የፐሮ መስፍንን ሃሰብ የጽሑፌ መግብያ አድርጌለሁ ።
″ ያንጊዜም ሆነ ዛሬ ፣ በበኩሌ የጎሣ መነፅር የለኝም ። ልሳሳት እችላለሁ ። አሥተያየቴ ለአንዳንድ ሰዎች አይጥምም ። … ይሆናል ። ነገር ግን እግዚአብሔር ይመሥገን የጎሣ ምንም ነገር በውስጤ የለም ። ለእኔ በጎሣ ደረጃ ወርዶ ማሠብ ከሰውነት ደረጃ መውጣትና ወደአዘቅት መውረድ ነው ። እዚያ ተርታ በአካልም፣ በአስተሳሰብም በስሜትም አልገኝም ።
( ” አዳፍኔ ፍርሃትና መክሸፍ ” ገፅ 27 ፤ የፕሮፌሰር መስፍን ወ/ማርያም መፅሐፍ ) “ሦሥት ነገሮች አሉ ። እነዚህም ፦ የሁላችንም ኢትዮጵያ ፤ በተለያዩ ዘመኖች በኢትዮጵያ ውሥጥ የነበረው ሥርዓት ፤ በተለያዩ ዘመናት ሥርዓቱን የሚያንቀሳቅሱት ሰዎች ናቸው ። የመክሸፉ ሰንኮፍ ያለው እነዚህ ሦሥት የተለያዩ ነገርች ለይቶ ማየት ያለመቻል ላይ ነው ። አንዳንደ ሰዎች ይኼንን ሁሉ ከነጉድለቱ ለመወረስ አይፈልጉም ። መፍትሄው ነፃነት ነው ብለው በቅዠት ይነቃሉ ። ቅዠት የምለው ለማዋረድ አይደለም ። እውነቱን ለመግለፅ ነው ። ማስረጃ የሚፈልግ ለአንድ ሠዓት ያህል ብቻ ኤርትራና ሱማሊያ ያሉበትን ሁኔታ ያጥና ። በሁለቱም አገሮች ያለው ሁኔታ በሽታው ያው በሥርዓቱ ላይ መሆኑንን ለመገንዘብ አያዳግተውም ። ህዝብን ሁሉ በነፃነት ፣ በእኩልነት ፣ የሚያቅፍ ህጋዊ ሥርዓት ከሌለ መበታተኑ የማይቀር ይሆናል ። መበታተኑም ቢሆን አይቆምም ።
ግን ማነው ነፃ የሚያወጣው ? ከማንስ ነው ነፃ የሚወጣው ? የወያኔ ፕሮግራም ኢትዮጵያን አማራ አድርጎ ሌላው ሁሉ ከአማራ ነፃ እንዲወጣ ነው ። ተገነዘቡትም ፣ አልተገዘቡትም የኢትዮጵያ ታሪክ ሁሉ አማራ ለሚሉት አስረክበው ባዶ እጃቸውን ነፃ ሊወጡ ነው !? ግን አሥቸጋሪ ነው ። ኢሣያስ አፈወርቂ የሆነለት በመንግስት ደረጃ የኢትዮጵያን የቀን አቆጣጠር በፈረንጆች መለወጥ ብቻ ነው ። ዛሬም ኢትዮጵያዊነት በኤርትራ ውስጥ ጎልቶና ደምቆ ይታያል ። ራሱ ኢሣያሥም ቢሆን ኢትዮጵያዊነቱን በውስጡ ቀብሮ ይዞል ። ይኽ እኔ ራሴ ያረጋገጥኩት ነው ።
ገፅ 34 እና 35 ፤ ” አዳፍኔ ፍርሃትና መክሸፍ ” የፕሮፌሰር መስፍን ወ/ማርያም መፅሐፍ )
አዳፍኔ እና መክሸፍ ለአለፉት 50 ዓመታት የኢትዮጵያ ህዝብ የተጎዙበት መንገድ በአያሌ አበሳና ስቃይ እንዲሁም እጅግ በበዙ እንቅፋቶች ፣ ወጥመዶች ፣ ጋሬጣዎች ፣ እሾኮች ፣ ጉድጎዶች ፣ አደናቃፊ ዲንጋዮች ፣ በአጠቃላይ በአዳፍኔ እና በመክሸፍ ለምን ተሟላ ?
