” በብልፅግና ሥም በአምባገነንነት ጥቂቶችን በማበልፀግ ፣ በመላው ኢትዮጵያ ድህነትን እያስፋፋ ያለውን ገዢውን ፓርቲ ፣ በጠብ መንጃ ሳይሆን፣ በምርጫ ፣ ለማሶገድ ፣ ፖለቲካ ሣይንስ መሆኑን በቅጡ የሚያውቅ አዲስ አሥተሳሰብ ያለው ፓርቲ ወይም ህሊና ያላቸው ሰዎች የሚመሩት የሰው ስብስብ ፓርቲ ያሥፈልገናል ። ″
ሲና ዘ ሙሴ
″ ሰው ፓርቲ ″ ( human party ) የተሰኘ የአገሬን ዜጋ ሁሉ ያለ ልዩነት የሚያሳትፍ ፓርቲ ለመመስረት እፈልጋለሁ ። ልብ በሉ ፍላጎቴን እየተናገርኩ ነው ። አንዳችም እንቅሥቃሤ አላደረኩም ። ላድርግም ብል አልችልም ። አቅም የለኝም ። ሆኖም ሃሳብ አለኝ ። እጅግ ጠቃሚ ሃሳብ ።
ይኽንን ጠቃሚ ሃሳቤን ዛሬ ለአገሬ ካላቀረብኩ እና ከጥፋት እንድትድን የራሴን አስተዋፆ ካላደረኩላት ልጇ ነኝ ማለት እንዴት እችላለሁ ? ዛሬ እኮ ፣ አገሬ እየሞተች ነው ። መሪዎቿ ለውጪ አገር ሀብታሞች መዝናኛ እና ሲወጡ ሲገቡ ለሚያዩት አርቴፊሻል ውበት እንጂ ለሰው ውበት ደንታ ቢስ ሆነዋል ። በመሆኑም ብዙ ውብ ወጣቶች በከንቱ እየረገፉ ነው ። በጅል ፣ በጅለአንፎ ና በቂል ፊትአውራሪነት በሚመራ የወንድማማች ጦርነት ።
በሚያናድድና በሚያስቆጭ ሁኔታ እቺ አገር ለሥልጣናቸው ዘላለማዊነት እንጂ ፣ ለወንድማማቾች ደንታ በሌላቸው ፤ ህሊናቸው በሱስ በደነዘዘ ጥቂት ማስተዋል ባልፈጠረባቸው ሰዎች በኃይል ተገፍታ ገደል አፋፍ ደርሳለች ። ትቂት ፣ ሆዳሙና ህሊና ቢሱ የብልፅግና ቁንጮ አመራሮች እንደቀድሞው ኢህአዴግ 60 ዓመት በነበረ ያረጀ ና ያፈጀ የጨቋኝ ተጨቋኝ ትርክት እያሳበቡ ፣ በቋንቋ ፖለቲካ ካልገዛው ሞቼ እገኛለሁ በማለት ጥቂት ዘራፊዎችን በማፍራት ላይ ተጠምደዋል ። አገሪቱን በጎሳና በመንደር እንድትከፋፈል መንገድ እየጠረጉ ነው ። በተግባር ኢትዮጵያንና ኢትዮጵያዊያንን እየገደሉ ነው ።
ከዚህ ሰውን በረሳ እና ከቀደመው ኢህአዴግ ባህሪ ያልተሻለ ″ ስመ ብልጽግና ″ እና በሠለጠኑት መንግሥታት ዘንድ ″ እንደ ተነጂ ″ ከሚቆጠር አገዛዝ አገሬን ነፃ የሚያወጣት አንድ ሁሉን አቀፍ “ሰው ” የተሰኘ ፓርቲ መመሥረት ያሥፈልጋል ።እናም በሰው ና ለሰው የተፈጠረ ታላቅ የፓለቲካ ተቋም በአገሬ ለመገንባት የኢትዮጵያ ሰዎች በህብረት ትነሱ ዘንድ ጥሪዬን አቀርባለሁ ።
