የመርገም አርማ የጥላቻ ዜማ! – ከቴዎድሮስ ሃይሌ

ኦህዴድ/ኦዴፓ የሕወሃት አሮጌ የሞት ሌጋሲ ወራሽ:: ወያኔ እንደ ጭቃ አቡክቶ እንደ ኩበት ጠፍጥፎ የተዛባ ትርክት አስታቅፎ ነብስ የዘራበት አዛውንት ግን ጨቅላ ድርጅት:: ኦዴፓ ሕወሃት ያስታጠቀውን የርዕዮት ጥብቆ ያሥጨበጠውን የጥላቻ ምርኩዝ ያጠመቀውን የበታችነት ስሜት ጥሎ ዘመኑን መዋጀት ያልቻለ ገባር:: በባርነት የተሸለመውን የመርገም አርማ የጌትነቱ ማሳያ ሰንደቅ ያደረገ ሞኝ ::

ሃገር ሲያረጅ ጃርት ያፈራል መሬት ሲያረጅ መጅ ያበቅላል አበው እንዲሉ:: ፖለቲካችን የሃገር ማርጀትና የሞራል ቁልቁለት ላይ መሆናችን ማሳያ ሆኗል:: ገበታ ሙሉ ጮማ ቀርቦ ስለ ፍርፋሪ የሚጨነቅ : ጽዋ ሙሉ ወይን ጠጅ አስቀምጦ ቅራሪ መፈለግ ጤነኝነት ነውን? ጠቅላይ ሚንስትሩ ከንቲባው ማርሻሉ ባንኩም ታንኩም ሌላው ሌላውም ኦሮሞ ሆኖ: የሃገሪቱ የፖለቲካ ስልጣን የሚዘወረው በኦሮሞ ሆኖ ማለቃቀስ ምን ማለት ነው:: ኢትዮጵያን ያህል ሃገር ይዞ እንዴት አንድ ከተማ በስርዐት ማስተዳደር ያቅታል::

የኦሮሞ የፖለቲካ ኤሊቶች በትልቁ ማሰብ አልሆነላቸውም እንጂ ዛሬ በታሪክ አጋጣሚ እጃቸው ላይ የወደቀውን ሃገር የመምራት እድል ከዛም በላይ አሻግረው የአፍሪካ መሪ አሰባሳቢና ተምሳሌት መሆን በቻሉ ነበር:: ነገር ግን አልሆነም :: ወርደው ወርደው ሃገራዊ አህጉራዊና አለም አቀፋዊ የሆነውን በሃውርታዊ ከተማ አዲስ አበባን የእኛና የእኛ ነው የሚለው አጉራ ዘለልነት ያሳፍራል:: የመርገም ሰንደቅ ስቀሉ የሚለው ዋይታ የጥላቻ ዝማሪያቸውን አዚሙልን ማለት በእርግጥ ዘመኑን የሚዋጅ ተግባር ነው:: ሃገር እየመሩ ለመንደር አርማ ሃገር ማሸበር ተማሪዎችን ማንገላታት አለመሰልጠን የመሪነት ብቃት ማጣት ወይስ ጨልምተኝነት:: ይሄ ተግባር እንወክለዋለን የሚሉትን ሕዝብ ይመጥናልስ ወይ ? ኦዴፓ ከሕወሃት የወረሰው የገለማ ዜማና የሻገተ ሰንደቅ ኦሮሞስ እንደ ብሄር በጋራ ይስማማበታል:: ቢያንስ ቢያንስ እንኳ የኦነግ የኦፌኮን እና ደርዘን የሚሞሉት የኦሮሞ ድርጅቶች የጋራ ተግባቦት የሌለበትን ቡቱቶና የጥላቻ ዜማ ልጆቻችን በምን እዳቸው ነው የሚቸገሩበት::

የሞኝ ዘፈን ሁሌም ሆሆይ ነው እንዲሉ የኦሮሞ ብልጽግና /ኦዴፓ/ ትልቅ ሃገር ይዞ መንደር የሚፈልግ ቤተመንግስት ገብቶ በረት የሚያምረው ዙፉን ላይ ተቀምጦ ድብዳብ የሚናፍቀው; ጮማ እየቆረጠ በቂጣ የሚጎመጅ.:: ግራ የተጋባና የተሳከረ ከየት እንደመጣ ወዴት እንደሚሄድ ምን እንደሚፈልግ በቅጡ የማያውቅ ጮርቃ ድርጅት ከሕወሃት ውታፍ ነቃይነት ወደ መሪነት ማማው ላይ ቢደርስም ዛሬም ያው እርጥብ ::ከስነልቦና ስብራቱ ያልተፈወሰ ሞራለ ቢስ ድኩማን ቡድን ነው::

