ግድፈቶችን በውስጣዊ ሥርዓት በማረምና አንድነታችንን በመጠበቅ ዲሞክራሲያዊት ኢትዮጵያን በመገንባት ሂደት ኢዜማዊ ማህትማችንን ማሳረፋችንን እንቀጥላልን!

ሀገራችን ኢትዮጵያ እጅግ በተወሳሰቡ ፖለቲካዊ፣ ማኅበራዊና ኢኮኖሚያዊ ችግሮች ውስጥ እያለፈች ትገኛለች፡፡ እኛም ዘመኑን የሚዋጅ፣ ወቅቱን ያገናዘበ፣ የሀገርን እና የህዝብን ጥቅም ያስቀደመ ሥራ መስራት ከምንጊዜውም በላይ ተቀዳሚ ተግባር መሆኑን እናምናለን፤ ፓርቲያችን ሀገራችን በምትፈልገው የኃላፊነት ልክ ዝግጁ እና ብቁ ሆኖ መገኘቱን በየጊዜው እየገመገምን መልካሙን እያጠናከርን ጉድለቶችን እየሞላን መጓዝን አጽንዖት ሰጥተን የምንተገብረው ጉዳይ መሆኑንም እንረዳለን።

የኢዜማ አባላት እና ደጋፊዎች እንደሚተጉትና እንደልፋታቸው፤ የሀገሪቱን ፖለቲካ በቅጡ የሚረዳ፣ ጠንካራ መዋቅራዊ ቁመና ያለው፣ አባላት እና አመራሩ ለስርዓት እና ድርጅቱ ላወጣቸው መርሆች ተገዢ የሆኑለት ድርጅት መሆኑን በየጊዜው መከታተል እና ጉድለቶች ሲኖሩ ማረም ድርጅታዊ ባህሉ እንዲሆን የሚተጋ አመራር ያለው ፓርቲ ነው፡፡ በአባላት፣ ደጋፊዎች እና በህዝባቸን የተጣለብንን ኃላፊነት ፓርቲያችንን የበለጠ ጠንካራ ቁመናና አፈጻጸም ያለው በማድረግ ልንወጣ ይገባናል፡፡ ከዚህ አንፃር የኢትዮጵያ ዜጎች ለማኅበራዊ ፍትህ (#ኢዜማ) ብሔራዊ ስራ አስፈፃሚ ኮሚቴ ሰሞኑን በድርጅቱ ከፍተኛ አመራሮች ጭምር ሲደረጉ የነበሩ የማኅበራዊ ሚዲያ ምልልሶችን ጥር 25 ቀን፣ 2014 ዓ/ም ባደረገው ስብሰባ በሰፊው ተመልክቶ ተወያይቷል፡፡

የብሔራዊ ስራ አስፈፃሚ ኮሚቴው፣በሀገር ደረጃ አንድ ፓርቲ መልካም የሆነ ስርዓትን በማስፈን ሂደት ውስጥ በጎ ተፅዕኖ የሚኖረው በውስጥ አሰራሩ የፓርቲን ዲሲፕሊን የተለማመዱና ለፓርቲው ደንብ የሚገዙ አመራሮችን ያቀፈ ፓርቲ ሲሆን ነው ብሎ ያምናል፡፡ ወደተሻለ ነገ ለመድረስ ዛሬ ላይ የሚፈጠሩ ግድፈቶችን ማረምና ጉብጠቶችን ማቃናት እንደዚሁም ጥፋቶችን ማስተካከል እጅጉን አስፈላጊ እንደሆነ መግባባት ላይ በመድረስ የኢዜማ ከፍተኛ አመራሮች የፓርቲውን በርካታ የመወያያ መድረኮችና ስርዓታዊ አካሄዶች ተራምደው በማኅበራዊ ሚዲያ ተገቢ ያልሆኑ የሃሳብ ልውውጦችን ማድረጋቸው ስህተት እና የዲሲፕሊን ግድፈት መሆኑን በሙሉ ድምፅ ተስማምቷል፡፡ በመሆኑም ለፓርቲው የህገ-ደንብ ትርጉምና ዲስፕሊን ኮሚቴ የሚቀርበውን ሰነድ ለማጠናቀር አጣሪ ኮሚቴ የተዋቀረ ሲሆን ተፈፀሙ የተባሉ የስነ-ስርዓአት ግድፈቶችን አጠናቅሮ በአንድ ሳምንት ጊዜ ውስጥ ለስራ አስፈፃሚ ኮሚቴ ሪፖርት እንዲያደርግ ወስኗል፡፡

ከምርጫ ወረዳዎች እስከ ማዕከል ባለው የኢዜማ አደረጃጀት የተዋቀሩ የህገ-ደንብ ትርጉምና ዲስፕሊን ኮሚቴዎች የፓርቲውን መተዳደሪያ ደንብና የዲስፕሊን መመሪያዎችን በማያከብሩ አመራርና አባላት ላይ ጥብቅ ክትትል እያደረጉ የእርምት እርምጃ እንዲወስዱ ውሳኔ ተላለፏል፡፡

ከዚህ ጋር ተያይዞ በኢዜማ ሥም በተከፈቱና የኢዜማ የሕዝብ ግንኙነት እንዲሁም ሌሎች መምሪያዎች የማያስተዳድሯቸው ኢዜማን የማይመጥኑ፣ ለፀብና አምባጓሮ መጠንሰሻ የሆኑ የተለያዩ የማኅበራዊ ትስስር ገፆችን ከሚያስተዳድሯቸው አባላት ጋር በመነጋገር በፍጥነት የእርምት እርምጃ እንደሚወሰድ እያሳወቅን ለዚህም ስራ የትስስር ገፆችን የሚያስተዳድሩ አካላት ለሕዝብ ግንኙነት መምሪያው ትብብር እንዲያደርጉ እናሳስባለን፡፡

ሀሳብን በነፃነት የመግለፅ መብትን በከፍተኛ ሁኔታ የምንደግፈውና የምንታገልለት ወደፊትም ሰፋፊ መድረኮችን በማዘጋጀት የምናዳብረው ቢሆንም ባልተገራ፣ ስነ-ምግባር በሌለውና የፓርቲውን አሰራር ባልጠበቀ መንገድ የሚደረግ የትኛውም አይነት ምልልስ ኢዜማን ለማጠንከር ዘለግ ሲልም የኢትዮጵያችንን ችግሮች ለመፍታት የሚጨምረው ቅንጣት ታህል አስተዋጽዖ ካለመኖሩም በላይ አብሮና ተከባብሮ የመስራት ባህላችንን በመሸርሸር፣ጉዟችንን ረጅም፣ውስብስብ እና አድካሚ ያደርግብናል፡፡

ዛሬም ኢዜማ የትኞቹንም አይነት ልዩነቶች በዲሞክራሲያዊ የውይይት ስርዓት እየፈታ እንደ አለት እየጠነከረ ለአባላትና ደጋፊዎቹ ኩራት ለሀገራችን ኢትዮጵያም ተስፋ እንደሆነ በፅናት ይቀጥላል፡፡

የኢትዮጵያ ዜጎች ለማኅበራዊ ፍትህ (#ኢዜማ)

ብሔራዊ ስራ አስፈፃሚ ኮሚቴ

ጥር 26 ቀን፣2014 ዓ.ም

አዲሰ አበባ