ሀገሬ ናፈቀኝ / ከግርማ ቢረጋ

ሃገሬ ናፈቀኝ ወንዟ ሸንተረሯ

ናፈቀኝ ሃገሬ ነፃነቷ ክብሯ

ትዝታ ኑሮዋ ባህል ቁም ነገሯ ።

ያሳለፍኩት ሁሉ እየመጣ በእውኔ

እንቅልፌንም ነሳኝ ተሰማኝ ኩነኔ ።

መንደሬ ሰፈሬ አስፋልት ኮረኮንጁ

ቂማውና ጨብሲው > ጠላውና ጠጁ ።

ከረንቦላው ኳሱ ድራፍት ካቲካላው

ብትለው ብትጠጣው ሆድን የማይሞላው።

ጣፋጭ ትዝታዋ ሃገሬ ናፈቀኝ

እራቀኝ ሄደብኝ ከቶውን ላይገኝ ።

ከቤላ ፈረንሳይ ስድስት ኪሎ ሄጄ

ጭንቀት ሳይኖርብኝ ሽቅብ ታች ወርጄ።

የኖርኩበት ዘመን ላይገኝ መልሶ

ሊታለፍ የማይችል ፍፁም ተደባብሶ ።

ሃገሬ ናፈቀኝ ሰላምሽ ትዝታሽ

ቀድሞ የነበረው ወዘና ቁመናሽ ።

ከቶ ይናፍቀኛል እንዴት ልሁን ታዲያ

አልፈልግም ልትሆኝ ብቻ መቀበሪያ ።

ስደት የተባለ ወረርሽኝ ውጦኝ

ከሰፈር ቀበሌ ከጓደኛ አርቆኝ ።

ሃገሬ ናፈቀኝ ሆድ ባሰኝ ዘንድሮ

የማይወጣ ነገር ልቤ ውስጥ ተቀብሮ ።

ጭራሽ አይረሳም ፈረንሣይም ቤላ

ፍቅር የሞላበት ያደግኩበት ሁላ ።

ዜሮ አምስት ውቅያኖስ ቀጭ ቀጭ ሃሰን ሱቅ

በቡዜ ቀብራራው የነበረንን ሳቅ

እንዴትስ ይረሳል ለምንስ አይናፍቅ ።

ጃልሜዳ ወጥቼ ቅሜ ተጫውቼ

ጨፋናው ቴዲዬን ሃረሩን አግኝቼ

በቁኮ እና ለጌ ሻለቃን አውርቼ ።

የሽፌ ጨዋታ ጌቾ ትህትናው

የፈረንጅ አፉ የቋንቋ ችሎታው

ወልድዬ ወላሞ ነብስህን ይማረው ።

ሳቅና ጨዋታው ተካፍሎ መብላቱ

ትዝ አለኝ ሃገሬ ትዝ አለኝ የጥንቱ

ሃገሬ ናፍቆቱ ሃገሬ ስስቱ

ርቆ የሄደን  ሰው ወይ  ማሰቃየቱ ።

ጃልሜዳ አራት ኪሎ ቶታል ስድስት ኪሎው

የነ አይሰጬ ፈድሉ ሺሰማ ትዝታው

የጊቢው ተማሪ መጥተው ተኮልኩለው ።

ጠረባ ትረባው በአረንጓዴ ምላስ

ያ ጊዜ ተገኝቶ ምነው ባይበላስ ።

ለመርሳት ብሞክር ዜሮ አምስትን ከልቤ

ጃልሜዳ ጉልትን ላወጣው ከቀልቤ

አልሆንልህ አለኝ መጣ በምናቤ ።

ነበረኝ ብዙ ሙድ መገናኝ ገርጂ

ብዙ የሚናፍቀኝ የኖርኩበት ደጅ ።

ጉለሌ ጋሽ መጋል ወርቁ ሸክላ ሄጄ

ጳውሎስን አልፌ ኳስ ሜዳ ወርጄ ።

ኢዲዩን ጎብኝቼ ስሄድ ዳትሰን ሰፈር

የክትፎውን ጣባ ዮሃንስ ስንሰብር ።

በቅዳሜ  ጠዋት ሾሌ ነጭ ጠላ በዞረ ጢንቢራ

ጨጓራው ተበልቶ ደልቶን ስናጓራ

ሃገሬ ናፈቀኝ የአራት ኪሎ ቢራ ።

ሰብለ ቤት ጨልጬ ሶሎ ቤት ስሸና

ይገቤ አልማዝ ቤት የጆሊ ባር ቡና ።

ካሳንቺስ ክትፏችን ከተማ ቤት ቢራ

የመጨረሻዬን ቺርስ ያልኩበት ተራ ።

ከወዳጆቼ ጋር የመለየት ለቅሶ

በአረቄና ቢራ ፍፁም ተለውሶ ።

ከቶ አይረሳኝም ነብስ ይማር መንግስቱ

ተጫዋች አሳቢ አንተ የኔ ከንቱ ።

ተቃቅፈን ተላቅሰን የሸኛችሁኝ ግዜ

ተክሎብኝ የቀረው ሃሳብ ከትካዜ።

ሼህ ዑመር ባህሩ ብሬ እና ውዶቹ

ከቶ እንዴት አድርጌ ከልቤ ላውጣችሁ ።

አርቆ የሸኘኝ  ላይመልሰኝ ግዜ

ሃገሬ ናፈቀኝ ተጫነኝ ትካዜ።

የኤጀርሳ ጎሮ የጎድን ጥብስ ሽታ

የታምራትን ቤት ኡኡታ ጫጫታ ።

ትዝ አለኝ ሃገሬ ናፈቀኝ መንደሬ

ስጎነጭ ስጨልጥ ከናፋቂው ወሬ ።

ፍፁም አይረሳም የአራት ኪሎ መንገድ

ከሥራ በኋላ ያለው  መንጎራደድ ።

በሞት ያጣዋቸው ወዳጅ ዘመዶቼ

ከቶ ላልረሳችሁ በልቼ ጠጥቼ

ከነጫጮቹ ምድር ጠፋሁኝ ሰስቼ ።

ጥዬው እንዳልመጣ እሩጬ ፈርጥጬ

የያዘው ይዞኛል ዝቅ  አርጎኝ ከአገጬ ።

አይመስለኝም ነበር ልቆይ እንዲህ እርቄ

በሃገር በህዝቤ ሁሌ ተጨንቄ ።

ልብ አቅም ሲደክም ሲወርህ እርጅና

ይናፍቃል ቀዬ የሰፈር ጓደኛ ።

ግና ለምን በኔ ስደት ጨከነሳ

ወይስ እኔ ፈራው አበዛው ወቀሳ ።

ሃገሬ ናፈቀኝ ወንዟ ሸንተረሯ

ናፈቀኝ ሃገሬ ነፃነቷ ክብሯ

ትዝታ ኑሮዋ ባህል ቁም ነገሯ ።

ሜይ 2019

ግርማ ቢረጋ / ስቶክሆልም