በአዳፍኔ እና በመክሸፍ የተሞላው በህዝብ ሥም ወደ ሥልጣን የሚመጡት ፣ በሥልጣን መገልገልን እንጂ ማገልገልን የማይፈልጉ ፣ እንደቀደሙት ጨቋኞች እነሱም በህዝብ ሥም ፤ በሤራ በተሞላ አገዛዝ ያውም መርጠው በመጨቆን የአገዛዝ ዕድሜያቸውን ለማራዘም የሚጥሩ ሆነው በመገኘታቸው ነው ።
ዛሬና አሁን በኢትዮጵያ የፖለቲካ መንገድ ላይ በህዝብ ሥም ፣ ሥልጣን ይዘው ፣ ሠልፉን የሚመሩት ከመሳፍንት ዘመን ፖለቲካ ያልተላቀቁ ፣ ነፃ የህነውን ዜጋ ፣ “ በባርነት ውሥጥ ነህ ። “ ብለው የሚሰብኩ ። በጠብመንጃ ኃይል ፣ በተጭበረበረ ፍትህ ና እሥር እውነትን እሥካዳፈንክ … ህዝባዊ ተቃውሞን በማክሸፍ ፣ ሥልጣኔን አይደፈሬ እሥካደረክልኝ ጊዜ ድረስ ድሎትና ምቾትህን አላጎድልብህም ። “ ባዮች ናቸው ። ይኽ ድለላ ግን እሥከመቼ “ ደምቆ ና አሸብርቆ “ እንደሚቀጥል እግዜር ነው የሚያውቀው ። “ ዘርፈህ ሀብታም ሁን “ የሚሉ ። ከወረዳ ጀምሮ በሞዳሞድ ሥልጣን የያዙ ፤ በአገሪቱ ነገሰው ፤ ነገ ሥልጣናቸውን ለልጆቻቸው አውርሰው ፣ የኢትዮጵያን ህዝብ በፍትህ እና በዴሞክራሲ እጦት እያሰቃዩ ይቀጥላሉ ወይሥ ? ፈጣሪ ከወዲሁ “ በቃችሁ ! “ ይላቸዋል ? …
ዛሬ በኢትዮጵያ ፣ “ የተሥተካከለ ፣ ከህግ በታች የሆነ ፣ ለህግ የሚገዛ ፣ ህግን የሚያከብርና የሚያሥከብር ፣ ህግ አሥፈፃሚ የለም ። “ ብሎ ለመናገር የማያሥደፍሩ የህግ ጥሰቶች አጅግ በዝተው ፣ ህዝብን እያሥመረሩ ነው ።
በጎበዝ አለቃ የምንመራ እስኪመስል የህግ የበላይነት ተደምስሶ ፣ ግብዝ ባለሥልጣናት ና የክልል መንግሥታትት በራሳቸው ዛሬና አሁን “ ጃንሆይ ! “ሆነውብናል ።
ጃንሆይዎቹ ፣ ሥልጣንን ፣ ጥቅምን ፣ በአበልጅነት ፣ በሙዜነት ሣይቀር ያከፍላሉ ። አሽቃባጩን ጨምሮ በሚገዙት ክልል ውስጥ ፣ ዘመድ ፣ አዝማዱ መሬት በየወረዳው እየተሰጠው በመቸብቸብ ሚሊዮነር ሆኗል ።
