
ቀስ ፣ በቀስ መልካሙ ባህላችንን ፣እሴቶቻችንን እና ኃይማኖተኝነታችን በእጅጉ ሸረሸረው ። ጥቂት የማይባለው አጋጣሚው የተመቻቸለት ቋንቋኛ ያለምንም ድካም በአቋራጭ ገንዘብ እያገኘ ቱጃር ለመባልም በቃ ። እንሆ ለዛሬው ፈጣሪን ያለመፍራት ደረጃ ጥቂት የማንባለውን ቋንቀኝነት አደረሰው ። ሰውን በቋንቋው መከፋፈል ። ሰውን ከፋፍሎ በየቋንቋው መፈረጅም በእጅጉ ተሥፋፋ ። ከአንድ ቋንቋ ቤተሰብ የተወለደ ግለሰብን እንኳ በነውረኛ ድርጊቱ መኮነን መላውን የቋንቋውን ቤተሰብ መድፈር እንደሆነ ተቆጥሮ በየመንደሩ የሁከት ፣ የብጥብጥና የመገዳደል ሰበብ ሆኖ ነበር ።
የእገሌን ልጅ ተናገርክ ፤ ሰደብክ ፤ ነገሩን ፣ ድርጊቱን ኮነንክ ፤ …አንተ እንትን ሥለሆንክ ። የሚሉ የነገር ሰይፎች እጅግ በርክተው የስንቱን ንፁሐን አንገት እንደቀነጠሱ ሾርት ሚሞሪ ከሌለን በሥተበር አንረሳም ። የባሰ አውሬነት ደግሞ በቅርቡ በምዕራብ ና በምሥራቅ ወለጋ ሲከሰት ሰብዓዊነት ጠፍቶ ለዜጎች ሞት የሚቆጭና የሚንገበገብ ባለሥልጣን ጠፋ ።
እኛ ኢትዮጵያዊያን ፣ ዛሬ እና አሁን ያልባነንን መቼ እንደምንባንን ከቶም አይገባኝም ። መንግሥት ህዝብን በሚበጀው ወይም ሁሉንም ተጠቃሚ በሚያደርገው ፣ ዜግነቱን በሚያሶድደው መንገድ ህዝብን መመራት አለበት እንጂ በጠላቶቻችን በሚዘወሩ ኢ _ ሰው እና ፀረ _ፍቅር በሆኑ ባለነፍጥ ፖለቲከኞች ማስፈራርቾ እሥከመቼ ፓለቲካውን እያስታመመ አገርን በተረጋጋ ሁኔታ ማሥተዳደሩን በወከባ ይቀጥላል ?
የበለፀጉት አገራት ታሪክ የሚነግረን ጠንካራ መንግሥት ለመገንባት በወታደራዊ ህግ ብቻ የሚመራ መከላከያ ሠራዊት እና የአገርን ጠላቶች አሥቀድሞ በማነፍነፍ ፤ከጥፋት የሚታደግ የሲቪሊና ወታደራዊ ደህንነት አሥቀድሞ መገንባት ያሥፈልጋል ። ( ዛሬም የተጠናከረ የደህንነትና የመከላከያ ተቋም እንዲኖራቸው ለነዚህ ተቋማት የሚያወጡት ወጪ የሠራዊት እንክብካቢያቸው ከፍተኘ ነው ። ) እኛም በአቅማችን ከፍተኛውን በጀት ለመከላከያ ና ለደህንነት ኃይል በመሥጠት መንግሥትን አጠናክረን ፣ በዜጎች ቅቡልነት ያለው ተከታታይ የሆነ ጠንካራ መንግሥታዊ ተቋማ ሊኖረን ይገባል ። ብዬ አምናለሁ ። በዚህ ረገድ የመንግሥት ጥረት የሚያስመሰግነው ቢሆንም ፣ ከፓለቲካው አንፃር ግን ፈቀቅ ያለ ተጨባጭ ለውጥ በበኩሌ አላየሁም ። መንግስት ዛሬ በከፍተኛ “ የማንን ልመን ? “ ጥርጣሬ ውሥጥ የወደቀም ይመሥላል ።
ዛሬ እና አሁን መንግሥት እንደግለሰብ ማንን ማመን ማንንስ ያለማመን ጥርጣሬ ውሥጥ ሊወድቅ የቻለው ፣ካለፈው የደርግ አዙሪት ያልወጣ የፓርቲ አባላትን ይዞ ሥለሚጓዝ ነው ። እርግጥ ነው በሥም ፓርቲው ተለውጧል ። በግብር ግን የተለወጠ አንዳች ነገር የለም ። መንግሥት በአንክሮ ከተመለከተ ዘሬም የሚጓዝበት አደረጃጀት ደርግ ከመሠረተው ቀበሌ ና ገበሬ ማህበር የሚነሳ ነው ። ዛሬም የማዘጋጃ ተቋማዊ ሥርዓት ሳይሆን የካድሬ ቀበሌያዊ አሥተዳደር ነው ። ዛሬም ፓርቲና መንግሥት አልተለየም ። በመሆኑም በፓርቲ ሥም ከቀበሌ ጀምሮ በሰው ነፍሥ የሚወሥኑ እግዜሮች ቢኖሩ አይገርምም ። ከደርግ ጀምሮ ነበሩና !!!!!!!!
በበኩሌ መንግሥት ወይም ገዢው ፓርቲ ለ21 ኛው ክ/ዘ የሚመጥን የመንግሥት ሥርዓት ለማዋለድ አንድ ብርቱ ዘዴ ካልቀየሰ በታሪክ ተወቃሽ ሊሆን የሚችልበት መሥቀለኛ መንገድ ላይ እንዳለ ይታየኛል ።
በተለይም በትግራይ ያለው ፣ ሰው መሆንን የካደ የሊሂቅ ሥብሥብ አጥፍቶ መጥፋት አላማው ነውና አሁንም የኢትዮጵያ ህዝብ ሁሉ ንብረት በሆነው መሬት ፤ በእኔነው ባይነት በብርቱ ይከራከራል ። ይኽንን ህዝብን ከህዝብ የማጋጨት እኩይ መንገድ ለአንዴና ለመጨረሻ ጊዜ እንዲያከትም ፣ በኢትዮጵያ ህዝብ ቅቡል የሆነ ልዩ ዘዴ እና ዘላቂ መፍትሄ የሚያመጣ አዲስ የዜጎች እኩልነት መንገድን መንግሥት ሣይዘገይ መቀየሥ ይኖርበታል ብዬ አምናለሁ ። ያ ዘዴም የትግራይ ህዝብ ሰውነትን በካደው ፣ የትግራይ ሊሂቅ ላይ የሚነሳበት እና እሥከወዲያኛው የሚጠራርገው መሆን ይኖርበታል ። ልብ በሉ የትግራይ ህዝብ እንደ ኢትዮጵያዊነቱ የኢትዮጵያ ግዛት ሁሉ አገሩ መሆኑንን በተጨባጭ ከተረጋገጠለት እጅግ የሚያስደንቅ ኢትዮጵያዊነቱን የወያኔንን ግብአተ መሬት በመፈፀም ያረጋግጣል ።
