ይድረስ ለክቡር ጠቅላይሚር አብይ አህመድና የማያልፍ ታሪክ ሠርተው ማለፍ ለሚሹ ጓደኞችዎ (ሰዉነት ደሃብ ከሃገረ ስዊድን)

አብይ ተሰማራ – – – አብይ ተሰማራ
እንደ አብርሃም ሊንከን – – – እንደ ቼጉቬራ
ከገፊዎች ሳይሆን – – – ከተገፉት ጋራ
ሊገፉም ከታጩት – – – ያገር ልጆች ጎራ
ካፍንጫ ሥር ሳይሆን ሩቅ ከሚያልሙ – – – ቀና ልብ ያላቸው ጥቂት ጓዶች ጋራ

ለዚህ ጽሁፍ መነሻ የሆነኝ በአሁኑ ወቅት ሃገራችን የገባችበት ሲያዩት ቀላል የሚመስል ነገርግን እጅግ አደገኛ አጣብቂኝ ነው :: አሁን ያለንበት አጣብቂኝ አንድ በሥልጣን ላይ ያለ አካል ከሚያጋጥሙት ዕድሎች አንጻር ከታየ በጣም በተወሰነ ደረጃ ከ 1997 ምርጫ ማግስት ጋራ ሊመሳሰል የሚችል ነው :: ከሚያመጣው አደጋ አንጻር ካየነው ግን የአሁኑ እጅግ በብዙ እጥፍ የከፋና ምናልባትም የአመራር መሪዉን ያያዛችሁት ሠዎች በተቻለ ፍጥነት እና ድፍረት የመሃሉን መንገድ ካልመረጣችሁ በሃገራችን ብቻ ሳይሆን በዓለም ታሪክ ታላቅ ጠባሳ ጥላችሁ እንደ ምታልፉ ግልጽ እየሆነ በመምጣቱ ነው :: ምክንያቱም ግራዉም ሆነ ቀኙ ገደል የሆነበት መንገድ ላይ ስላላችሁ ነው ::

በ 1997 ጠቅላይ ሚኒስትር መለስ ዜናዊ በምርጫው ማግስት በፍጥነትና በድፍረት መወሰን ቢችሉና በወቅቱ ስልጣኑን የማስረከብ ድፍረት ቢያጡ እንኳን ተፎካካሪ ፓርቲዎች ባቀረቡት የመደራደርያ ነጥቦች ለመስማማት ደፍረዉ ቀጣዩን ምርጫ ሠላማዊና ዲሞክራሲያዊ ለማድረግ መወሰን ችለዉ ቢሆን ኖሮ ዛሬ ላለንበት ቀዉስ አንደርስም ነበር ብዬ አምናለሁ :: ያንን አድርገዉ ቢሆን የሃገራችንን የፖለቲካ ምዕራፍ ቀያሪ መሆን ብቻ ሳይሆን በቅድሚያ እሳቸዉና ቤተሰቦቻቸዉ፣ ቀጥሎ ዘመድ አዝማዶቻቸዉ፣ ከዚያም አልፎ ፓርቲያቸዉና ጓዶቻቸው፣ ከፍ ሲልም ሃገራቸዉ ማለትም እኛ ዜጎቹ አንገታችንን ከፍ አድርገን እንድንሄድ የማድረግ ወርቃማ እድል ነበራቸው :: ነገር ግን ያንን እድል በማበላሸታቸው ከዚያ በጣም ወደ ከፋ አረንቋ እንድንገባ ሆነናል ::

በያንዳንዳችን የህይወት ምዕራፍ ዉስጥ ታሪክ እራሱ የየራሳችንን አሳዛኝ ወይም መልካም የታሪክ አሻራ እናኖር ዘንድ እጅግ ወሳኝ ዕድል በእጃችን ላይ ያስቀምጣል :: እኛም ታድያ በእጃችን ላይ ያለዉን እድል በተቻለ ፍጥነት እና ድፍረት በመወሰን መልካም የታሪክ አሻራ ለማኖር ካልተጠቀምንበት ታሪካችንን በአሳዛኝ ምዕራፍ ለመደምደም እንደተስማማን ይቆጠራል :: ክፋቱ ደግሞ ታሪክ ተመሳሳይ እድል የማይሰጥ መሆኑ ነው :: አንዴ ካመለጠ አመለጠ ነዉና :: ልክ እንደ ጠቅላይ ሚኒስትር መለስ ዜናዊ የታሪክ እድል ማለት ነው ::

እዚህ ጋር መታወስ ያለበት ፍሬ ጉዳይ ቢኖር በመግቢየዬ ላይ ለማሳሰብ እንደሞከርኩትና በታሪክ እንደምናዉቀውም ዘመዶቻቸዉ ከሚፈጽሙት ኢሠብዓዊ ድርጊት ጎን ሳይሆን ከተጨቆኑት ጥቁሮች ጎን በመቆም የተሰጣቸዉን የታሪክ እድል ሳያባክኑ በአግባቡ ለመጠቀም በፍጥነትና በድፍረት መወሰን በመቻላቸው መልካም አሻራቸዉን እዳኖሩት እንደ አሜሪካዊዉ ፕሬዚደንት ልክ እንደ አብርሃም ሊንከንና ጓዶቻቸው አሊያም እንደ ቦሊቪያዉ የነጻነት ታጋይ እንደ ቼጉቬራ ሁሉ ከአግላዮች ወይም ከሃሰት ጎን ሳይሆን ከእዉነትጋር መቆም ያለባችሁግዜ ላይ እንዳላችሁ ይሰማኛል :: በመሆኑም በእጃችሁ ላይ ያለዉን የታሪክ ዕድል በአግባቡና በወቅቱ በመጠቀም መልካም የታሪክ አሻራ ለማኖር በፍጥነትና በድፍረት ለመወሰን ግዜ ባታባክኑ ይመረጣል ::

እንደ መልዕክቴ መቋጫ ወይንም እንደ መዉጫ በፍጥነትና በድፍረት ሊወሰኑ የሚገባቸዉን በሚመለከት የሚከተሉትን የመፍትሄ ሃሳቦች ለመሰንዘር ወደድኩ :: የመፍትሄ ሃሳቦቹን እኔ ጠቅለልና አጠር ባለ መልክ ላቅርባቸው እንጂ ከሞላ ጎደል በተበጣጠሰ መንገድም ቢሆን በተለያየ መንገድና በተለያዩ መድረኮች የሃገራችን ልሂቃን ሲያነሷቸዉ የነበሩ መሆናቸዉን ላሰምርበት እወዳለሁ :: ልዩነቱ ሃገራችን አሁን ላለችበት እጅግ አደገኛ አጣብቂኝ በእኔ አረዳድ ትክክለኛ መፍትሄ በትክክለኛዉ ሰዓት ሆነዉ ስለታዩኝ ነዉ :: እስካሁንም ሃሳቦቹ ጆሮ ያላገኙት በትክክለኛ ወቅት ስላልቀረቡ ይሆናል ብዬ ሳላመንኩኝም ጭምር ::

የመፍትሄ ሃሳቦች

1ኛ/ በሃገራችን እንደ ፖለቲካ ፓርቲ በዘር ወይንም በሃይማኖት የመደራጀት መብትን በህግ መገከልከል

ምክንያቱም

በአንድ በኩል የዚህን መብት አሉታዊ ዉጤት በርስዎ የስልጣን ዘመን እንኳን በተደጋጋሚ አይተነዋል
ከዚያ ባለፈምም ከዚህ በኋላ የሚመጣው የመብቱ ዉቴት ደግሞ እንደ ሃገር ሳያጠፋን ለመመለሱ ምንም ዓይነት ዋስትና የለንምና

2ኛ/ ፌዴራሊዝምን ወይንም የህዝብን ራሱን በራስ የማስተዳደር መብት እንዲሁም ባህልንና ቋንቋን
የማሳደግ መብትን በማይጎዳ መልኩ አሁን ያለዉን የአስተዳደር ወሰን ወይንም የክልል አደረጃጀት
ማሻሻል

