ከአልማዝ አሰፋ
[email protected]
ክቡር ጠቅላይ ሚኔስቴር ዶ/ር አቢይ አህመድ:-
እኔ የፓለቲካ ምሁር ወይም ተንታኝ ሳልሆን ስለተወለድኩባት አገርና ከትውልድ ወደ ትውልድ በሰው ሰራሽ መከራ ስለሚሰቃየው የኢትዮጵያ ሕዝብ የማስብ ለ50 ዓመታት ያህል በአሜሪካ የምኖርና ወደ ኢትዮጵያ የማልመለስ ትውልደ ኢትዮጵያዊ ተራ ሰው ነኝ:: የፖለቲካውን ትነተናና ግምገማ ለሱሰኛ ተራቢዎች በመተው: የሚሰማኝን በዘ-ሐበሻ ድረ ገፅ ላይ በማቅረብ በግልፅ ላካፍሎት መረጥኩኝ::
አገርን አገር የሚያደርገው ሕዝብ ነው:: ሕዝብ ተባብሮ በእንድነት አምኖ በሕብረት ያለበትንና የሚኖርበትን አካባቢ የጋራ አድርጎ ሲቀበል ከክልልነት ወጥቶ አገር ይመሰርታል:: ዛሬ ግን ኢትዮጵያ እንደአገር ከመታሰቧ ይልቅ : የክልሎች ጥርቅም ሆና ትታያለች:: ይህ በእርሶ አመራር የተጀመረ ሳይሆን ካለፈው የከፋፍለህ ግዛ አስተዳደር ስርዓት የወረሱት እንደሆነ : ሳይጠየቅ ያለፈቃዱ በግዴታ በክልል የተከፋፈለው የኢትዮጵያ ሕዝብ ያውቀዋል:: ሆኖም እርሶ የዛሬ ሶስት አመት ከአስራ አንድ ወሮች በፊት ወደ ሥልጣን ሲመጡ : በአገር ውስጥም ሆነ በዲያስፖራ ያለው እውነተኛ ኢትዮጵያውያን በአነጋገሮና በአቀራረቦ ተማርኮ : በእርግጥም ኢትዮጵያና ኢትዮጵያውያን የአንድነትና የአገራዊነት ጎህ እንደበራላቸው ተሰምቷቸው የደስታ ጮቤ እረገጡ:: እርሶንም በዘመናቶች አልፎ አልፎ ለመልካም ለውጥ አምላክ መርቆ ከሚልካቸው መሪዎች አንዱ እንደሆኑ በመቁጠር ደሃውና ሰፊው የኢትዮጵያ ሕዝብ እልል ብሎ እንደተቀበሎት ይረዳሉ ብዬ አምናለሁ:: ከዚያም በኢትዮጵያና በኤርትራ መሃል የነበረውን መሻከር አስታርቀው በዓለም የሰላምን ኖብል ሽልማት ሲያገኙ ሰፊው የኢትዮጵያ ሕዝብ በደስታ ከጎኖ እንደቆመ እርሶም ይገነዘባሉ:: ይህ ሁሉ ሲሆን ሰፊው የኢትዮጵያ ሕዝብ በእርሶ አምኖ ካለበት ድህነት ለመውጣት ከፍ ሲል እንደሰው : ዝቅ ከተባለም በኢትዮጵያዊነቱ እከበራለሁ ብሎ ሲተማመን : ዛሬ ኢትዮጵያ የአንድነትና የህብረት አገር መሆኗ ቀርቶ : የኦሮሞ ተራኛነት መናኸሪያ እንደሆነች ሲሰማው : እርሶ እንደአገር መሪ ምን ይሰሞታል? ይህ የተረኛነት ስሜት የሚንፀባረቀው በሰፊው ኦሮሞ ኢትዮጵያውያን ላይ ሳይሆን : በጥቂት ኤሊቶችና በመንግስት አስተዳደር ላይ የተሰገሰጉ ሰባዊነት የተሳናቸው ራስ ወዳድ : በሕዝብ ስቃይና ርሃብ እየተሳለቁ : የአገኙትን ሥልጣን የግል ሃብት ማከማቻ ያደረጉ : የኦፒዶ ጁንታዎች ነው:: በእርግጥም ይህ ምግባረ ብልሹነት በሁሉም ክልሎች አስተዴደሮች ውስጥም ይታያል:: ሆኖም የዛሬ ኦዴድ የትላንትናው ሕወሓትን የተካ ይመስላል:: በተቻለው መጠን ኦዴዶች ዛሬ ሌላውን ኢትዮጵያውያን አፍነው : ተቆጣጥረው : ጨቁነውና በድለው : ኢትዮጵያዊነትን አጥፍተው ወይም በሁለተኛ ደረጃ አስቀምጠው ኦሮሞነትን የበላይ ለማድረግ የሚጥሩ ይመስላል:: እርሶም በዚህ ድርጅት ውስጥ አድገው የድርጅቱን ዓላማ ተቀብለው መርተዋል:: የኢሐደግን መሪነትም ያገኙት ይህንን ድርጅት ወክለው እንደሆነ ይታወቃል::
ቲፒለፍ አዲስ አበባ ገብቶ ሥልጣን ሲወስድ እርሶ ገና የ15 ዓመት ልጅ ነበሩ:: እድገቶም በዚህ ሰውበላ ስርዓት ውስጥ መሆኑን የማይገነዘብ የለም:: ዛሬ ኢትዮጵያ ላለችበት ሁኔታ እርሶን እንደ ግለሰብ ተጠያቂ ማድረግ : 120 ሚልዮን የኢትዮጵያን ሕዝብ ተጠያቂ ማድረግ ነው:: ግን የመሪነትን ቦታ ሲይዙ በአገሪቱ አስተዳደር ውስጥ ከላይ ሹማማምንት እስከ ተራ ዘበኛ የመንግስት ሰራተኛ ለሚያሳየው ብልግናና የስነምግባር ብልሹነት እርሶ ተጠያቂ እንደሚሆኑ ይገነዘቡታል:: እንደሚታወቀው የኢሐደግ ስም በብልፅግና ተቀየረ እንጂ : የድርጅቶች አቋምና የጎሳ ፖለቲካው እንደነበረ ነው ቢባል ከሃቅ የራቀ አይሆንም:: በፊትም በኢሐደግ ውስጥ ጠባብ ጎሰኝነትንና ፅንፈኝነትን ሲያራምዱ የነበሩ የኢሐደግ አባሎች : ዛሬ በብልፅግና ስም የሚያካሄዱት ጠባብ ጎሰኝነትና : ጎጠኝነትና ፅንፈኝነት እንደበፊቱ ነው:: እርሶ ጠቅላይ ሚኒስቴር ሆነው ሲመረጡ ለመጀመሪያ ሁለት ዓመታት የጎሳው ፖለቲካ ትንሽ ገርበብ አለ እንጅ አልጠፋም ነበር:: አሁን ግን አሳሳቢ ደረጃ ላይ ደርሷል:: በቋንቋ ስም የተሰየሙ ክልሎች ለኢትዮጵያዊነት አደጋዎች ናቸው:: በተለይ የኦሮሞ ብልፅግና ፖርቲ (ኦዴድ) ለዚህ ለጠባብ ጎሰኝነት እሳት መባባስ ዘይት እያፈሰሰ ይገኛል::
የዛሬ ሶስት ዓመት ከአስራ አንድ ወሮች በፊት ሥልጣን ላይ ሲመጡ : በኢትዮጵያ ውስጥም ሆነ በውጭ የሚኖሩት ኢትዮጵያውያን : እርሶ በተናገሩት ዲስኩር ተደንቆ : ኢትዮጵያን ካለችበት ጨለማ ያወጧታል ብሎ የተማመነው ሕዝብ : ዛሬ ተስፋው እየዳሸቀ : በእርሶ ላይ የጣለውን እምነት እያጣ ይገኛል:: ዛሬ ሕዝቡ ምንያህል እምነት በእርሶ አስተዳደር ላይ አለህ ብሎ ቢጠየቅ (opinion poll) የዛሬ ሁለት ዓመት ከነበረው እምነት ቀንሶ ይገኛል:: ይህ ለምን ሆነ? ብለን ብንጠይቅ ሕዝቡ የጠበቀው የብልፅግና ጎህ ወደ ጨለማ እየተቀየረበት ስለመጣ ነው:: ማስረጃዎች:-