ይኽንን ታላቅ እና ከዘመናት በፊት ለእኛ የተሰጠ ሰው የተሰኘ ታላቅ ሥምን ፓርቲ አድርጎ በመላው ኢትዮጵያ ለመንቀሳቀስ ደግሞ የአገሬ ምሁራን እና ባለሀብቶች በንቃት ለማገዝ ቁርጠኛ ሁኑ ። አሁን ያሉትም ፓርቲዎች ወደፊት “ የኢትዮጵያ ሰው ዴሞክራሲ ና ህብረተሰባዊ ፓርቲ “ በሚባለው ፣ ፓርቲ ሥር እንዲደራጁ ማድረግም ሌላው የቤት ሥራ ሊሆን ይገባል ።
አሁን እና ዛሬ የቋንቋ ፓለቲካን አለቅም ብሎ ፣ ቋንቋን እንደዘር መገለጫ በማድረግ በቋንቋ ከፋፍሎ አገርን ለጥቂት ፓለቲከኞች በወርቅ ሰሐን በመሥጠት በገዛ ላብና ደማቸው ጥረው ግረው እስከጊዜው የሚኖሩትን ዜጎች የሚያባላውን ና ጥቂቶችን እያበለጸገ ያለውን የአንድሰው አበገነንነት የሚፀባረቅበትን መንግሥት ከኢትዮጵያዊው ሰው ጫንቃ በህጋዊ ምርጫ አሽቀንጥሮ ለመጣልም ይኽ ፓርቲ በአሥቸኳይ መቋቋም አለበት ።
ይኽ ወደፊት ሊቋቋም የሚችለው ” ሰው ፓርቲ ወይም Human party “ ሁሉን ዜጋ አቃፊ በመሆኑ ከዝንት ዓለም ንትርክ ዜጎችን ይገላግላቸዋል ። ሰው መሆናቸውን በማሳወቅ ። ሁሉም ኢትዮጵዊ ሰው መሆኑንን አውቆ ፣ ለፓርቲው ደጋፍ ያደርግለታል ። ይኽንን በሰዎች እና ለሰዎች የሚቋቋም ፓርቲን እውን ለማድረግም አያሌ ምሁራን እና የፖለቲካ ሊቃውንት በቅንነት ይሳተፋሉ ብቻ ሳይሆን ከልባቸው እንደሚጥሩ አምናለሁ ይኽ ሰው የተሰኘ ፓርቲ ፣ የራሱ ፕሮግራም ፣ የተለያዩ ዕቅዶቹና አገርን በተመለከተ የሚያወጣቸው ፖሊሲዎች ይኖሩታል ። እነሱም ወደፊት በአባላቱ ተሳትፎ የሚዘጋጁና ለህዝብ ይፋ የሚሆኑ ይሆናሉ ።
በታላላቅ የፖለቲካ ሊቃውንት እና የተለያዩ ምሁራን ታግዞ ፤ በጥልቅ ጥናት እና ምርምር ላይ ተመሥርቶ ፤ የሚዘጋጀው ለአገር የሚበጅ ሰነድም ከአሜሪካ ህገመንግሥት እኩል የኢትዮጵያ ዜጎች የሚኮሩበት እና የሚመኩበት የፖለቲካ ሀሁ ሰነድ ይሆናል ። የዚህ ፓርቲ ርዕዮትም በመላው ዓለም ቅቡልነት ካላው ርዕዮት ጋር አንድ አይነት የሆነ ፣ የጠራና አንዳችም ብዥታ የማይፈጥር ህኖ ይዘጋጃል ። በአጭር ጊዜ በዓለም ላይ እጅግ ቅቡልነት ያለው በመሆንም ለጠቅላላው አፍሪካ ሁሉ እንደምሣሌ የሚቆጠር በመሆኑ ፤ ዜጎችን በማንቃት “ሀ” ብለው ህይወትን እንዲያጣጥሙ ሥለ ኑሮ እንዲረዱ ያደርጋቸዋል ።
