አሁን ዕድሜዬ 37 ሲሆን ባለትዳርና የ2 ልጆች አባት ነኝ፡፡ ሀሳብ የሆነብኝ ነገር ሁሌ ጠዋት ጠዋት ከእንቅልፌ ስነቃ ተከታታይና ለረጅም ጊዜ የሚቆይ ማስነጠስ ልቤን ውልቅ ሊያደርጋት ይደርሳል፡፡ ሲያስነጥሰኝ ታዲያ ሰውነቴ በሙሉ በላብ ይዘፈቅና መላ ሰውነቴን ያሳክከኛል፡፡ ብዙም ሳይቆይ ደግሞ ቀጭን ፈሳሽ ከአፍንጫዬ ይወጣል፡፡ አባቴ የአስም በሽተኛ ነበርና ይህ ነገርም ታዲያ በዘር የወረስኩት አስም እንዳይሆን እጅግ ፈርቻለሁና መፍትሄ ብትለግሱኝ እላለሁ፡፡
አበራ ነኝ
ውድ ጠያቂያችን አበራ ካለማቋረጥ እንደሚያስነጥስህ፣ ከዚህ ጋርም ተያይዞ ፊትህን እንደሚያሳክክህ፣ ከአፍንጫህም ቀጭን ፈሳሽ እንደሚወጣ እና አባትህም የአስም ህመም ተጠቂ መሆናቸውን ገልፀሀል፡፡ ካቀረብካቸው የህመም ምልክቶች ተነስተን ስንመለከተው ችግርህ ከአፍንጫ መቆጣት ጋር ተያያዥ ሆኖ ይታያል፡፡ ይህ መሰል ክስተትም ለብዙ ጊዜ እንደሚደጋገምብህ ገልፀሀል፡፡ ይህም መሆኑ የአፍንጫ መቆጣት ችግር ከአንዳች መንስኤ ጋር ሊያያዝ እንደሚችል ያሳያል፡፡ እንዲህ መሰሉ በየወቅቱ ከአንዳች መንስኤ ጋር ተያይዞ የሚከሰት ችግር ከአለርጂ ህመም አንፃር የሚታይ ይሆናል፡፡ በዋናነት ደግሞ የጠቀስካቸው ምልክቶች ለአፍንጫ አለርጂ አይነተኛ ምልክቶች ናቸው፡፡ ይህን የመሰለ ህመም በህክምና መጠሪያው ‹‹የአፍንጫ አስም›› ወይም ‹‹አለርጂክ ሳይንሳይስቲስት›› ብለን ልንጠራው እንችላለን፡፡
የአፍንጫ አስም (አለርጂ) ልክ እንደሳንባ አለርጂ ትንፋሽ የማሳጠር፣ ሳል የማሳልና ሲተነፍሱ ‹‹ሲር ሲር›› የሚል ድምፅ የማያሰማ ይሁን እንጂ ዋና መንስኤው ከአለርጂ ጋር በመያያዙ ይመሳሰላሉ፡፡ እንዲሁም ህመሞቹ በየጊዜው እያሰለሱ የመምጣታቸውም ጉዳይ እንዲሁ ይመሳሰላል፡፡ የሚደረግላቸውም ህክምና ፀረ አለርጂ መድሃኒቶች በመሆናቸው ተያያዥ መሆናቸውን ያመለክታል፡፡ አንዳንዴ የአፍንጫ አለርጂ (አስም) ለሳንባ አስም (አለርጂ) ክስተት ጠቋሚ ምልክት ሊሆን ይችላል፡፡ ይህ ማለት ግን የአፍንጫ አስም ያለበት ሁሉ ወደ ፊት የሳንባ አስም ይከሰትበታል ማለት አይደለም፡፡ ከደብዳቤህ እንደተረዳነው አባትህ የአስም ህመም ያለባቸው እንደመሆናቸው መጠን አንተም የአፍንጫ አለርጂ ቢኖርብህ ብዙም አያስገርምም፡፡ ምክንያቱም አለርጂ በባህሪው በዘር የመተላለፍ ባህሪ ያለው በመሆኑ ነው፡፡ ይህ ማለት ግን ወደ ፊት ልክ እንደ አባትህ የሳንባ አስም ተጠቂ ትሆናለህ እያልን አይደለም፡፡ ይሁን እንጂ በአፍንጫ አለርጂ መልክ ግን መከሰቱ አልቀረም፡፡