1. የኑሮ ውድነት ከቀን ወደ ቀን እየባሰበት እንጂ አልተሻለለትም:: የእርሶ አስተዳደር : ነጋዴዎች ተጠያቂነት ሳይሰማቸው ትርፋቸውን ለማሳደግ ሸቀጦችን በፈለጉት ዋጋ ሲሸጡ : መቆጣጠር የማይፈልግ ነው ብሎ ሕዝብ ያስባል:: እንዲያውም የእርሶ መንግስት ሹማምንቶች ከነጋዴዎች ጋር ተመሳጥረው በጉቦ ኪሳቸውን የሚሞሉ ሙሰኞች በመሆን ከሕወሓት ሹማምንቶች የባሱ እንጂ እንደማይሻሉ ሕዝብ ይገምታል::
2. የብልፅግና ፖርቲ ምርጫውን አሸንፎ ስልጣን ስትረከቡ : ሹማምንቶች ያላቸውን ንብረት ማሳወቅና ማስመዝገብ ይኖርባቸዋል ተብሎ ነበር:: ካላስመዘገቡ ደመዎዝ እንዳይከፈላቸውም ተወስኖ ነበር:: እስከዛሬ ድረስ ይህ ፍፃሜ ላይ እንዳልደረሰና ወሬ ሆኖ እንደቀረ ይታወቃል:: ለምን? የተባለው ሕዝብን ለመደለል ይመስላል:: ያገሬ ሰው ሲተርት : “የተናገርኩት ከሚጠፋ : የወለድኩት ይጥፋ” ይላል:: ለምንስ እርሶ ይህንን የተናገሩትን ውሳኔ ስራ ላይ እንዲውል አልገፉበትም? በአሁን ጊዜ ስልጣንን ተገን ያደረጉ በዝባዦችና ሌቦች ተቀያየሩ እንጂ ለሕዝብ የሚበጅ ለውጥ እንዳልመጣ ነው የኢትዮጵያ ሕዝብ የሚሰማው::
3. በኦሮሞ ክልል ውስጥ በተበላሸና በተዛባ የሗላቀርነት ምልክት በሆነ የጎሳ ፖለቲካዊ አስተዳደር : ኦሮምኛ የማይናገር ኢትዮጵያዊ በዚህ ክልል በመንግስት መስሪያ ቤቶች ለመቀጠርና ለመስራት እንደማይችል እየተነገረና ይህ የጎሳ ልዩነት በሰፊው እየታየ ነው:: በጣም የሚገርመው ሐኪሞች እንኳን ኦሮምኛ መቻል አለባቸው በመባል ኦሮምኛ የማይናገሩ ኢትዮጵያውያን ሐኪሞች እየተገለሉ ይገኛሉ:: ይህ ጠባብ ጎሰኝነት ኢትዮጵያዊነትን እንዴት ያጠናክራል ብለው እርሶ ያያሉ? ድህነት የበዛበትም ቢሆን በደጉ ዘመን ማለትም በንጉሥ ኃይለሥላሴ ጊዜ ወጥቼ በዲያስፖራ ለብዙ ዓመታት ኖርአለሁ:: እየኖርኩም ነው:: በዚያ ዘመን ጎሰኝነት ብዙም አይታይም ነበር:: ሕወሓት እንኳን ሌሎች ኢትዮጵያውያን በትግራይ ውስጥ ለመስራት ትግርኛ እወቁ አላለም ነበር:: የዛሬው የኦሮሞ ክልል አስተዳደር