ከተሰወሩ 3 ወራት ተቆጥሯል!! (እየሩሳሌም ዓለሙ -አሻም)

1 Comment

1. ሶስት ሺህም ሆነ መቶ ዓመት የነጻነት ዘመን አላት የምትባለው ኢትዮጵያ ለህዝቦቿ የማትበጅ የግፈኞች መናህሪያ ሃገር ናት። የክርስቲያን ሃገር ገለ መሌ የሚባለው ሁሉ የማታለያ ሃሳብ እንጂ ከህዝቡ ተግባርና ለዘመናት ከምናየው ግፍና መከራ ጋር ሲገናዘብ ለጨረቃና ለቆመ ዛፍ የሚሰግድ ህዝቦች የተሻለ ስብዕና አላቸው። ንጉሱን በሃይል የፈነቀለው የወታደር መንጋ በምድሪቱ ላይ የሰራው የ 17 ዓመት የደም ጎርፍን የተካው ጠባብ ብሄርተኛው ወያኔ ለ 27 ዓመት ሃገሪቷን ለሺያጭ፤ ህዝቦቿን ለባርነት፤ ስደትና መከራ ዳርጎ አሁን እንሆ ከዚያው ከወያኔ ጆኒያ ያፈተለከው የኦሮሞ ስብስብ ይህ ነው የማይባል መከራን በአማራው ህዝብ ላይ በማዝነብ ላይ ይገኛል። ሰው መግደል፤ ማፈን፤ መዝረፍ፤ ሰውን በፍርድ ማጉላላት፤ ከሥራ ማባረርና ሌሎችም ህቡዕና ይፋ ግፎች ዛሬም በኢትዮጵያ ህዝብ ላይ ይፈጸማል። ህዝብን እንዲያገለግሉ የቆሙ ተቋሞች እንደ ፓሊስ ያሉት ሰውን በእንበለ ፍርድ የሚያንገላቱ፤ ማንም ተራ ወታደር አንድን ኢትዮጵያዊ/ት በድላ፤ በጥፊ የሚደበድብበት ከከፋም የሚገድልበት የአስረሽ ምቺው የብልጽግና ፓለቲካ ኦሮሞውን አስጨፍሮ ሌላውን የሚያስለቅስ ለመሆኑ የየቀኑ የግፍ ወሬዎች ያመላክታሉ። ለምሳሌ በቅርቡ ወደ ሃገሯ የተመለሰች እህታችን ከቦሌ ስትወጣ እቃ እረስታ ተመልሳ ለመግባት ስትጠይቅ ወጠጤው ፓሊስ በጥፊ ሲመታት ህዝብ ማየቱ እነዚህ ጊዜ የሰጣቸው ጥርቅሞች ማንንም እንደማይፈሩ ያሳያል። ግፍን ግፍ እየወለደው ዛሬ ላይ ሰው ሆድ ተቀዶ ጽንስ የሚወረወርበት ጊዜ ላይ ደርሰናል። በየትኛውም የእምነትም ሆነ የእምነት የለሽ የሰው ልጅ የስብዕና መስፈሪያ እንዲህ ያለ በደል የፈጸመ ሰው ቆሞ መሄድ አልነበረበትም። ግን ፍትህ የት አለና! ያለምንም በደሉ ተዘቅዝቆ የተሰቀለው የሰው ደም ዛሬም ይጣራል? ለግፈኞችም የማብቂያ ጊዜ ግን አለ፤ ይመጣል!
   እልፎችን እንበለ ፍርድ ሰውሮና በር ቆልፎ ስለ ሰላም ማውራት ማፌዝ ነው። ሰው በወንጀሉ መጠየቅ የግድ ነው። የእኛ ሃገር ክስ ግን 99% የፈጠራ ክስ ነው። ሰው በማሰር፤ በመግደል፤ በማሳደድ ስልጣን ላይ መቆየት ቢቻል ኑሮ ወያኔ ደርግን ባልተካው ወያኔን ብልጽግና ባልሸወደው። ፓለቲካ የመገለባበጥ ስፓርት ነው። ለሃገር ለህዝብ ለወገን የሚባለው ሁሉ የፓለቲካው የውስልትና ፕሮፓጋንዳ ነው። ለእውን ለህዝብና ለሃገር የቆሙ ወገኖች ከንጉሱ ጀምሮ እስከ ዛሬ ድረስ እንደተሳደድና እንደተገፈተሩ ብሎም እንደተገደሉ ነው።
