መፀለይ አሁን ነው ! - አሸናፊ ዋቅቶላ፣ ሕ/ዶ -የውስጥ ሕክምና ባለሙያ - ዘ-ሐበሻ | Ethiopian Latest News, Top Analysis & Best Articles ...

ቋንቋው በረከተ ፣ መግባቢያው ቀነሰ፣

አንባጓሮ በዛ፣ ማዳመጥ አነሰ፣

ወጣት ጯሂ ሆነ፣ ባዛውንቱም ባሰ፣

አማኝ ነኝ የሚለው፣ እዚያም ያልደረሰ፣

ሁሉም ዓለም ይላል፣ዓለም ዓለም ዓለም!

ከራሱ በስተቀር፣የሚያስብ ግን የለም።

~ዘመኑ ጨለመ ፣ ተስፋ መነመነ፣

መፀለይ አሁን ነው፣ ያመነ ያላመነ!

መነጋገር ቢኖር፣ ባለከፋ ነበረ፣

በመጯጯህ ብዛት፣ ሁሉም ደነቆረ፣

ያጓራል ለብቻው ፣ ያጓራል በጋራ፣

ቁልቁል እየሮጠ፣ ትውልድ ሆኖ ተራ፣

ያራዳ ጎርምሳ ቤተ-እምነት ዘለቀ፣

ቀዳሽ አስቀዳሹም፣ ማዋከብ አወቀ፣

~ ዘመኑ ጨለመ ፣ ተስፋ መነመነ፣

መፀለይ አሁን ነው፣ ያመነ ያላመነ!

ሕዝብን ሜዳ ጥሎ፣ ብር እያሳደደ፣

ተው ባዩ ጠፋና፣ ባንድላይ አበደ፣

ወርቅ ሰላም ሞልቶ፣ በሁሉ ሰው ቤት፣

የብር ግርግር፣ ከተተው አዘቅት፣

ሞላጫው ዘራፊ፣ ምኑንም ሳያውቅ፣

ፈላስፋ ሆነብን፣በጊዜ መድርቅ።

~ ዘመኑ ጨለመ ፣ ተስፋ መነመነ፣

መፀለይ አሁን ነው፣ ያመነ ያላመነ!

አሸናፊ ዋቅቶላ፣ ሕ/ዶ -የውስጥ ሕክምና ባለሙያ

ሲልቨርስፕሪንግ ሜሪላንድ- ዩ ኤስ ኤ

ማርች 18፣ 2023

2 Comments

akale says:
March 19, 2023 at 5:53 am
እኝህ ሰውዬ እዚህ ፎቶ ላይ የተግባር ወንድማቸውን ሽፈራው ሽጉጤን መሰሉኝ ምን አበሳጫቸው? ጁዋርና ሽመልስ እስኪበሏቸው መንከባከብ ነው ዳውድ ኢብሳም ቀን እየቆጠረላቸው ነው፡፡
Reply
nebyu says:
March 19, 2023 at 5:54 am
ፍትህ ለአቶ ታዲዮስ ታንቱ፤ዘመነ ካሴ፤ታየ ቦጋለ፤ ለ13000 ፋኖ ኧረ ዝም አንበል
Reply