ይህንን ሌሎች ኢትዮጵያውያንን የማግለልና የመጨቆን እርምጃ ሲወስድ እንዴት ኢትዮጵያን አንድ አደርጋለሁ የሚል አስተዳደር ዝም ብሎ ያያል? ሕወሓት በኦሮሞ ብልፅግና (ኦዴድ) ፓርቲ እየተተካ ነው? ሌሎችም ጠባብ ጎሰኝነት ቢሰማቸው መደነቅ የለብንም:: ሁሉንም በእኩል ደረጃ አይተን ታዲያስ ለወላይታው : ለሀዲያው : ለከምባታ : ለጉራጌና ለተቀሩት ብሔሮችና ብሔረሰቦች በቋንቋቸው ክልሎች መሆን ለምን አይፈቀድላቸውም? የሚያሳዝነውና የሚያሳስበው ኢትዮጵያዊነትን በአፍና በድለላ አጎላናት እንጄ በድርጊት ተቃራኒ ነው:: ማለትም ኢትዮጵያዊነትን በግራ በቀኝ እያዳከምን መሆኑ ነው:: እርሶ የሚመሩትን ፖርቲ አባላት ከጠባብ ጎሰኝነት : ወገናዊነትና ተረኛነት ካላወጡት የኢትዮጵያን አንድነት ማስጠበቅና ኢትዮጵያዊነትን ከጎሳ በላይ ማድረግ ያስቸግራል:: ወደድንም ጠላንም ኢትዮጵያውያንን የሚያስተሳስር አንድ ቋንቋ አለን:: ይህም አማርኛ ነው:: መንግስት የአገር አስተዳደር ቋንቋ አማርኛ መሆኑን ክልሎች እንዲቀበሉ አቋም ካልወሰደ የኢትዮጵያን አንድነት ማጠናከር አይቻልም:: ማንኛውም ኢትዮጵያዊ ችሎታውና ዕውቀቱ እሰከፈቀደለት ድረስ የትኛውም ክልል ሄዶ ሰርቶ የመኖር መብቱ ካልተከበረና ካልተጠበቀ ኢትዮጵያን እንደ አገር ማቆየት የሚቻል አይመስለኝም::
4. ባለፉት 25 ዓመታት ውስጥ ብዙ ዩኒቨርሲቲዎችና ኮሌጆች ተከፍተዋል:: በዓመት ወደ 150,000 ሰዎች በዲግሪ ይመረቃሉ:: ሆኖም ለዚህ ሁሉ የሚሆን ስራ መስክ እንዳልተከፈተና ኡብዛኛው ምሩቆች ስራ አጦች ናቸው:: ይህንንም ኢትዮጵያ ባሉት ቤተሰቦቼ ውስጥ ታዝቤአለሁ:: ተመርቀው ስራ የሚቀጠሩት በችሎታቸው ተመዝነው ሳይሆን : በዘመድ ወይም ለቀጣሪዎች ጉቦ በመስጠት እንደሆነ በሰፊው ይነገራል:: እንዲያውም የዩኒቨርሲቲዎች አስተዳደሮች ዲግሪም ይሸጣሉ የሚልም ወሬ ይናፈሳል:: ይህ እውነት ከሆነ አሳፋሪና አገር ጎጂ ነው:: አዎን አገራችን በጥቂት ስግግቦች ስልጣን ጥማት ምክንያት የማያስፈልግ ጦርነት ውስጥ ተገዳ በመግባት ለልማትና ለብልፅግና መዋል ያለበት ገንዘብ ለጦርነት ማካሄጃ ውሎ እናያለን:: በዚህ እርሶን መወንጀል ተገቢም አይደለም:: ሆኖም ተመራቂዎች ለአገሪቱ ምርታማ የሚሆኑበትን እቅዶች መንደፍ አስፈላጊ ነው:: እንዲህ አይነት አግባብ ያልሆነ አሰራር ሲካሄድ ሰምቶና አዳምጦ ዝም