ይኽ ፓርቲ ኢትዮጵያዊያን ፓለቲካዊ ሥልጣንን ለመጨበጥ የግድ ዘረኛ ወይም ቋንቋኛ መሆን እንደማያስፈልጋቸው በዕውቀት ላይ የተመሠረተ ትምህርት ይሰጣል ። የፓርቲው ዓባላት ህዝብን ወክለው ሥልጣንን ለመጨበጥ የሚፈልጉትም ለአጠቃላይ የኢትዮጵያ ህዝብ ” ለሰው ” ሠላም፣ ፍትህ፣ነፃነት፣እኩልነት ፣ዴሞክራሲያዊና ሰብዓዊ መብት መከበር እንጂ ለግል ጥቅማቸው እንዳልሆነ በተግባር ያሳያሉ ። በኢትዮጵያ እየተዛባ ያለው የሀብት ክፍፍል ፍትሃዊ እንዲሆን እንጂ መደመር እያሉ እየቀነሱ ለራሳቸው እና ለዘመዶቻቸው ሀብት ለማካበት የሚሯሯጡ ሰዎች በሰው ፓርቲ ውሥጥ ቦታ እንደማይኖራቸውም በተግባር ያሳያል ። አምልኮተ ሰው እንዲፈጠር በፍፁም አያደርግም ።
” ሰው ፓርቲ ” የተለያዩ የማንቂያና የማስተማሪያ መንገዶችን ተደራሽ በሆነ መልኩ አዘጋጅቶ በማቅረብ ” ለካ እንዲህ ነን ። ” ብሎ ሰው እንዲያስብ በማድረግ ዛሬ ካለንበት ኢ ምክንያታዊ መገዳደል ነፃ ያደርገናል ። የግለሰብ አምልኮትንም ያስቀርልናል ።
የሰው ፓርቲ የሰውን መገዳደል ለማሥቆም የሚያሥችሉ ተከታታይ ትምህርቶች ፣ በተለያዩ የሚዲያ አውታሮች ይሰጣል ። ሥለ ፖለቲካ ሥለ ኃይማኖት፣ሥለቋንቋ ጅማሮ በሰ ውና በጥልቀት ያሥተምራል ።
የአገሬ ሰው ሥለ ሰው ፣ ሥለ ቋንቋ፣ሥለ ኃይማኖት አፈጣጠር ከሳይንስና ከእምነት አንፃር በሚገባ ካላወቀ በምክንያታዊነት ህይወትን መኖር አይችልም ። እናም ያሉን ውስን ምሁራን ዕውቀታቸውን ለመላው ህዝብ የሚያካፍሉበትን መድረክ ይፈጥራል ።
ፖለቲካም ሣይንሥ መህኑንን ተገንዝቦ ፣ መንግሥትን የመምረጥና የመሻር መብት ህዝብ እንዳለው በመገንዘብ የሚያገለግለውን ይመርጥ ዘንድ የማንቃት ሥራዎችን ህዝቡ ውሥጥ ገብቶ ይሰራል ።
ይኽ ብቻ አይደለም የዳርዊንን ቲዎሪ በአንድ ወገን ኃይማኖታዊ ታሪክን በሌላ ወገን በንፅፅር አሥቀምጦ በጨዋነት በማከራከር ለኢትዮጵያ ሰው ዕውቀትን በምክንያታዊነት እንዲገነዘብ ያላሰለሰ ጥረት ያደርጋል ።
ይኽንን እና ሌሎች ጥበቦችን ለመዝራት እና የሰው ህሊና እንዲበለፅግ የሚተጋውን “ ሰው ፓርቲ “ እውን እንዲሆን የአገሬ ሰው ዛሬውኑ ተንቀሳቀስ ። ዛሬ ለዚህ ፓርቲ እውን መሆን ካልተቀሳቀስክ ነገ አገር አልባ ትሆናለህ ።
” ብልፅግና ፓርቲ ማለት በተግባር የድህነት ፓርቲ መሆኑንን አይተሃል ። ሰውን አውድሞ እንዴት መበልፀግ እንደሚቻል ሊያሳይህ ሲባዝንም ታያለህ ። ከኢህአዴግ ወደ ብልፅግና ከተቀየረ ማግሥት አንሥቶ የንፁሐን ደም አእምሮ በሌላቸው ፣ ሰውነታቸውን በካዱ ሰዎች በከንቱ ሲፈስ ፤ ሲሰቃዩ፣ ሲጨፈጨፉ ፣ ሲቃጠሉ፣ ተ ቅዝቀው ሲሰቀሉ እያየ ገዳዮችን ለፍርድ ያላቀረበ ፤ የባስ ግድያው ክልላዊ እንዲሆን ያደረገ ። በትግራይ ወንድማማቾችን ያፋጀ ። ይኽንን በማድረጉ መፀፀቱን ሳይገልፅ ፤ የጦርነቱ ዋና አክተር ሆኖ ከአክተሮቹ ጋር ታርቀናል ያለ ። ” ጦርነቱ ቲያትር ነበር ። “ ያለን በትወራ ብቻ ህዝብ መበልፀግ ይችላል ፤ ብሎ የሚያምን መሪ ያለው የኢማጂኔሽን እና “ የባዛር “መንግሥት ነው ። “ ብልፅግና ! ( ፕሬዝዳንት ኢሣያሥ አፈወርቂ እንዳሉት ።)
ዛሬ በተግባር የብልፅግና ፓርቲ አገር እያፈረሰ ያለውም ከዚህ አሥተሳስብና ባህሪው የተነሳ ነው ። በተለይም ጠቅላዩ ከዚህ በዛራዊነትና ኢማጅኒስትነት የተነሳ ፣ ሁሉንም ችግር በኢማጂኔሽን በማየትና ከነባራዊው እውነት በማፈንገጥ ፤ ድሮን እና ዙ 23 የኢትዮጵያን ውሥጣዊና ውጫዊ ችግሮች ይፈቱልኛል በሚል አባዜ ውሥጥ ገብተው በማጥ ውሥጥ እየዳከሩ ነው ። ይኽም ድካሮ የክልል መሪዎቹን ሁሉ በማወናበድ ፣ እራሳቸውን ብቻ ሳይሆን አገሪቱን ወደ ገደል አፋፍ እያስጠጋት ነው ።
ሰውየው ፣ በአሰቃቂ ሁኔታ ጠፍተው አገርን ሊያጠፉ ከቀድሞ ቅኝ ገዢዎች ጋር የተማማሉ እሥኪመሥለን ድረስ የገዛ ወገናቸውን በግድ ለማሥገበር ወንድም ወንድሙን እንዲገድል ትዕዛዝ ሲሰጡ እያየን ነው ። ይኽንን ሴጣናዊ ትዕዛዝ ግን የመከላከያ መሪዎች አናሥፈፅምም ብለዋል ። ( የሳን ዙን የጦር ጥበብ በሚገባ የተረዱ የመከላከያ ሠራዊት አባላት ሥላሉን እድለኞች ነን ። ) ለዚህ አሥተዋይነትና ታላቅነት የከበረ ምሥጋና ይኽ ፀሐፊ ያቀርብላቸዋል ። ወደፊት የሚቋቋመው ” ሰው ፓርቲ ” የላቀ የሰብዓዊነት የጀግንነት መዳሊያ ይሸልማቸዋል ።
ሰው ፓርቲ አማራ ፣ ኦርሞ ፣ ሱማሌ፣ ትግሬ ፣ ሲዳማ ወዘተ ። መባባል አገር በመመራት ደረጃ ይቅር ። የኢትዮጵያ ሰው የሚኖርበትን አካባቢ እንደ ባህሉ፣ ወጉ ፣ቋንቋው እራሱ በሚመርጣቸው ተወካይቹ ያሥተዳድር ።
የገጠር ቀበሌዎች በነፃ ምርጫ የራሳቸውን መሪዎች ይምረጡ ። የከተማ ቀበሌዎችም የራሳቸውን ከንቲባ ራሳቸው ይምረጡ ። እኛ እንጂ ህዝብ አያውቅም ይብቃ ። እኛ እንጂ የሚሉን እኮ ትላንት በኢማጂኔሽን መኪና እየነዱ ወደሱቅ የሚሄዱ ከተርታው ህዝብ መሐል የተገኙ ሰው እኮ ናቸው ¡¡