ውድ አበራ አለርጂ ማለት ሰውነታችን ለአንድ ለሚያስቆጣው ነገር ሲጋለጥ የሚከሰት ችግር ነው፡፡ እንዲህ አይነት ባህሪው የሚኖራቸው ደግሞ አንዳንድ ሰዎች በተፈጥሯቸው አለርጂውን ለሚቀሰቅሰው ነገር ቁጠኛ ሲሆኑ ነው፡፡ ሰውነታችንም እንዲህ መሰሉን ቁጠኝነት የሚገልፀው በሰውነታችን የበሽታ መከላከያ ሃይል በኩል ሲሆን እነዚህም ሃይላት በሚያመርቷቸው ኬሚካሎች (በተለይ ‹‹ሂስታሚን›› የተባለው ኬሚካል) ቆዳን የማሳከክ፣ አፍንጫን የመለብለብ፣ ንፍጥ የማዝረክረክና ማስነጠስ መሰል ምልክቶችን እንዲያሳይ ያደርጋል፡፡ የተለያዩ ሰዎች ለተለያዩ ነገሮች ሰውነታቸው ተቆጭ ሊሆን ይችላል፡፡
በተለያዩ አበቦች ውስጥ የሚገኘው ፓለን፣ አንዳንድ ምግቦች፣ የተወሰኑ የመድሃኒት አይነቶች፣ የአቧራ ብናኞች፣ የእንስሳት ፀጉር (በተለይም ድመት)፣ የፋብሪካ ጭሶች (ወይም የሲጋራ ጭስ)፣ እንዲሁም መርዘኛ ነፍሳቶች ተጠቃሽ ናቸው፡፡ የተለያዩ ሰዎች የተለያዩ የአለርጂ መነሻ ምክንያቶች ያሏቸው በመሆኑም ማን ሰውነቱ ለየትኛው የአለርጂ መነሻ ሊቆጣ እንደሚችል በውል ለይቶ ማወቅ ይኖርበታል፡፡ ለምሳሌ የድመት ፀጉር ሲሸታቸው አለርጂው የሚነሳባቸው ሰዎች ችግሩ እንዳይቀሰቀስባቸው መንስኤ የሆነችውን ድመት ማራቅ ይኖርባቸዋል፡፡ በመሆኑም አንተም ብትሆን አለርጂው በምን እንደሚነሳብህ ለይተህ በማወቅ እንዳይደጋገምብህ ከሚያስነሳብህ መንስኤ መራቅ አንዱ የመከላከያና የህክምና አማራጭ ነው ማለት ነው፡፡
ውድ ወንድማችን ከዚህ ውጭ ከላይ የጠቀስካቸው ምልክቶች ሲከሰቱብህ የሚከተሉትን መድሃኒቶች በማስታገሻነት መውሰድም ይመከራል፡፡ ባለ 4 ሚግ አንድ ኪኒን ክሎርፌኒራሚን (Chlorpheniramine) በቀን (Cetrizine) በየቀኑ ልትወስድ የምትችል ሲሆን ምልክቶቹም እንዳቆሙልህ መድሃኒቶችን መውሰድ ታቆማለህ፡፡ ወደ ፊትም ሲነሳብህ በዚህ መልኩ መቀጠል ይኖርብሃል፡፡ የአፍንጫን አለርጂ ከላይ ባለው መልኩ ለመከላከል እና ለማስታገስ መሞከር እንጂ ማዳን አይቻልም፡፡
ከዚህ በተጨማሪ አንዳንዴ ይህ የአፍንጫ አለርጂ ወደ ‹‹ሳይነሳይቲስ› ሊቀየር የሚችልበት እድሉ ስላለም ልታጤነው ይገባል፡፡ በተለይ የአፍንጫህ ፈሳሽ ወፍራምና ወደ ቢጫነት እየተቀየረ ከመጣ ስትናገር የአፍንጫህን መዘጋት በመነፋነፍ መልኩ ከታዘብክ እንደትኩሳትና ራስ ምታት አብረው ከታዩ በተጨማሪ ህክምናነት የአንቲባዮክ ህክምና ሊያስፈልግህ ይችላል፡፡ (ለምሳሌ ባለ 250 ሚሊ ግራም አንድ ክኒን አሞክሳስሊን በቀን ለሶስት ጊዜ ለ7 ቀናት ልትወስድ ትችላለህ) ይህ ህክምና የሚያስፈልገው ‹‹ሳይነሳይቲስ›› የተባለው የአፍንጫ መመርቀዝ ህመም በባክቴሪያዎች ሊመጣ ስለሚችል ነው፡፡ ውድ አበራ ከረጅሙ በአጭሩ ለጥያቄህ ያለው ምላሽ ይህን ይመስላል፤ መልካም ጤንነት፡፡