ማለት ለስነምግባር ብልግና መዳበር አስተዋፅኦ ያደርጋል:: ለመንግስት መስርያ ቤቶች ቅጥርነት ከፖለቲካ : ከጎሰኝንትና ከወገናዊነት ነፃና ገለልተኛ የሆነ የተወዳዳሪዎችን እውቀት ; ችሎታና : ብቁነት የሚፈትን ደህናና ትክክለኛ የስራ ቅጥር ቦርድ ቢቋቋም ሰዎች ተወዳድረው በመቀጠር አድሎን ማስወገድ ይቻላል::
5. በአንደኛ ደረጃ ያስቀመጥኩት ማስረጃ ኢትዮጵያውያን በኑሮ ውድነት መጎሳቀልን የእርሶ መንግስት ቅድሚያ አለመስጠቱን ስጠቅስ : ልማት ላይ መሰራት ያለበትን ስራ በአግባብ አለማየት እንደሆነ እታዘባለሁ:: ይህም በየሚኒስትሩ የተሾሙት ሹማምንት መስሪያ ቤቱ ለቆመበት የአስተዳደር መስክ ተልእኮ ለማሳካት በሙያና በእውቀት የተካኑ ሳይሆን በፖለቲካ እምነታችውና ታማኝነታቸው የተመለመሉ ናችው የሚል አመለካከት አለኝ:: ለምሳሌ የእርሻ ሚኒስቴርን የሚመራ በእርሻና በእርሻ ልማት እውቀትና ችሎታ ያለው ሰው መሆን ይኖርበታል:: ሕዝብን ለመመገብ የምግብ እህሎችን በበቂ ደረጃ ማልማት ተገቢ ነው:: ይህንን ለማሳካት በእርሻ ምርምርና ጥናት የዳበረና የበለፀገ እውቀት ያላቸውን ማሳተፍና መሪ ማድረግ አስፈላጊ ነው:: ለምሳሌ ሰሞኑን በሸገር ኤፍኤም 102.1 ሬድዮ በአንድ ወይዘሮ መዓዛ አስተናጋጂነት ስለኢትዮጵያ ግብርና አንድ ዶ/ር ፀደቀ አባተ የተባሉ ምሁር የስጡትን ቃለጥይይቅ ሰምቼ : እንዴት እንዲህ አይነት ምሁርና አዋቂዎችን የኢትዮጵያ መንግስት መልምሎ ለልማት የእኝን አይነት ሰው ጭንቅላት መጠቀም አልፈለገም? የሚል ጥያቄ አሰብኩኝ:: እኝን ምሁር ካዳመጥኩ በሗላ ጉግል ሳደርግ በኮሎራዶ ስቴት ዩኒቨርስቲ ኤንቲሞለጅስት የሆኑ አንድ ዶ/ር አሰፋ ገብረአምላክ የሚባሉ : በሚኔሶታ ስቴት ውስጥ አግሪካልቸራል ኤክስቴንሽንስት የሆኑ አንድ ዶ/ር ንጋቱ ታደሰን የመሳሰሉ ምሁራን በብዛት እንዳሉና ቢጋበዙ በእውቀታቸውና በሙያቸው አገራቸውን መርዳት እንደሚችሉ ታየኝ:: ለማንኛውም ከላይ የጠቀስኩትን ቃለጥይይቅ ማንኛውም ሥልጣን ላይ የተቀመጠ ሁሉ ቢያዳምጠው እላለሁ:: እኝህን ጥልቅ ምርምር ያደረጉ አገር በቀልና በዲያስፖራ ያሉትን ሰፊ እውቀት ያላቸው ኢትዮጵያዊያንን በመጠቀም : ዛሬ ኢትዮጵያ ያለችበትን የምግብ እጥረት ወዲያውኑ ባያጠፋም : ለወደፊቱ በምግብ ራስ ቻይ እንድትሆን የሚረዳትን መንገዶች መቀየስ ይቻላል:: ከላይ የጠቀስኳቸውን አዋቂዎችንና መሰሎቻቸውን አሰባስቦ ማማከር ለአገር ይበጃል::