ይኽንን ሃቅ በማሳወቅ ፣ ወደፊት በጭፍን የመነዳት ፣ በመንጋ የመወገን ፣ በሥሜት ብቻ የመደገፍን የኋላቀሮች ፓለቲካን የሰው ፓርቲ በማሥቀረት ኢትዮጵያውያን አንድ ልብ እንዲኖራቸው እንደሚያስችል አስባለሁ ። ኢትዮጵያዊያን በሙሉ ፕሬዝዳንታቸውን በግልፅ ውድድር ፣ በምርመራ ጋዜጠኞች ጭመር በታገዘ የእጩ ፕሬዝዳንቶች ሥብዕና ምርመራ በውል አውቀው ለአራት ዓመት ብቻ እንዲያገለግላቸው ይመርጣሉ ። አንዴ የተመረጠ ለሁለተኛ ጊዜ ዕድል የሚያገኘው በአራት ዓመት የሰራው ሥራ ተመዝኖ ሲሆን በምርጫ ፉክክር ካሸነፈ ለተጨማሪ አራት ዓመት ፕሬዝዳንትነቱ ይራዘምለታል ። ( በነገራችን ላይ ይኽ ፓርቲ ሥልጣን እንደያዘ ከጋዜጠኞች ጋር ተባብሮ የሚሰራ ና የመናገርን ተፈጥሯዊነት የሚያከብር ይሆናል ። አወራችሁ ፣ ተናገራችሁ ፣ ተሳደባችሁ በሚል ተፈጥሮ አንደበትን ለመዝጋትም አይዳዳም ። አሁን ብልፅግና ተብየው በሁሉም ነገር የደኸየ ፓርቲ የሚፈፅመውን ከቶም አይደግምም ። )
እንግዲህ የዛሬውን “ የበለው !ፍለጠው ! ቁረጠውን አገዛዝ ለማሶገድ , ብቸኛው አማራጭ ሰላማዊ ትግል ቢሆንም ፣ የአንዱን ጠባብ እና አውሬአዊ አሥተሳሰብ በሌላው ተመሳሳይ ጠባብነት እና ትምክህት ለመተካት እንዳይሆንም የሰው ፓርቲ ይጠነቀቃል ። የሠለጠነ እና ሁሉም ሰዎች በእኩልነት የሚሳተፉበት እና “ የእኔ ነው ። “ የሚሉት ፓርቲ በመሆንም የሰለጠነውን ዓለም ያስገርማል ። የኢትዮጵያ ዜጎች ሁሉ ፣ በሰው ፓርቲ ዙሪያ ይሰባሰባሉ ። የፓለቲካ ንቃታቸው ብቻ ሳይሆን ልባቸውን በተቻለ መጠን የሚመረምር መስፈርት አዘጋጅቶም ዓባላትን ይመለምላል ። ″ በሥነምግባር የኮሰመኑ እና በሆዱ የሚስብ የፓርቲው አባል አይሆኑም ። ″ የሚልና ሌሎች ጠቃሚ ና ቅቡልነት ያላቸው መሥፈርቶች የአባልነት መመዘኛ ይሆናሉ ።
ይኸንን ″ ሰው የተሰኘ ና ለሰው ክብርና ልልና የሚተገል ፓርቲ ″ በውጪ አገር ያላችሁ በኣባልነት መቀላቀል ትችላላችሁ ። መስፈርቶቹን ካሟላችሁ ። ይኽ ፀሐፊም መሥፈርቱን ካሞላ ብቻ ነው የሚሆነው ። በአገሬ ኢትዮጵያ ፣ እጅግ ምጡቅ እና ድንቅ አእምሮ ያላቸው ዜጎች ከፓለቲካ ጨዋታ ውጪ ናቸውና ወደ ጫወታው እንዲገቡ ና ይኽንን ፓርቲ በማቋቋም ሃሳቡን እውን እንዲያደርጉ በታላቅ አክብሮት እጠይቃለሁ ። ጠንካራ ፓርቲ ሳይኖረን ፣ በአምባገነንነት እና በአንድ ሰው ፈላጭ ቆራጭነት እየተመራ ፣ ድህነትን የሚያስፋፋውን ፣ ″ ግጭትና ጦርነት የሚጠምቀውን ″ ብልፅግና የተሰኛ ፓርቲን በምርጫ ከቶም ልንቀይር እንደማንችልም ከወዲሁ ብንገነዘብ መልካም ነው ።
