ከፍሬው አበበ
ፓትርያርክ አቡነ ማትያስ በኢትዮጵያ ኦርቶዶክስ ተዋህዶ ቤ/ክ ጠቅላይ መንበረ ፓትርያርክ ጽ/ቤት በኩል «ስሜ ጠፍቷል» ብለው ከመሰረቱብኝ የወንጀል እና የፍትሐብሄር ክስ በአንዱ (በወንጀሉ) በነጻ የመሰናበቴ ጉዳይ ተሰምቷል፡፡ ብዙ ወዳጆቼና ጓደኞቼ እንደወጉ «እንኳን ደስ ያለህ» ሲሉኝ እኔም እንደ ወግ ልማዱ «እንኳን አብሮ ደስ አለን!» ስል ሰንብቻለሁ፡፡ ነገሩ ግን በፍርድ አደባባይ ባላንጣን እንደመርታት የሚያስፈነድቅ፣ የሚያስደስት ነገር የለውም፡፡
ሲጀምር ከሳሽ የሃይማኖት አባቴ ናቸው፡፡ የሀገር አባት፣ ፓትርያርክ ናቸው፡፡ በቅዱስ መጽሐፉ አስተምህሮ የሠላም፣ የፍቅር፣ የመቻቻል፣ የይቅርታ ተምሳሌት ናቸው፡፡ በዚህ እሳቤዬ ምክንያት ነው፤ ክሱ ሲመሰረት ትንሽ እንደአለማመንም፣ እንደመገረምም አድርጎኝ የነበረው፡፡ ነገሩ ውሎ አድሮ ሲርየስ መሆኑ እስኪገባኝ ድረስ ጊዜ ወስዶብኝ ነበር፡፡ ከሳሽ የጸሑፉን ባለቤት ዲ/ን ዳንኤል ክብረትን አጣምሮ መክሰስ ይችል ነበር፣ ግን አላደረገውም፡፡ እኔን አንድ ምስኪን ጋዜጠኛ የ100 ሺ ብር ካሳ ከሚጠይቀኝ ተቋሜን አብሮ ቢከስ የበለጠ ያዋጣው ነበር፣ ይህንንም አላደረገም፡፡ ከምንም በላይ የገረመኝ ይቅር ባይነትን በምታስተምር ቤተክህነት መሪ የሆኑትን ትልቁ አባቴን መልካም ስም አጎደፍክ ተብዬ አለማዊ ፍ/ቤት መቆሜ ነበር፡፡ የህሊና ጫናው ልቋቋመው የምችለው ዓይነት አልነበረም፡፡
እናም ምን አደረግን!?
«ተው ግዴለህም….ነገሩ በይቅርታ ይለቅ» ያሉኝን ተቆርቋሪ ወዳጆቼን ምክር መስማት ነበረብኝ፡፡ እኔም ብዙ ርቀት ሄጄ መንፈሳዊ አባቴን ይቅርታ ያደርጉልኝ ዘንድ ለመለመንም ወስኜ መንቀሳቀሴ የሚደበቅ አልነበረም፡፡ ለምን ይህንን አሰብኩኝ? ምክንያቴ ግልጽ ነበር፡፡ ምንም እንኳን ጥፋት አለ ብዬ ባላምንም አቡኑ መንፈሳዊ አባቴ ናቸውና ቅር ስለተሰኙ ብቻ ይቅርታ መጠየቄ የእግዚአብሔር መንገድ ነው ብዬ በጽኑ በማመኔ ነበር፡፡ ምናልባት ይህ ሙከራዬ በከሳሾቼ ዘንድ እንደሽንፈት ተቆጥሮ «ዋጋውን እናሰጠዋለን!» የሚል መታበይ ውስጥ ከቷቸው ይሆን? እንጃ ማን… ያውቃል? እናም የይቅርታ ጥያቄዬ ነገ ዛሬ እየተባለ፣ እየተጓተተ ምላሹ ራቀ፡፡ «አጓተቱት» ከማለት ይልቅ «እምቢ አሉ» የሚለው ነገሩን የበለጠ ሳይገልጸው አይቀርም፡፡ በቃ!… የነበረኝ ብቸኛና አስገዳጅ አማራጭ በዚያው በፍ/ቤት መድረክ እውነታውን መጋፈጥ ብቻ ሆነ፡፡ እናም የሙያዊ አበርክቶቱን ለማድረግ ከጎኔ ከተሰለፈው ጠበቃዬ ነቢዩ እና ሌሎች ወዳጆቼ ጋር እየተመካከርን ያለፉትን 9 ወራት የፍ/ቤት ደጅ ስንጠና ለመክረም ተገደድን፡፡