ክቡርነትዎ:- የኢትዮጵያ ችግሮች ብዙ ናቸው:: የእነዚህ ችግሮች መነሻና ምንጩ የእርሶ አስተዳደር ብዬ ነው ብወነጅል እውነትን መራቅና ኢፍትሀዊ መሆን ይሆንብኛል:: ችግሮቹ ለዘምናት ከአመት ወደአመት : ከአንድ መንግስት ወደ ቀጣዬ መንግስትና ከትውልድ ወደ ትውልድ እንደ ውርስ ንብረት የኢትዮጵያ ሕዝብ ሲቀባበላቸው የሰነበቱ ናቸው:: እነዚህን የማያቋርጡ ችግሮች እርሶና የእርሶ አስተዳደር ከሕዝቡ ጋር ወርሳችሗል:: አለመታደል ሆኖባት ኢትዮጵያ እንደ አገር : መንግስታት ሲቀያይሩ በጉልበትና በጦርነት : ያለፈው መንግስት ለቀጣዩ መንግስት የሚያወርሰው የበለጠ ችግርና ምስቅልቅል እንደሆነ ተደጋግሞ ታይቶባታል:: የእርሶም መንግስት እጣፋንታ የተሻለ አይደለም:: የተቀበሉት ችግር ወደር የለውም:: እንደዚያም ሆኖ ለማሻሻል የሚያደርጉት ታላቅ ጥረት ሊካድ አይቻልም::
አዎን በዚህ የለውጥ ሂደት የሚያደርጉትን ተቀብሎ ውጤታማ እንዲሆኑ በትግስት አብሮ ከእርሶ ጋር የሚጏዙ ብዙሃን አሉ:: በተቃራኒው በምንም አይነት መንገድና አቅጣጫ ጥረቶን ላለማየትና ላለመረዳት የተቻላቸውን ያህል ማንኛውንም የነቀፌታ ድንጋይ የሚያገላብጡ አሉታዊነት የወረራቸው ተቃዋሚዎችና ተሳዳቢዎች እንዳሉ ግልፅ ነው:: አሉታዊ መሆንና መቃወም ተገቢ ቢሆንም : ለሚቃወሙት ነገር አማራጭ መፍትሔዎች ማቅረብ ሲጠበቅ : የዘመናችን ተቀናቃኞችና ተቃዋሚዎች : ገንቢ ሃሳብ አቅርበው : ይህ ይሰራ : ይህ ይደረግ ማለት ሳይሆን : የስድብ ጋጋታ የሚያወርዱ : ፊታቸውን የማያሳዩ : ማንነታቸውን የሰወሩ : ጭንቅላተ አልባ የፌስቡክና የቲውተር አርበኞች ናቸው:: ከእነዚህ ጋር መከራከር ድንጋይ ላይ ውሃ ማፍሰስ ይሆናል:: ልንረዳቸውም ሊረዱም የማይቻሉ በጥላቻ የሚመሩ : ወገንተኞች : ጎሰኞች : ጎጠኞችና ፅንፈኞች ናችው:: ለዚህም ነው ለአንድነትና ለሰላም የማይጠቅሙ ትችቶች ሲያቀርቡ መልስ ሲሰጣችው እነዚህ ጠባቦች ለእድሜያችውና አለን ለሚሉት እውቀት የማይመጥን ውዳቂ ስድቦችን በፌስቡክና በቲዊተር ገፆቻቸው የሚለጥፉት:: በስድብ ሕዝብ አንድ አይሆንም:: የአቢይ ጫማ ላሺ በማለት የሃሳብ ልዩነት አይጣጣም:: በጠባብነት አገር አይገነባም:: ይህንን የማይረዱ ተቃዋሚዎች በበዛበት አገር እንዴት ልማት ሊሳካ ይችላል?
