የማይቻል የለም ለሰው የሚሳነው
ብሩህ አዕምሮና ቅን ልቦና ካለው
ከአምላክ በተሰጠው ፀጋ ካወቀበት
የሚያቅተው የለም የማይሳካለት
ተፈጥሮ ምሥጢር ነው
ብዙ ትርጉም ያለው
የረቀቀ ጥበብ
ጠውልጎ የሚያብብ
ተረካቢ እሚሆን ትውልድ የሚፈልግ
በራሱ ሕግጋት ባይወድ እንኳን በግድ
ተፈጥሮ ያልዳኘው
ወሰን ያልገደበው
ሚዛን ያልጠበቀ
መስመር የለቀቀ
ዉሃ ሞልቶ ሲፈስ
እየጠራረገ ሁሉን በማግበስበስ
ይገባል ወደ ወንዝ
ፍሰቱን ለማገዝ
ከዚያ በኋላማ ኃይሉን አጠናክሮ
ፏፏቴ በመስራት ሽቅብ ተፈናጥሮ
ይተፋል ሞገዱን
በማርጠብ ዙሪያውን
የማይቻል የለም ለሰው የሚሳነው
ብሩህ አዕምሮና ቅን ልቦና ካለው
የሞገዱን ግፊት
ጥቅሙን ያልተረዱት
ሰጥመው ይቀራሉ
ወይ ይንሳፈፋሉ
እንደ ደረቀ ዛፍ
የሌለው ቅርንጫፍ
ዘዴውን ያወቁት
በዕውቀት የመጠቁት
አገርን በማልማት
ወጥተው ከድህነት
ከተመፅዋችነት
ስደትን እስቁመው
ዜጎችን አጥግበው
ሁሉም በሀገራቸው
ይኖራሉ ኮርተው
በግልፅ ውይይት
አጥፍተው ልዩነት
ተጋግዘው በጋራ ይበለፅጋሉ
ጤናማ ቤተሰብ ይመሰርታሉ
ታሪክ ተረካቢ ትውልድ ያፈራሉ
ሁሉም ጠግቦ አዳሪ ሆነው ይኖራሉ
የማይቻል የለም ለሰው የሚሳነው
ብሩህ አዕምሮና ቅን ልቦና ካለው
ሰላም ካለ በአገር
በጭራሽ አይኖርም የማይቻል ነገር
በትምህርት መበልፀግ
በሀብት መበልፀግ
በሰላም መታደግ
በጤናም መታደግ
ቀና አዕምሮ ካለ
ከሚያዝን ልብ ጋር የተደላደለ
የማይቻል የለም
እያንዳንዱ ዜጋ ከጣረ ለሰላም
ከራስ ጋር መታረቅ
ሃሣብ ሳይሄድ ዕሩቅ
ተጠየቅ ራስን
ተጠየቅ ምላስን
ብሎ በመሞገት
ይገኛል ትርጉሙ የሰላም ምንነት
በሰላም አዉለኝ
ለጎርቤቶቸም ሰላሙን ስጥልኝ
ብሎ ለሚወጣ ወደ ሥራ ሊሄድ
የማይቻል የለም የማይቀና መንገድ
የማይቻል የለም ለሰው የሚሳነው
ብሩህ አዕምሮና ቅን ልቦና ካለው