የበታችነት ስሜት ከኤድስ ይልቅ የሚያመነምን: ከትራኮማ ይብስ የሚያሳውር ሐብት የማያረክሰው እውቀት የማያሽረው ስልጣን ሹመትና መሪነት የማይፈውሰው ከባድ ደዌ ነው:: አሁን ያለው ሁኔታ የሚያንጸባርቀው ይህንን እውነታ ነው:: እስቲ አሁን ምን የሚሉት ተግባር ነው አዲስ አበባ ላይ የሚደረገው:: ያለው ዘርፈ ብዙ ማህበራዊ ኢኮኖሚያዊና ፖለቲካዊ ችግር ሳይፈታ የደፈረሰው የሰላም እጦት ያስክተለው ከባድ ብሄራዊ ቀውስመፍትሄ ሳያገኝ ሌላ ሕዝብን የሚያለያይና የሚያጫርስ አጀንዳ ማራገብ ሃገር ከሚመራ ገዢ ፓርቲ አይጠበቅም::

ሕግ አስፈጻሚ ሆነው ሕግ የሚያፈርሱ ማህበራዊ መሰረታቸውን የሚያናጉ ፖለቲካዊ ፉይዳ ማህበራዊ ጥቅምየሌለው በአንጻሩ ግጭት የሚጭር እጅግ የወረደ አጀንዳ ማራገቡ የበላይነትን ለማሳየት በሌሎች ላይ ያለን ጉልበት ለመፈተሽ የስነ ልቦና ቀውሳቸው ማሳያ ከመሆን ውጪ አንድም ምክንያት የላቸውም::

የሕወሃት አልጋ ወራሾች የሆኑት የኦዴፓ ኦነግ ኤሊትች ሕዝባቸውን የማይመጥኑ ሗላ ቀሮች ሃገር ለመምራት የተሰጣቸውን እድል ለብጥብጥና ሃገር ለማፍረስ እያዋሉት ነው:: በተዛባ ትርክት ጠላ ሰክረው ጥላቻና ውድመትን ስራ አድርገውታል:: ኦሮሚያ ንጹሃን ዜጎች አቅመ ደካሞችና ሕጻናት በማንነታቸው ብቻ እየተለዩ በግፍና በጅምላ የሚጨፈጨፉባት የሰው ቄራ አድርገዋታል:: ኦሮሚያ ዛሬ ወደ ጥንታዊ ጋርዮሽ ዘመን ተመልሳለች:: ዜጎች ወጥተው የማይገቡባት ለነዋሪዎቿ ገሃነብ የሆነች ነጋዴና ባለሃብት የማይደፍራት የአራጆችዋሻ የዘራፊዎች መሸሸጊያና የፖለቲካ ነጋዴዎች የደራ ገበያ ሆናለች::

ይህ ሁሉ የኦሮሚያ ክልል ቀውስ ሕዝቡ የፈጠረው አይደለም:: 50 አመታት ኦነግ አንዲት ቀበሌ ሳይዝ ዶሮ ከመስረቅና አሮጊት ከመግደል ውጪ የከፉ ችግር መፍጠር ያልቻለው በኢትዮጵያዊነቱ የማይደራደረው የኦሮሞ ሕዝብ ጸጥታውን ማስከበር በመቻሉ ነው:: ያ የኦሮሞ ሰላማዊና ኢትዮጵያዊ ባህልና ጨዋነት ዛሬ ልጆቹ ነን የሚሉት ተረኞች ሃገር ሲመሩ የበለጠ ጎልቶ መታየት እንዳይችል ወያኔ ባሪያ አድርጋ በኦሮሞ ሕዝብ ላይ ያሰማራችው የሌጋሲዋ ወራሽ ኦዴፖ ኦሮሞን ሳይሆን ሕወሃትን በመምሰሉ ስርቆት ውሽት ዝርፊያና ቅሚያ የኦሮሚያ መገለጫ አድርጎታል::