   በወያኔና በብልጽግናው መንግስት የአማራ መከራ ጣራ ላይ መድረሱ ምንጩ ፍርሃትና በራስ አለመተማመን ነው። ከአማራ ህዝብ ለእኛ የሱዳን ህዝብ ይቀርበናል አይደል ያለው ወስላታውና ደም አፍሳሹ ደብረ ጽዪን! ግን እድሜ ልኩን በህዝብ ጥላቻ ልቡ ለተነደፈ ሰው ምንም መድሃኒት የለም። ሞት ብቻ ነው ገላጋዪ። እኔ ትግራዋይ፤ እኔ አማራ፤ እዚያ ጋ ጉራጌ እዚህ ጋ ኦሮሞ መባባሉ ሁሉ የድንጋይ ዘመን አስተሳሰብ እንጂ የ 21ኛውን ክፍለ ዘመን አስተሳሰብ አይመጥንም። የሰው ልጅ መለኪያው ሰው መሆኑ ብቻ ነው። ምድርም ለሁሉ የተሰጠች ናት። የጠባብ ብሄርተኞች በሽታ ተላላፊ ደዌ ነው። አፍን ቢያፍኑ፤ አይን ቢጨፍኑ፤ አፍንጫን ቢይዙ ህመሙ የልብ ነውና ማምለጥ አይቻልም። ወንድምና እህቱን ገድሎና አስገድሎ ከሚፎክሩና ከሚያፋክሩ ጅሎች ጋር መከራከር በጨለማ ውስጥ ሆኖ አያለሁ እንደማለት ነው። ህሊናቸው የሞተ፤ በህዝባቸው ደም የሚነግድና የሚያተርፉ፤ የሰው ልጅ ሰቆቃ የማይሰማቸው የቁም በድኖች ናቸውና። የእውን ታሪክን ወደ ኋላ እያሽቀነጠሩ በከፈሏቸው ሰዎች አዲስ ታሪክ እያጻፉና እየጻፉ ሰውን ማማታት ከረጅሙ የፕሮፓጋንዳ እቅዳቸው አንድ ነው። ነገ በእኔ ይደርሳል የማይሉ ድርቡሾች ምድሪቱን ወረዋታል። ባልተፈጸመ ታሪክ ሰውን እየጠሉና እያስጠሉ ስንቅ ሸምተውበታል። ግን ይህም ያልፋል። እንኳን ይህ ቢወቅጡት እንቦጭ የሆነው የሃበሻ ፓለቲካ ይቅርና 70 ዓመት ሙሉ የተለፋበት የራሺያው ፓለቲካም እንደ እንቧይ ካብ ፍርክርኩ ወጥቶ ይኸው እንሆ ዛሬ ላይ አብረው የኖሩ ህዝቦች ዪክሬንና ራሺያ በመፋተግ ላይ ይገኛሉ። የፓለቲካ ንፋስ አቅጣጫ የለሽ ነው። የዛሬ ሽርኮች የነገ ተገዳዳሪዎችና ተፋላሚዎች ይሆናሉና!
   የዲያስፓራም ሆነ የሃገር ቤት የፓለቲካ ፓርቲዎች ሆነ ወይም በሌላ ስም ራሳቸውን እየጠሩ በየጊዜው እንደ አሸን ብቅ ብለው የሚሰወሩት ሁሉ መስማማት ያቃታቸው፤ አንድ አንድን ማድመጥ የተሳነው አፍ እንጂ ጆሮ የሌላቸው የጊዜ ማማቻዎች እንጂ ፍሬ ነገር የላቸውም። አንድ 4 ኪሎ እንገባለን ሲለን፤ ሌላው የሽግግር መንግስት ይቋቋም ይለናል። ቅማልን የት ትሄጃለሽ ቢሏት መተማ፤ ትደርሻለሽ ልብማ… አይ ጊዜ እንኳን ደስ አላችሁ ከ100 ሺህ በላይ የአማራ ተማሪዎች ለ 8ኛ ክፍል መልቀቂያ ፈተና መቀመጥ አይችሉም። ብዙዎችም የ 6ኛ ፈተናን አይፈተኑም። ህዝብን ነጻ ማውጣት እያደነቆሩ ከሆነ ተሳክቶላችሁሃል። ግን ዛሬ ላይ እንደ ብርቅ የምታዪትና የምትሞቱለት ጉዳይ ነገ ሰከን ብላችሁ ስታዪት ፍርሽ ቢሆን ራስ ይዞ እየየ ማለት ጊዜን ወደ ኋላ መልሶ ለማስተካከል እድል አይሰጥም። ብልጽግና ስማ – በፓለቲካና በግፍ የታሰሩትን ሁሉ ፍታ! እናንተ የብሄር ታጣቂዎች መገዳደል ይብቃ፤ በጠራ ሁኔታ ጥያቄአችሁን አቅርባችሁ ነገር በሰላም ቋጩ። ጦርነት ለማንም አይበጅም። የሻገተ የፓለቲካ ውሸት የእንጀራ ኮቾሮ ሆኖ ህዝባችን ከረሃብ አያድንም። በቃኝ!

   Reply