አይ የሰው ነገር! የጥላቻ አጥር ክልል- በአልማዝ አሰፋ – ዘረ ሰው

አይ! የሰው ነገር
በአልማዝ አሰፋ – ዘረ ሰው

206 አጥንት : ሰውነታችን አዝሎ
ሁለት ዓይኖች ይዘን: ምስለ አሎሎ
አይታያቸውም እንዴ : ቢወራ ተብሎ
አይተን እንሸሻለን : ቢገጥመን ቀን ጎሎ::
እውነትን ከውሸት : ለመስማት ለይተን
የፈጠረን ጌታ : ሁለት ጆሮ ሰጠን::
አደጋ ሲያጋጥመን : ብር ብለን ለመሄድ
ሁለት እግር ፈጥሯል : ቆመን ለመራመድ::
እነዚህ የአካል ክፍሎች : ስራ ተሰጧቸው
በሚገባ ረገድ : ሲሟላ ሚናቸው
አይ የሰው ነገር : ዋጋ አሳጣቸው::
ማየቱስ ይቅርብን : አልታደልንም እኛ
መራመዱም ይቅር : እግራችን እስረኛ
እንዴት ማንቃት ይቻል? ውሸት ላይ የተኛ::

በጎሳ ስም ይሁን : ወይም በብሔሩ
ሕዝብን ሲያንገላቱ : ስቃይ ሲጨምሩ
መኖርያ ሲያሳጡ : ሰውን በአገሩ
የሰው ልጅ መሆናቸው : ጠፋቸው ነገሩ?
የእኔ ጎሳ እንዲ ሲል : የእኔ ጎሳ እንዲያ
ሸቀጥ አስመሰሎ : ዘር አዘል ጆንያ
ይመስላል ነጋዴ : ሚወጣ ገበያ::

ልዩነት የሌለው : ይህ የሰው ፍጡር
እርስ በርስ ሲባላ : በማይረባው ነገር
ተባብሮ ከመስራት : አገር ከማዳበር
ግዜውን ይፈጃል : ጥላቻን ሲያዋቅር::
እዩት ይህን ጉድ : ለሰው ማይሰጥ ዋጋ
ለሌላው አስቦ : ራሱን ሚወጋ::
ኧረ ሰከን በሉት: ቱክ ቱክ አብርድ
ይቅርብህ ወንድሜ : በክፋት ማበድ::

ጎሳ ጎሳ ስትል : ቋንቋን መሪ አድርገህ
ከፈረሱ ጋሪ : እያልክ አስቀድመህ
እኔን አምሳልህን: መቀበል ተስኖህ
እውነት ቅጀት ሆኖ : ሰላምን አጥተህ
በእንክሮ ማሰቡ : እንዳስቸገረህ
መሆንክን ስረዳ : ፍፁም ማይገባህ
ምን እንደሆንክ አንተ : እስቲ ልጠይቅህ
መነሻህን ልወቅ : ስለአፈጣጠርህ
የሰው ዘር ወይስ አውሬ : ከየት ነው አመጣጥህ?

ይህ ሁሉ ክፋት: ንብረት ስታቃጥል
ያ ሁሉ ጭካኔ : የሰውን ልጅ ስትገድል
ከተወለደበት ከኖረበት መሬት: ሰውን ስታፈናቅል
የኔ ቤተሰብ ቢሆን : ምንስ ይሰማኛል
ብለህ በማሰብ : ራስህን ጠይቀሃል?

ኦሮሞ ተበድሎ : አማራ አልደላው
ሲዳማ ተጎድቶ : ወላይታ አልተመቸው
ትግራይ ጠግቦ ሳለ : ጋምቤላ አልራበው
ሱማሌ ሲዝናና : አፋር አልቅሶ ነው?
በድህነት ቀንበር : ደክሞ ሰውነታቸው
ማየት ተስኖህ ነው? ሁሉም አፈር መስለው
ጎሳ ጎሳ እያልክ : ቱልቱላ ምትነፋው
ማንኛው ደልቶት ነው : ጎሳን ያስቀደምከው?

ልንገርህ ወንድሜ : ሰው ነኝ ለምትለው
ተማርኩኝ ብለህ : እውቀትን ላቀፍከው
ጥቅምን አስቀድመህ : ሕዝብን ለረሳኸው
ሰው መሆን ትተህ : ጎሳን ላራመድከው
ጎሰኝነት አዝለህ : በነጭ አገር : ጥገኛ ለሆንከው
ሻንቅላ ባሪያ : ኒገር ለተባልከው
በጥላቻ ምክንያት : ስድብ ለቀመስከው
ሰው መሆንህ ሳይታሰብ : ውርደት ለለበስከው
በሰፈሩት ቁና : መሰፈር እንዲህ ነው::
አንተ ስትሰደብ : አገር እንደሌለህ
ስሜትህ ተነክቶ : ሃዘን ላይ ወድቀህ
የሰው ያለ ስትል : መፅናናት ፈልገህ
ታዲያ ለምን ብለህ ሌላውን : አገር ታሳጣለህ?

እንግዲህ ተረዳ : ይግባህ ማንነቴ
ጎሳ ቋንቋ ሳይሆን : የማ ልጅነቴ
ከ200 በላይ : ተቆጥሮ አጥንቴ
ባለ ሁለት አይን : ተጣርቶ ማየቴ
ሁለት ጆሮ አለኝ : እርግጥ ነው መስማቴ
በሁለቱም እግሮቼ : ቆሞ ሰውነቴ
እንዳንተ ሰው አለመሆኔን : አስረዳኝ በሞቴ::

በጣም ያሳዝናል : ያንተማ ነገር
ያንተው ተመሳሳይ : የእግዚአብሔር ፍጡር
ሰው መሆኔን ትተህ : ጎሳ ስትቆጥር
አንተ ሰው መሆንህን : ምን ብዬ ልናገር?
ሰው ለመሆንህስ : ምን ይዤ ልመስክር?

አይ የሰው ነገር : መተሳሰብ ትተን
አይ የሰው ነገር : ሰባዊነት ከድተን
የሰው ልጅነት : ዘር መሆኑ ረስተን
የጥላቻ አጥር : ክልልም ከልለን
እንባላ ጀመር : ከአውሬም አንሰን::
አውሬ አስተዋይ ነው : አለው መላ መላ
እንደዘመኑ ሰው : ዘሩን ሳያጥላላ
ወገኑ ሲጠቃ : በመቆም ከለላ
አውሬ ዘር ያውቃል : እንደጎሰኞቹ ወገኑን አይበላ::

ሰላምና ብልፅግና ለኢትዮጵያና ለሕዝቦቿ!!