የጦቢያ ሰው ጣጣ…ያሬድ መኩሪያ

ይሻሻላል ያልነው፣ተስፋ ያረግንበት

በነነ እንደ ጭስ፣ተነነ እንደ እንፋሎት

ተሰወረ እንደ ጉም፣ሸሸ እንደ ሌሊት ወፍ

ሁሉም ተተራምሶ፣ጠፋ ቅጥ አንባሩ

አፈሩ አንገት ደፉ፣በለውጡ የኮሩ::

በቃ የጦቢያ ሕዝብ፣ሆነ እጓለ ማውታ

እረኛም የሌለው፣ሚጠብቀው ያጣ

እንደዚህ ተምታቶ፣ተናክሶ ተባልቶ

ፊቱ ቆሞ ያለ፣ይሄን የዓለም ፍዳ

በየቱ ጥበብ ነው፣ደርሶ የሚወጣ::

ምጣኔ ሀብት የለም፣በዕቅድ የሚመራ

ምድሩን የሞላው፣አገር አልበቃ ያለው

ቅርሻት ፓለቲካ፣ንጥቂያ ዝርፊያ ብቻ

ፍጥረተ ዓለም በዛ፣ቁጥሩ ገደብ አጣ

ምድርን አጣበበ፣ተበተነ እንደ ጨው

ተነዛ እንደ ጅብጥላ፣ፈላ እንደ ፌንጣ

ሚበላ ሚጠጣው፣መጠለያም ጠፋ::

የእምቦጭ እንዘጭ ኑሮ፣ደርሶ ማይቀየር

ማን ሄደ ማን መጣ፣ተጨማልቆ ማዝገም

ሞትን እንደ ውልደት፣ተላምዶ ዞር ማለት

ዘንድሮ ላይ ቆሞ፣ያለፈን መናፈቅ

አዙሪት እርግማን፣የጦቢያ ሰው ጣጣ…

ደስታው ተንቦግቡጎ፣ወዲያው የሚጠፋ::

        ~***•° **** °•***~

ጥፋቱ ውድመቱ እያደር ለሚብስ

የሰብእን ዓለማዊ ቆይታ ላከበደ ላከፋ

ሲኦልና ጨላማ ላረገ የሐበሻ ምድር

መዘከርያ

,,,,,,,,,,,,,,,,,,,,,,,,,,,,,,,,,,,,,,,,,,,,,

ግንቦት ፲፬/፳፻፲፫ ዓ.ም

May 22/2021

ቅዳሜ)05:18(ሚኪ.ላ/አ.አ

©ያመጌዕ