በክርክራችን ለፍ/ቤቱ ለማስረዳት ከታገልንባቸው ነጥቦች አንዱ በጋዜጣችን ላይ የተስተናገደው ጹሑፍ ስም የሚያጠፋ ሳይሆን የተለመደ ትችት ወይንም ሒስ የመሆኑን ጉዳይ ነው፡፡ ትችት ደግሞ የፕሬስ ነጻነት አንዱ መገለጫና የተፈቀደ ነው የሚል ይዘት ያለው ክርክር ያቀረብን ሲሆን ይህን ለማስረዳት ካቀረብናቸው ሶስት የሰው ምስክሮች (ዲ/ን ዳንኤል ክብረትን ጨምሮ) በተጨማሪ የተቋማት ምስክርነት እንዲሰጥ ጠይቀን በተፈቀደው መሰረት ሁለት መንግሥታዊ ተቋማት እና አንድ የሙያ ማህበር በጋዜጣው ላይ የወጣውን ጹሑፍ ገምግመው የጹሑፉ ይዘት ሒስ ነው ወይንስ የስም ማጥፋት ነው የሚለውን ሙያዊ ምስክርነታቸውን በጹሑፍ እንዲሰጡ አደረግን፡፡ ተቋማቱ በአጭሩ በጋዜጣው ላይ የወጣው ጹሑፍ ትችት ወይንም ሂስ እንጂ ስም ማጥፋት አይደለም አሉ፡፡ በስተመጨረሻም ፍ/ቤቱ ግራ ቀኙን መዝኖ «የጠፋ ስም የለም!»በሚል ልክ ያለፈው ሳምንት በዛሬዋ ቀን በነጻ ሊያሰንብተኝ በቃ፡፡
በፍትሐብሄር የቀረበብኝ የ100 ሺ ብር የህሊና ጉዳት ካሳ ይከፈለን ክስ ግን ገና መቋጫ አላገኘም፡፡ በዚህም ክስ እግዚአብሄር ከእኔ ጎን እንደሚቆም አንዳች ጥርጥር የለኝም፡፡
በሁኔታው ምን ተሰማህ ብላችሁ ደጋግማችሁ ለጠየቃችሁኝ፡- በክሱ ሒደት ጠቃሚ ውሳኔ ስላገኘሁኝ እንደሰው መደሰቴ እውነት ቢሆንም ፓትርያርክን ያህል አባት አሸነፈ ተብሎ መነገሩ ግን አያስደስትም፡፡ ይህ ዓይነቱ ቡረቃ እንደእኔ ላለው ለመንፈስ ልዕልና ዋጋ ለሚሰጥ ሰው የሚገባ አይደለም፣ ያሸነፍኩት እኔ ሳልሆን የእውነት አምላክ እግዚአብሔር ነውና፡፡
በመጨረሻም፡-…
ክሱ የተነሳ ሰሞን በፌስቡክ፣ በቲውተር፣ በብሎግ…. ቁጣችሁን፣ ሃዘናችሁን፣ ግርምታችሁን ያካፈላችሁን ወዳጆቼ፣ በተግባር ደግሞ «አይዞህ» ብላችሁ ከጎኔ በመቆም ፍ/ቤት አብራችሁኝ ለተመላለሳችሁ፣ ለዘገባችሁ፣ እንደወዳጄ ጠበቃ ነቢዩ ምክሩ ወልደአረጋይ ሙያዊ ድጋፍችሁኝ ሳትሰስቱ፣ በዋጋ ሳትተምኑ ላበረከታችሁልኝ፣ «ይህቺ ለትራንስፖርት ትሁንህ» ብላችሁ እጃችሁን ለዘረጋችሁልኝ ወዳጆቼ፣ ጓደኞቼ፣ የሥራ ባልደረቦቼ…. እግዚአብሄር ደግነታችሁን፣ ቸርነታችሁን ያስብልኝ፣ ይባርክልኝ እላለሁ፡፡