ዛር፣ዛሬ ፣ በዶ/ር ጠቅላይ ሚኒሥቴር አብይ ሥልጣን ሥር ( ለምን ዶ/ር ትላለህ አትበሉ ። ዛሬ በአሣፋሪ መልኩ ዲፕሎማ ሊሰጠው የማይገባ አይደል እንዴ ማሥትሬትና ዶክተሬት ያለው ። በዕውቀት የማይታማን ሰው ማማትም ጡር ነው ። ይልቅየስ “ ሣክሥ በቃን “ ሠለቸን ። በማለታችሁ አደንቃችኋለሁ ። ) ኧረ ሥንት ጉድ ይታያል ? ሥንትና ሥንት ጉድሥ ይሰማል ? “…ታንታለሙ በጉጂ በኩል ወደኬንያ ተጋዘ ።ደሞ እኮ ፣ ሥለ ኬንያ ታንታለም ሻጪነት ይወራል ጅሌ ! አትሞኝ ። እከሌ እና እከሊት የእንትና የቢዝነስ ሸሪክ ናቸው ። ያጋበሱት ሀብት ለአሥር ተውልድ የሚበቃ ሥለሆነ ፣ ሥልጣን በመልቀቃቸው ተደስተዋል ። ከህዝባዊ ቁጣና መዓበል በፊት በቦሌ በክብር መሸኘትን ማን ያገኘዋል ። “ ይሉሃል ።
ሌላው ይቀጥላል “እንትናም በአሜሪካ ኔቪ በኩል ፣ ከባይደን ጋር ተሻርኮ ወርቁን በበዙ ኩንታል ቋጥሮ ፣ የነገ መጦርያውን ብቻ ሳይሆን ዘር ማንዘሩን ለሺ ዓመትየሚደላቅቅበትን ጥሪት በአደራ አስቀምጧል ። ጤናዋም ጥሩ ሥላልሆነ ነገ ፣ ተነገወዲያ በቦሌ እብሥ ማለቱ አይቀርም ። ያም ወሬኛ አጃቢው ሆኖ ለትምህርት ይባልና አብሮ መሄዱ ሳይታለም የተፈታ ነው ። “ ይልሃል ። “ እሽ ሌላስ የለህም ? ትርትሩ ! ጋ ሼ ቆርጦ ቀጥል ! “ ብትሉት በእናንተ ያለማመን እየሳቀ ጥሏችሁ ይሄዳል ።
አንዳንዴ ፣ ″ ምነው ጆሮ ባልኖረኝ ! ″ ብላችሁ እሥከምትማረሩ ድረስ ፤ ″ አይኔ ግንበር በሆነ ! ″ ብላችሁ ራሳችሁን እሥክትረግሙ ድረስ ፤ በአገረ ኢትዮጵያ፣ ከከንቲባ ጀምሮ ያሉ ሹመቶች በትውልድ ቦታ ፣ በሥጋ ዘመድ ፣ ፣ በሠፈር ፣ በአበልጅ ፣ በሙዜ እና በልቶ የሚያበላ ፤ በሚል የዘረፋ ደቀመዝሙርነት እየተገመገመ ፤ በክልል በለሥልጣናት ሲሰጥ ና አጫፋሪው ሣይቀር ፣ በሦሥትና በአራት አመት ውስጥ ወደ ቢሊዮነርነት ሊሸጋገር አንድ ሃሙሥ ቀርቶት ሥታዩ ፤ “ እንዴ ! እንዴት እንዲህ ዘረፋው ከረረ ? የወያኔ አዳፍኔ ፤ በምን ቅፅበት ብልፅግናንን ወረሰው ! “ ማለታችሁ አይቀርም ።
መገረማችሁን ወደ ሰላማዊ ትግል መቀየር እና “ ለምንድነው የእኛ ፖለቲከኞች በዓለም አገራት ዜጎች ፈፅሞ በማይስተዋል መልኩ ሰው መሆናቸውን ዘንግተው ወይም ለሆዳቸው በማድላት ፣ እንደእንሥሣ ለማሰብ እና በቋንቋ ተቧድነው ፣ የኔ ቋንቋ ትልቅ ነው ፣ እኔ በቋንቋዬ ልዩ በመሆኔ ብቻ ከሌላው ሰው እለያለሁ እናም የላቀ መብት አለኝ ። ″ በሚል ሣይንሣዊም ሆነ ኃይማኖታዊ እውነት እና በሰው ለሰው መስተጋብር ውሥጥ ፣ ዓለማቀፋዊ ቅቡልነት በሌለው ፣ የአየር ላይ ፣ በመዳከር ፤ በውሥጥም ሆነ በውጪ ጎራ ለይተው ፣ከዛሬው ሥልጡን ሰው የአሥተሣሠብ ደረጃ ዝቅ በማለት ፣ ዛሬም አገሪቱን ና ህዝቧን ሠላም እየነሷት የሚገኙት ? በማለት ብጠይቁና “ ሀገር በጭለማ ውሥጥ በደመነፍስ እየተወራጩ ባሉ ፣ የሚሰሩትን በማያውቁ ፣ ለሆዳቸው በተደራጁ ቡድኖች እሥከመቼ የኋሊት ሩጫ ተሮጣለች ? “ በማለት ይኽንን ወደ ገደል የሚወስድ ሩጫ ለማሥቆም በየፈርጃቸው ጥረት ብታደርጉ መልካም ይመሥለኛል ።
ሠላማዊ ትግል ዛሬ ና አሁን በእጅጉ ያሥፈልገናል ። ይኽ ትውልድ ገዢዎችን የሚሞግት እንደሆነ በተግባር ያሳያልም ብዬ ተሥፋ አድርጋለሁ ። ፈጣሪ የፊታችንን ቢያውቅልንም ዛሬ እየኖርነው ያለው ህይወት እጅግ አሳፋሪና አስፈሪ ነው ። እምነታችንን ከበሉ ፤ ልጆቻችንን ከበሉ ፤ ሀብትና ንብረታችንን ከበሉ ፤ ካወመኑ ጋር ያለ አንዳች ፍትህ የአገረ መንግሥቱ ዘዋሪዎች ፣ ባለሥልጣናቱ ታርቀዋል ።
እርቁ የተደረገው በአውሮፖና በአሜሪካ መንግሥታት ጫና ነው ተብሎ ይገመታል ። ለእነዚህ መንግሥታት ሥልጣን የሰጣቸው የአገራቸው ዜጋ ወይም ህዝብ ነው ። እናም በየምክር ቤቶቻቸው “የፍትህ ጥያቄ ለምን አልተመለሰም ፣ ሠለሰላም ሥናወራ ፣ ፍትህና ዴሞክራሲን ጨፍልቀን ከሆነ ታጥቦ ጭቃ ነው ። ነገሩ ና በግል ለራሳችሁ ጥቅም ካላሰባችሁ በሥተቀር ፣ ፍትህና ዴሞክራሲን በኢትዮጵያ ለማንበር እውነተኛ ና ተጠያቂነትን ያካተተ እርቅ እንዲፈጠር ታደርጉ ነበር ። “ ብሎ መጠየቁ አይቀርም ። ህዘብም በምርጫ ወቅት በካርዱ ይቀጣቸዋል ።
የኢትዮጵያ ህዝብ ግን ፣ የዛሬዎቹን ባለሥልጣናት በምርጫ እንኳን ለመቅጣት ፣ የሚያሥችል ህገ መንግሥታዊ ነፃነት የለውም ። ለምን ቢሉ ፣ በብዙ ሚሊዮን የሚቆጠረው ዜጋ መራጭ እንጂ ተመራጭ የሚህንበት ፍትሃዊነትን ያነበረ የመወዳደሪያ ሜዳን ህገ መንግሥቱ ባለመፍጠሩ አንዱ በቋንቋ ሥም ገዢ ሌሎች ተገዢ ሆነዋልና ። ይኽ ብቻም አይደል የአዳፍኔ ኔት ወርክ ከቀበሌ ጀምሮ መዘርጋቱ በየአምሥት ዓመት የሚመጣውን አገራቀፍ ምርጫ ተአማኒነቱን ይቀንሰዋል ።
