በርካታ ቻይናውያን ሞባይል ስልኮችን በሕገወጥ መንገድ አስገብተው ሲሸጡ እየተያዙ ነው

(ሪፖርተር) ከግንባታ ሥራቸው እኩል በተለያዩ የማጭበርበርና የሙስና ወንጀሎች ስማቸው የሚነሳው ቻይናውያን፣ አሁን ደግሞ በኤርፖርቶች በኩል ቀረጥ ሳይከፍሉባቸው የሚያስገቧቸውን ልዩ ልዩ የቻይና ስሪት ሞባይል ስልኮችን ሲሸጡ በአደባባይ እየተያዙ በመታሰር ላይ መሆናቸው ተሰማ፡፡
ከአዲስ አበባ እስከ ክልል ከተሞች መንሰራፋቱ የሚነገርለት የቻይናውያኑ ሕገወጥ ድርጊት ከውጭ የሚገባበት መንገድ ብቻ ሳይሆን የሚሸጥበት ስልትም አስገራሚ እየሆነ መጥቷል፡፡ በአውሮፕላን ተጓጉዘው በየሻንጣው የሚገቡ የሞባይል ስልኮች የበርካታ ኢትዮጵያውያንን ኪስ እያራቆቱ መሆኑን ለቻይናውያኑ ቅርበት ያላቸው ምንጮች ለሪፖርተር ገልጸዋል፡፡ ሪፖርተር ያነጋገራቸው የባህር ዳር ከተማ ፖሊስ ባልደረቦችም ሞባይል ስልኮቹ ወደ አገር ውስጥ የሚገቡት በአውሮፕላን ተጓጉዘው በመሆኑ፣ የኤርፖርቶች ሠራተኞችን በተባባሪነት እንደሚጠረጥሩ ተናግረዋል፡፡ በእንዲህ ያለው ሁኔታ የሚገቡትን የሞባይል ስልኮች ስትሸጥ እጅ ከፍንጅ የተያዘች ቻይናዊትን ለኢትዮጵያ ገቢዎችና ጉምሩክ ባለሥልጣን ባደልረቦች ያስረከበው የባህር ዳር ከተማ ፖሊስ፣ በወቅቱ ከቻይናዊቷ ከተያዙት ጥቂት ሞባይል ስልኮች ባሻገር፣ በከተማው ውስጥ የተደበቁና አመቺ ጊዜ የሚጠብቁ በርካታ ቀጥር ያለው የኮንትሮባንድ ሞባይል ስልኮች እንደሚኖሩ ጥርጣሬ አለው፡፡
የኢትዮጵያ ገቢዎችና ጉምሩክ ባለሥልጣን ስለድርጊቱ ማብራርያ ተጠይቆ ማብራሪያ ለማግኘት ባይቻልም፣ ቁጥራቸው 30 የሚገመት ቻይናውያን ባለፉት ስድስት ወራት ብቻ ታስረው እንደነበርና አብዛኞቹም የቅጣት ውሳኔ እንደተላለፈባቸው ታውቋል፡፡ በርካቶችም ከሜክሲኮ በታች በቀድሞው ላጋር ጉምሩክ ታስረው እንደሚገኙ ምንጮች ገልጸዋል፡፡ አንዳንዶቹም በገንዘብ ዋስትናና በገደብ ሲለቀቀሉ ነሐሴ 20 ቀን 2005 ዓ.ም. ፍርድ ቤት የሚቀርቡ እንደሚገኙበት ለማወቅ ተችሏል፡፡
ቻይናውያን ለሙስና እንዲጋለጡ ከሚያደርጓቸው ምክንያቶች ውስጥ ቋንቋ ባለማወቃቸው ሳቢያ በአስተርጓሚዎች በሚካሄድባቸው ጫና እንደሆነ በቅርብ የሚያውቋቸው ይናገራሉ፡፡ ከዚህ ቀደም እዚህ ቆይታ የነበራቸው ቻይናውያንና አንዳንድ ሐበሾች እንግሊዝኛ ቋንቋ የማያውቁ ኢንቨስተሮች ሲመጡ፣ በእጅም በእግርም ካላሉ በስተቀር በአብዛኛው የመንግሥት መሥርያ ቤቶች ዘንድ ጉዳያቸው ሊፈጸምላቸው እንደማይችል ስለሚነግሯቸው ይህንኑ ለማድረግ እንደሚገደዱ ይገልጻሉ፡፡ ሆኖም የሞባይል ስልክ አጭበርብረው ከሚያስገቡት ቻይናውያን ግን እነዚህ የተለዩ ናቸው፡፡
የተጭበረበሩ የሞባይል ስልክ ቸርቻሪዎቹ ቻይናውያን ያስገቡዋቸው የሞባይል ስልኮች ከሚሸጡባቸው ዘዴዎች ውስጥ ደግሞ በአለባበሳቸው ደህና ሆነው ያገኟቸውን ኢትዮጵያውያን መንገደኞች በመቅረብ፣ ለአገሩ እንግዳ በመሆናው ንብረቶቻቸው ድንገት የጠፉባቸው መሆኑን ይነግራሉ፡፡ በእጃቸው የቀረውን ‹‹ውድ ዋጋ ያለው የሞባይል ስልክ›› ለመሸጥ መገደዳቸው አስተዛዝነው በመግለጽ ያግባባሉ፡፡ ልቡ የተነካና የኋላውን ያልጠረጠረ መንገደኛም በዋጋ መደራደር ይጀምራል፡፡ ስምንት ሺሕ ብርና ከዚያም ላቅ የሚል ገንዘብ ሊጠራለት ይችላል፡፡ ሆኖም መክፈል የሚችለው ሁለት ወይም ሦስት ሺሕ ብር ብቻ እንደሆነ የሚገልጸው የአገሬው አዛኝ፣ በያዘው ገንዘብ እንዲገዛ ያግባቡትና ሽያጩ ይጠናቀቃል፡፡ የተሸጠለት የሞባይል ስልክ ግን ግፋ ቢል ከ500 ብር ላይበልጥ እንደሚችል ምንጮች ይናገራሉ፡፡
የአዲስ አበባ ከተማ አስተዳደር የጎዳና ላይ ነጋዴዎች ሕጋዊ የገበያውን ሒደት እያወኩ በማስቸገራቸው ዕርምጃ ሊወስድባቸው መሆኑን ብቻ ሳይሆን በቁጥጥር ሥር ማዋል መጀመሩን በሚታይባት አዲስ አበባ፣ ቻይናውያን ከውጭ በሕገወጥ መንገድ ያስገቡዋቸውን ልዩ ልዩ የሞባይል ስልኮች ሲሸጡ በአደባባይ መታየታቸው አስገራሚ እንደሆነባቸው ብዙዎች ይናገራሉ፡፡
ምንጭ ሪፖርተር ጋዜጣ
እኛ የዘ-ሃበሻ ጋዜጣ አዘጋጆች ደግሞ ከአራት አመት በፊት አብዱ ኪያር ስለ ቻይናዎች በበሰለ ቅኔ ያዜመውን
ቻይና ቻይና የሚለውን ዘፈን እንድታደምጡት እየጋበዝን በቸር ያሰንብተን እንላችኋለን::