የተቃዋሚ ክፍል ይህንን የመሰለ ስነምግባር ብሉሹነት ቢያሳይም: ለማንኛውም ለአገሪቱ ውድቀት እንደ መሪ ተጠያቂነቶ ከጫንካዎ ሊውርድ አይችልም:: እንደ አንድ ሰው ማድረግ የሚችሉት እጅግ በጣም ትንሽ ቢሆንም እንደ መሪ አገሪቱ ሰላም ማጣት : የጠባብ ጎሰኞች ፅንፈኝነት : የሕዝብ ድህነትና የኑሮ ውድነት የሚያስወቅሰው አመራርን ስለሆነ እርሶም እንደ አገሪቱ መሪ ተወቃሽነቶን እንደሚቀበሉ ይታወቃል:: በአመራሮ ስርአት ውስጥ የሚጠበቅባችውን መልካም ስነምግባር የማያሳዩ : በተለይ በጠባብ ጎሰኝነት መርዝ የተመረዙ ፀረ-ኢትዮዽያን : በተረኝነት ስሜት የደነዙ ፅንፈኞች እስካሉ ድረስ : ዘረኝነትን ያልለበሱ ለአንድ ኢትዮጵያ የቆሙ ኢትዮጵያውያንና እርሶ የሚያስቧትና የሚመኟት አንድነት የሰፈነባትን ኢትዮጵያ ማሳካት አንሸራታች ጭቃማ ተራራ መውጣት ያህል ነው::
ስለዚህ በተለይ በኦሮሞ ብልፅግና ፓሪቲ ውስጥ ያሉትን : የስልጣንና የመዝረፍ ተረኝነት በመሰማት : ደረታችውን ነፍተው ኢትዮጵያን የኦሮሞ ጠባብ ጎሰኞችና ፅንፈኞች መጨፈሪያ ማድረግ የሚያልሙት ፖለቲከኞች ከግብዝነታችው ተቆጥበው : ኦሮሞ ኢትዮጵያውያን አያቶቻቸው በደማቸውና በአጥንታችው ልዑላዊነቷንና አንድነቷን ያስጠበቁላትን አገር : የሁሉም ኢትዮጵያውያን የጋራ አገር መሆኗን እንዲገነዘቡ ካላደረጉ : ይህ በጠባብ ጎሰኝነት በኢትዮጵያ ላይ የሚያንዣብበው ችግር ለእርሶ አመራር ስኬታማነትና ለአገሪቱ ደህንነት እጅግ አደገኛ እንቅፋት ነው:: ይህንን ስሎት : ሌሎችም ጠባብ ጎሰኞችና ፅንፈኞች በአሁኑ ሰዓት የሉም ማለት አይደለም:: ከእያንዳንዱ የኢትዮጵያ ጎሳ : ይህንን ውዳቂ ጠባብነት የሚያራምዱና የሚያቀነቅኑ እንዳሉ ሚስጥር አይደለም:: ግን አገርንና ሕዝብን የሚጎዳው : መላው የኢትዮጵያ ሕዝብ ታግሎና መስዋእትነት ከፍሎ ያመጣውን ለውጥ : የኢትዮጵያ ሕዝብ የጋራ ውጤት መሆኑን ረስቶ : በእንድ ጎሳና በእንድ የፖለቲካ ቡድን የተገኘ የሚያስመስለው ዘረኛ ጥርቅም ነው:: ሕወሓት የሰራውን ስህተት : የኦሮሞ ብልፅግና ፓርቲ ሊደግመው ሲሞክር ማየት ኢትዮጵያ በልጆቿ አለመታደሏን ያሳያል:: አውሮፓውያን አገሮች የእንድነትንና የህብረትን ዋጋና ጠቄሜታ በመረዳት አንድ ሲሆኑ : ሕዝቡን ከልመና ስንዴ ያላወጣ ህብረተሰብ ስለጎሳ ነፃነት : ስለባንዲራና ስለክልል ሲያወራ : ይህን የሚያራምዱ መሪዎች ምን ያህል ደንቆሮና ደደቦች እንደሆኑ ያስጠይቃል::