ያም ሆነ ይህ በፍቅርና በህብረት መኖርን የምንወድድ ዜጎች ፣ ምንም ሰብዓዊ መብታችን የምናስከብርበት መፈናፈኛ በህገ መንግስቱ ውስጥ አልተቀመጠልንም ። በዚህ በሸፍጥ በተሟላ ህገ መንግሥት እና በኔት ወርክ በመደራጀት ሁሉም ለዘረፋ በሚሯሯጥበት ሥርዓት ውሥጥ ፣ “ በዓለም አቀፍ ጫና ጦርነቱ ቆመ ። የሠላም ሥምምነት ተፈረመ ። “ ተብለናል ። ሠላም ለደሃው ዜጋ በመላ መምጣቱ እልል ያሰኛል ። የሚገርመው ግን “ ዜጎች እንዲጨፈጨፉ ትዕዛዝ የሰጡ ወንጀለኞች ያለመጠየቃቸው ነው ።
ኢትዮጵያዊነታቸው ጭምር የካዱ ፤ የእናት አገርን ፣ ሀብቷን ብቻ በመውደድ በጎጣቸው እየማሉ ፣ ለዘረፋ ህዝብን አሰማርተው የሠላማዊ ዜጎችን ሀብትና ንብረት ካዘረፉ ፤ ዜጎቻችንን በደቦ እንዲደፈሩ በማድረግ ፣ ካዋረዱ ፣ ( የኢትዮጵያን መከላከያ አባላትን እና ዜጎችን አካለ ጎዶሎ ካደረጉ … ተዘርዝሮ የማያልቅ ግፍ በዚህ ፣ በዘመነ ፣ 21 ኛው ክፍለ ዘመን ፣ በየዋሁ እና በኃይማኖተኛው ህዝብ ላይ ከፈፀሙ …) ሰው መሠል አራዊቶች ጋር ፣ ያለ አንዳች ፍትህ ″ ለሠላም ሲባል ሁሉንም ነገር ይቅር ብለናል ። ″ ማለት ፤ ምን ማለት ነው ? የመንግሥት ባለሥልጣናት እግዜር ናቸው እንዴ ?
” ጁንታ እና የናት ጡት ነካሽ ” ተብሎ ከተፈረጀው በንፁሃን ደም እጁ ከተጨማለቀ ጋር ያለ ” ኢትዮጵያ ህዝብ ይሁንታ ! ” ታርቀናል ። ብሎ መሞዳሞድን ከማየት ፣ በእውነቱ ” በዚህ ፍትህ በተቀበረችበት ዘመን ምነው ባልተፈጠርኩ ?! ” የሚያሰኝ ነው ።
በነገሬ ላይ ልባዊ ዕርቅን የሚጠላ የለም ። ይቅር መባባል የሠላም መሠረት ነው ። ሆኖም ሳያውቁ በወያኔ መሪዎች አሥገዳጅነት ወይም እንጀራ በልተው ለመሠንበት ባላቸው ሰብዓዊ ጉጉት ፣ የህውሀትን የጦርነት ትዕዛዝ የፈፀሙ ፣ ልዩ ኃይሎች ፣ ሚሊሻዎች ፣ የትግራይ ወጣቶችና ሽማግሌዎች ፣ በደሉ በግበር ቀደም ፣ ከደረሰበት የአፋር ና የትግራይ ህዝብ ጋር ፣ ” መሪዎቻችን ለሥልጣናቸው ሲሉ በሐሰት ትርክት ወደ ጦርነት አሥገብተውን ፣ ምንም ያልበደላችሁንን ወንድምና እህቶቻችንን ለሥቃይና ለሥደት በመዳረጋችን ይቅር ለእግዛብሔር በሉን ። ” ሊሉና ለሠላም ሲባል ይቅር ሊባባሉ ይችላሉ ። ማንም ህሊና ያለው ፍጡር ይህ እውነት አያቀረሸውም ። …