ለምሳሌ ኦሮሚያና አማራ ልክ እንደ ደቡብ ሁሉ ሰፋፊ ክልሎች ናቸዉ :: ስለዚህ የኦሮሚያንና የአማራን የክልል ወሰን ማሻሻል ይህም ማለት ወለጋን ራሱን የቻለ ክልል፣ አርሲን ራሱን የቻለ ክልል፣ ጅማን፣ ጎጃምን፣ ሸዋን፣ ወሎን፣ ጎንደርን እያልን የሁሉንም ህዝብ ጥቅም በሚያስጠብቅ መልኩ የህዝብ ብዛትን፣ ለአስተዳደር ወሰኑ ያለ ቅርበትን፣ ወዘተረፈ ባካተተተና በባለሞያዎች በተጠና እንዲሁም የሊሎች ተመሳሳይነት ያላቸዉ ሃገሮችን መልካም ተሞክሮ ከግምት ባስገባ መንገድ ተግባራዊ ለማድረግ ይቻላል፣ ይገባልም::

ምክንያቱም በዚህ የሚጎዳ ህዝብ ደግሞ አይኖርም :: ካለም የግል ጥቅም የሚያጡ ግለሰቦች ወይንም ቡድኖች ናቸዉና ::

ለምሳሌ ይህ በመደረጉ የወለጋ ህዝብ በተሻለ መልኩ ራሱን በራሱ የማስተዳደርና የኔ የሚላቸዉን ዕሴቶች የማጎልበት ዕድል ይኖረው ይሆናል እንጂ የሚከለክለዉ ነገር ስለማይኖር :: የሌላዉም ህዝብ እንዲሁ ::

3ኛ/ ብዙሃን በሚኖሩበት ክልል ዉስጥ የሚኖሩ አነስተኛ ቁጥር ያላቸው ሌሎች የህብረተሰብ ክፍል አባላት
መብትን እንደዜጋ በተገቢዉ መንገድ ለማክበር እና ለማስከበር የሚያስችል ጠንካራ ህግ ማዉጣት::

ብዙሃኖች ባህልና ቋንቋቸዉን ለማሳደግ በሚሄዱበት ርቀት የህዳጣንን ወይንም አነስተኛ ቁጥር ያላቸው ሌሎች የህብረተሰብ ክፍል አባላትን መብት እንዳይጨፈልቁ ማድረግ ይቻላል:: ምክንያቱም በሃገሪቱ ብዙሃን በሚኖሩበት የተለያዩ የአስተዳደር ወሰኖች ወይንም ክልሎች ዉስጥ የሚኖሩ አነስተኛ ቁጥር ያላቸው ሌሎች የህብረተሰብ ክፍል አባላት በከፍተኛ ሁኔታ ሰለባ እየሆኑ ሲሆን ይህንን በማድረግ እንደ ዜጋ የመኖር፣ ሃብት የማፍራትና ሰብዓዊና ዴሞክራሲያዊ መብታቸው ሊከበርላቸዉ ይችላል፣ ይገባልም::

ለምሳሌ ድሬዳዋ ዉስጥ ያሉ የሁሉንም ህዝቦች መብት በተገቢዉ መንገድ ሊያስከብር የሚያስችል የህግ ማዕቀፍ ማበጀት :: በሌሎቹም የአስተዳደርወሰኖች ወይንም ክልሎች ዉስጥ ለሚኖሩ አነስተኛ ቁጥር ያላቸው ሌሎች የህብረተሰብ ክፍል አባላትም እንዲሁ ::

4ኛ/ የክልል ልዩ ሃይል አባላት በሚል ስያሜ በየክልሉ እየተሰጡ ያሉ ስልጠናዎችን ማስቆም ብቻ ሳይሆን
ከዚህ ቀደም የሰለጠኑትንም ቢሆን በመንግስትም ሆነ በህዝብ ላይ አደጋ በማያስከትልና ዉጤታማ
በሚያደርግ መንገድ እንደገና ማደራጀት