ክቡርነትዎ : ጁላይ 2018 ከምኖርበት ስቴት 6 ሰዓት ነጅቼ ሚኔሶታ ስቴት በተደረገው የእርሶና የአቶ ለማ መገርሳ አቀባበል ላይ ስሳተፍ : በታርጌት ሴንተር ስታድየም ውስጥ በአንድ ጀዋር መሐመድ መሪነት የኦኔግ ደጋፊዎች አይና እውጣ ድርጊት ያሳየኝ : ከኢትዮጵያዊነትና ከኢትዮጲያ ባንዲራ ይልቅ : ኦሮሞንነትና የኦኔግ ባንዲራ የበላይነት ውዥንብር ነበር:: የኦሮሞ ጠባብ ጎሰኞች ማለትም የኦኔግ ደጋፊዎች በኢትዮጵያና በአረንጓዴ ቢጫና ቀይ ባንድራችን ላይ ያሳዩት ቁሻሻ ባህርይን ርሶም የታዘቡት ይመስለኛል:: እንደሰማሁትም : በምሽቱ በአሜሪካ ሞል ሆቴል ውስጥ በተደረገው ራት ግብዣ : ከክብር እንግዶች ጠረዼዛ ዙሪያ ከኦኔግ ደግፊዎችና ጠባብ የኦሮሞ ጎሰኞች በስተቀር : ከሌላ የኢትዮዽያ ጎሳዎች ከእርሶና ከአቶ ለማ መግርሳና ከተቀሩት አጃቢዎቻችሁ ጋር የተገናኘ የለም:: መረሳት የሌለበት የኢትዮጵያ መንግስት ወጭዋችሁን ሲከፍል : ገንዘቡ ከኦኔግ ደጋፊዎችና ከኦሮሞ ጠባብ ጎሰኞች ኪስ የወጣ ሳይሆን : የመላው ኢትዮጵያ ገንዘብ ነበር:: የአገሬ ሰው ሲተርት “የወጋ ቢረሳ : የተወጋ አይረሳም::” ይላል:: ያ በደል በልባችን ውስጥ ቢኖርም : ዛሬ የሚታየው ያንድ ጎሳ የበላይነት ጥረት በጣም ያስደነግጣል:: ያሳፍራል::
ሆኖም ላለፉት ሶስት አመታት ከአስራ አንድ ወር ጠቅላይ ሚኒስቴር ከሆኑበት ጊዜ ጀምሮ : በለውጥ ሐዋሪያነቶ በመተማመን እየደገፍኮት እገኛለሁ:: በአንዳንድ የቲውተር መልእክቶች ላይ : ስለእርሶ ስከራከርና ስከላከል : የአቢይ ጫማ ላሽ ነሽ እየተባልኩ ተተቲቻለሁ:: ፍርፋሪ ለቃቃሚ ተብዬ ተሰድቢያለሁ:: የሚገርመው እነዚህ ተሳዳቢዎች የት እንደምኖር እንኳ ሳያውቁ ነው የስድብ ቃላት ለመፃፍ ጣታቸውን የፊደል ቁልፎች ላይ ያሳረፉት:: ኢትዮጵያንም ካየሗት ከ15 አመት በላይ ነው:: ታዲያ እንዴት አድርጌ ነው የእርሶን ጫማ የምስመው ወይም ፍርፋሪ የምለቅመው? ለአገር ግንባታ : ለሕዝብ አንድነት የሚጠቅም ሃሳቦችና አጥጋቢና አሳማኝ መከራከሪያ ነጥቦች የሌላቸው ምርጫቸው ስድብ መሆኑን በማሳየት ዶማነታቸውን ያስመሰክራሉ::
እነዚህን በጠራራ ፀሃይ ብርሃን ጨለማ የሚያዪትን አይናማ ስውሮችን ትቼ እርሶን የምጠይቀው : ስልጣን ሲረከቡ በኢትዮጵያዊነቶ እንጂ በኦሮሞነት ስላልሆነ : አደራም የሰጦት መላው የኢትዮጵያ ሕዝብ እንጅ የኦሮሞ ክልል ኢትዮጵያውያን ባለመሆኑ : በአስተዳደሮ ዙሪያ ያለውን አደገኛ ጠባብ ጎሰኝነትና ፅንፈኝነትን : ዶማን ዶማ : አካፋን አካፋ ብለው በማስወገድ : ግራ የተጋባውንና እምነት እያጣ ያለውን የኢትዮጵያ ሕዝብ ተስፋ እንዲሰማው እንዲያደርጉ ነው:: የኢትዮጵያን ሰፊ ሕዝብ የልብ ትርታ ካዳመጡ ሕዝቡ አቅፎት የምንመኛትን ሰላም የሰፈነባት : ሕዝብ ተደምሮ አንድ የሆነባት : ለምታ ሕዝቦቿ የሚጠግቡባትና የአፊሪካ ተምሳሌት የምትሆነውን ኢትዮጵያ መገንባት ይቻላል:: ይቻላል!!
ጠባብ ጎሰኝነትና ፅንፈኝነት ይወድማሉ:: ኢትዮጵያና ኢትዮጵያዊነት ያብባሉ::