ሕዝቡ አሁንስ በዛ ገለማን ታከተን ስለ ሰላምና ፍቅር ችግሮችን ሁሉ ማለፉችን የፍርሃት አይደለም እያለ ነው:: የነገ ሃገር ተረካቢ ልጆች የተሻለ ትምህርት የሚያቀራርብ ተግባር ስብዕናቸው በትላንት ሳይሆን በነገ ላይ እንዲገነባ ማድረግ ሲገባ የባርነት ዜማ ተቀኙልኝ ማለት ያሳፍራል:: ትንሾቹ ልጆች ከኛ ተሽለው የመለያየትን ግንብ ሲንዱት ቆም ብሎ እንደማሰብ ጉልበትን ሕጻናት ላይ መጫን ቃላት ሊገልጹት የማይችሉት የምዕተ አመቱ ድንቁርና ነው:: የኦሮሞ ብልጽግና ሰዎች እባካችሁ ተመከሩ እንደ እናንተ ሕዝቡ አልተመቸውም የኑሮ ውድነቱ በልቶ ማደርን አክብዶበታል:: የዜማና የቡቱቶ ችግር የለበትም:: እናንተው ተሰብስባችሁ የፈለጋችሁትን ሰንደቅ ስቀሉ አዚሙ ጨፍሩ ልጆችን ግን ከቆሻሻችሁ እንዲጎነጩ አትጫኑ:: አለያ ወዳጃችሁ መራራ እንዳለው የተራበ ሕዝብ መሪዎቹን ይበላል::

የመጣችሁበትን መንገድ ዞር ብላችሁ አስተውሉ :: ይህ ሕዝብ ከተነሳ እንኳን በቁማርና ግርግር ለስልጣን የበቃ ሻጋታና ገባር ድርጅት አይደለም የአውሮፓን ብካይ ግራዚያንን ያዋረደ የዚያድባሬን አክርካሪ ስብሮ ዳግም ያንበረከከ ህዝብ ነው:: ጦርነት ባህሌ ነው ባዩን ትምክህት ያሳበጠውን ጠመንጃ ነካሹ ጌታና ፈጣሪያችሁሕወሃት እንዳ አሮጌ ጎማ ተንፍሶ የተንበረከከው በኢትዮጵያውያን ክንድ እንጂ በልፍስፍሱ የኦዴፓ አራጅ ቀማኛና የመንደር ድስት ገልባጭ አይደለም::

አዲስ አበቤው መላው ኢትዮጵያውያን ይህንን ጉግማንጉ የብጽግና እንኩቶ በቃህ ሊለው ይገባል:: ኦሮምኛን እንደ ቋንቋ መማር ተጨማሪ እውቀትና ሃገራዊ ጌጣችን ነው:: ይህን የሚቃወም ማንም ጤነኛ እይምሮ ያለው ዜጋ የለም:: ችግሩ የመርገም እርማና የባርነት ዜማችው ጋር ነው:: ሌላው የኦሮሞ ኤሊቶች ችግር ከአማራ ጋር ብቻ የመሰለው ካለ ተሳስቷል:: እንኳን ለሌሎች ብሄሮች ለእራሱ ለኦሮሞ ሕዝብ የማይመጥንና ቅቡልነት የሌለው ሽብር ጠማቂ ቀውስ ፈልፉይ ድርጅት ነው:: በጨዋነት ስለ ሰላም ሲል የመረጠውን የአዲስ አበባ ሕዝብ ላይ ፉሽስታዊ አጀንዳ ለመጫን የተንቀሳቀሰ ቡድን በሌሎች ብሄሮችና አካባቢዎች ላይ ምን አይነት ግፍሊፈጽም እንደሚችል ቀላል ማሳያ ነው:: ስለዚህም ሳይመሽ ይህንን የመከነ ቡድን ሊታገለውና ከጫንቃውሊያወርደው ይገባል:: ከዚህ በላይ ጊዜና እድል ካገኘ ሃገሪቷን የጦር አውድማና የእርስ በርስ መፋጃ ከማድረግአይመለስም:: ስለዚህም መላው ሕዝባችን በሚቻለውና በማንኛውም መንገድ ሊታገለው ይገባል:: ለሃገሪቷም ለአሃጉሩም ለዓለምም የማይጠቅም ዘመኑን መዋጀት የማይችል ኤክስፓየርድ ያደረገ ቡድን ሃገር ሳያረክስ ማምከን ግድ ይላል::

እግዚያብሄር ኢትዮጵያን ይባርክ!!!አሜን!