በጃ-war ኢትዮጵያ ነዋሪዎች ባሮች ናቸው ! – መስከረም አበራ

የማይፀፀተው ጃ-war ታዲያ በሲዳማ ጎረምሶች መሃል ቆሞ እንደ ሙሶሎኒ በሚመስለኝ የዘወትር መወናጭፉ እየተወናጨፈ “በጉልበትም ቢሆን አላማችሁን አሳኩ” ያላቸው ወጣቶች ሰምተውት ጉልበታቸው የሚችለውን ሁሉ ካደረጉ በኋላ በባለፈው ሳምንት የL-TV ቆይታው “የሲዳማ ወጣቶች በስተመጨረሻው የታክቲክ ስህተት ሰርተዋል” ሲል ሊወቅሳቸው ቃጥቶታል፡፡

የታክቲክ ስህተት የሚለው ቤተክርስቲያን ማቃጠሉን፣እሱ “ነዋሪዎች” ሲል እንደ ባሪያ የሚቆጥራቸውን ሲዳማ ያልሆኑ የሰው ልጆች ነፍስ እና ንብረት ማውደማቸውን ወዘተ ነው፡፡ለመሆኑ ያኔ በጉልበት አላማችሁን አስፈፅሙ እያለ ስሜቱ እንዳቀበለው ሲደነፋ የነበረው ወጣቶቹ ከዚህ ሌላ ምን እንዲያደርጉ አስቦ ነበር?

የስሜት ፈረሱን ጭኖ መጥቶ አዋሳ ላይ ባራገፈ ማግስት በሲዳማ ዞን የጠፋው ጥፋት ሳያንስ ዛሬ ደግሞ እነዛኑ ያስገደላቸውን መጤዎች እንደባሪያ የሚቆጥር ነገር እየተናገረ ነው፡፡ ከእኔ በላይ አዋቂ ላሳር የሚለው ጃ-war በሲዳማ ሪፈረንደም ላይ ከሲዳማ ዘር ውጭ ያሉ ሰዎች መሳተፍ የለባቸውም፣ይህን ማድረግ ህገመንግስቱን መፃረር ነው ፣ህገ-መንግስቱ የሚለው ምርጫ መምረጥ የሚችሉት ብሄር ብሄርሰቦች እና ህዝቦች እንጅ ነዋሪዎች አይደሉም ሲል እየለፈፈ ነው፡፡

የጃ-war ኢትዮጵያ ይህች ነች! እትብታቸው ከተቀበረበት መንደር ራቅ ብለው የሚኖሩ “ነዋሪዎች” የተባሉ ባሮች በህይወታቸው ላይ ተፅዕኖ በሚያደርግ ፖለቲካዊ ነገር ላይ መወሰን አይችሉም:: የሚወስኑላቸው ብሄር ብሄርሰቦች እና ህዝቦች የተባሉ ልዑላን ናቸው፡፡ ነዋሪዎች እንደ ግሪክ ዲሞክራሲ ባሮች እንደ ከብት እየበሉ እየጠጡ፣እየተኙ፣እየተነሱ ልዑላን ብሄር ብሄረሰቦች በወሰኑበት የፖለቲካ መንገድ መጓዝ ብቻ ነው፡፡የጃ-war ኢትዮጵያ ይህችን ትመስላለች!

ቃለ-መሃላ ያልፈፀመው ጠ/ሚ ጃ-war ይህንን ሲል አንድ እንዲመልስልኝ የሚፈልገው አበይት ጥያቄ አለ:: ይኽውም እስከ ዛሬ ስንት ሃገራዊ ምርጫ ሲደረግ ነዋሪዎች በሃገራዊ ምርጫ ድምፅ እንዳይሰጡ ያላሳሰበው ለምንድን ነው? እሱ አዛዥ ናዛዥ ከሆነ በኋላ ለመጀመሪያ ጊዜ በሚደረገው በሚቀጥለው ሃገራዊ ምርጫስ እኛ ነዋሪዎች መምረጥ እንችል ይሆን አይሆን የሚለውን በጊዜ ቢያሳውቀን ደግ ነው፡፡በህገ-መንግስቱ መምረጥ የሚችሉት ብሄር ብሄረሰቦች እና ህዝቦች ናቸው ከተባለ እኛ ነዋሪዎች እስከ ዛሬ ስንመርጥ የነበረው እሱን ምን አፍዝ አደንግዝ ይዞት ነው? ነዋሪዎች በሪፈረንደም እንዳይሳተፉ የሚለውን የዛሬውን የጃ-war ፅሁፍ ሳነብ ከጃ-war ኢትዮጵያ ይልቅ ነዋሪዎች እንዳይመረጡ ግን እንዲመርጡ መብት የሰጠቸው የመለስ ዜናዊ ኢትዮጵያ የተሻለች መሆኗን ተገንዝቤያለሁ፡፡

ሪፈረንደም እና ምርጫ መንትዮች ናቸው፡፡በየአምስት አመቱ ከሚደረግ ሃገራዊ ምርጫ ይልቅ በሪፈረንደም የሚደረገው የዜጎች ውሳኔ በሕይወታቸው ላይ ቋሚ ተፅዕኖ ያለው ነው፡፡ ለምን ቢባል በ ሪፈረንደም የሚደረግ ፖለቲካዊ ውሳኔ ውጤቱ ታይቶ የመሻሻል እድሉ ዝግ ነው ማለት ይቻላል:: በሃገራዊ ምርጫ የተደረገ ውሳኔ ግን መጥፎ ውጤት ካመጣ በሚቀጥለው ምርጫ በሌላ ውሳኔ የመታረም እድል ያለው ነው፡፡ስለዚህ ዜጎች በሪፈረንደም አለመሳተፋቸው በምርጫ ካለመሳተፍ ተለይቶ መታየት የለበትም፡፡

በስተመጨረሻም ጃ-war በግዛቱ ሪፈረንደም እንዳያደርጉ የሚከለክላቸው ነዋሪዎች የሚከፍሉትን ታክስ መቀበሉንስ የሚያቆመው መቼ ነው፡፡ ወይስ እነሱ እንጅ ገንዘባቸው አይጠላም ?