ምክንያቱም

እነዚህ አካላት አሁን ባላቸዉ አደረጃጀት ወደፊት በህዝብና መንግስት ላይ ሊከሰት የሚችለዉን አደጋ በማባባስና በማፋጠን ረገድ የበኩላቸዉን ሚና ለመጫወት የሚችሉበት ዕድል ሰፊ ነው:: ስለሆነም በትኩረት ሊታሰብበት ይገባል ::

በመሆኑም እነዚህንና ሌሎች ወሳኝ ሊባሉ የሚችሉ አፍንጫ ሥር ሳይሆን ሩቅ የሚያልሙ ግቦችን ለማሳካት በርስዎና በጓዶችዎ በኩል ርምጃዎችን ለመዉሰድ በፍጥነትና በድፍረት መወሰን የምርጫ ጉዳይ አይደለም :: በዚሁ መሠረት መወሰን ከቻላችሁ የሃገራችንን የፖለቲካ ምዕራፍ ቀያሪ መሆን ብቻ ሳይሆን በቅድሚያ እራሳችሁንና ቤተሰቦቻችሁን፣ ቀጥሎ ዘመድ አዝማዶቻችሁን፣ ከዚያም አልፎ ፓርቲያችሁንና አባሎቻችሁን፣ ከፍ ሲልም ሃገራቸሁን ማለትም እኛን የሃገሪቷን ዜጎች አንገታችንን ከፍ አድርገን እንድንሄድ የማድረግ ወርቃማ እድል ምናልባትም የመጨረሻ እድል እንዳላችሁ ይሰማኛል :: በርግጥ ቀላል አይደለም :: ምክንያቱም አሁን ያልገባቸዉና አፍናጫቸዉ ሥር ብቻ የሚያስቡ ብዙዎች ሊቃወሟችሁና ዉጉዝ ከመ አሪዎስ ሊሏችሁ ይችላሉና :: ሆኖም ግን ልክ እንደ አብርሃም ሊንከንና ሌሎች የአለማችን የታሪክ ፈርጦች ሁሉ ለወጀቡ ሳትንበረከኩ ወደፊት ከተጓዛችሁ የናንተ ብቻ ሳይሆን የኛም የልጅ ልጆች፣ ከዚያም አልፎ የሌሎች ሃገር ሰዎችም የልጅ ልጆች ሃዉልታችሁ ሥር ፎቶ ለመነሳት የሚሽቀዳደሙባችሁ ባለ የመልካም ታሪክ አሻራ ባለቤቶች እንደምትሆኑ ዕምነቴ የጸና ነው :: ማለትም በፍጥነትና በድፍረት መወሰን ከቻላችሁ :: አይ ብላችሁ ፈራ ተባ ስትሉ ፊታችን የተጋረጠዉ አደጋ እናንተን ከቀደማችሁ ወይንም ደግሞ አፍንጫችሁ ሥር ብቻ ማሰብ ከመረጣችሁ የሃገሪቱን ዕጣ ፈንታ ብቻ ሳይሆን የስከዛሬ ታሪካችሁንም በዜሮ እንደማጣፋት ይቆጠራል :: ምክንያቱም የታሪክ ዕድላችሁን በማበላሸታችሁ በተለየዩ ወቅቶች በተለያዩ ሃገራት አሊያም አሁን በቅርብ እንኳን በኛዉ ሃገር እንደተከሰተዉና እንደተመለከትነዉ ሁሉ ሃዉልታችሁ በቀጣዩ ባለተራ የሚፈርስና መሬት ላይ የሚጎተት፣ የገነባችሁት ሁሉ የሚናድ፣ የጻፋችሁት ሁሉ የሚቀደድ ከመሆን አይድንም :: ከናንተ የቀደሙቱ የነበራቸዉን እድል በማበላሸታቸው የራሳቸዉን እድል ከማበላሸት አልፈዉ አሁን ወደ አለንበት ከዚያ በጣም የከፋ አረንቋ ዉስጥ እንድንወድቅ አድርገዉናል::

እኔ አበቃሁ