ገዢው ፖርቲ ብልፅግና ፣ ” የእናት ጡት ነካሽ ” እያለ ሲጠረው የነበረን አገር አፍራሽ ተላላኪ ቡድን ፤ ወንድምና ወንድምን አጋዳይ ሤጣን ቡድን ፤ ” እሥከ ሥሙ ይጥፋ ! እንደ አያ ጅቦ ወያኔ የተሰኘ ሥም ለመጪው ትውልድ ማሥፈራሪያ ይሁን ! ! ” ተብሎ በአደባባይ የተወገዘን ቡድን ግን ይቅር ማለት ህዝቡን ከማቀርሸትም አልፎ የጨጎራ ህመምተኛ አድርጓታል ። እርር ድብን ነው ፣ ያለው ። አብሶ ከመለስ ዜናው ጊዜ ጀምሮ በማሥመሠል በተካኑ ሰዎች ለሠላም ሲባል ያለ አንዳች ፣ ፍትህና ካሣ ፣ ከሁለቱም ወገን በጠፉ ዜጎች መቃብር ላይ ቆመን ሠላምን ፈጥረናል መባል እጅግ ያማል ።
ከመለስ ዜናዊ አምባገነናዊ አገዛዝ ጀምሮ ጭራቸውን በመቁላትና እንደመለሥ ካልተናገርን ሞትን እንገኛለን ከሚሉ ( ዛሬም ያ ማሥመሠላቸው በግልፅ ይታያል ። ) አስመሣዩ ጭራቸው ፣ ዛሬም ድረስ ረዝሞ የሚታይ ጉድች ፤ በቃላት ጭምር ከአዋረዳቸው ጌታቸው ረዳ እና ከናቃቸው ደብረፅዮን ጋር ሲተቃቀፉ ማየት ፣ ለዚች ሰንደቅ ፣ ለዚች አገር ፣ ለዚች ምሥኪን እናት አገር ብለው የተሰው ጓዶቻቸውን ፣ ልጆቻቸውን ፣ ወገኖቻቸውን ለማይረሱ ሁሉ የሞት ሞት ነው ።
ከዚህ ውርደት ከማይገልፀው ደባሪ ኩነት አንፃር አሁን ያለንበት ሁኔታ በታሪክ እጅግ የጠቆረ ” አሥጠሊ እና አሣፋሪ “ተብሎ ይመዘገባል ። …
አንድ የታሪክ አደራ ያለበት ይትልቅ አገር መንግሥት በግፈኞች ለተሰቃዩት ፣ ለተዋረዱት ፣ ለቁሰሉት ፤ በሁለቱም ወገን በጦርነቱ ሰበብ ለሞቱት ከ600 ሺ በላይ ዜጎች ፤ ለቆሰሉትና አካለ ሥንኩል ለሆኑት ከ 50 ሺ በላይ ዜጎች ፣ ( በግምት ) እንዴት ፍትህን ይነፍጋቸዋል ? ህዝብ ለአገር ሉአላዊነት ፣ ለነፃነቷና ለክብሯ እንጂ ለግለሰቦች ብሎ እኮ ከንቱ መሰዋትነት አልከፈለም ። መንግሥት ይኽንን እውነት እያወቀ ሌላ አጀንዳ በመፍጠርና በማደናገር ከዘለቀም “ እንደ ሁለቱ አሥቂኝ ለማኞች ወግ “ ድርጊቱን በትዝብትና ያለአዋቂነት ነው ። በማለት በመሳቅ አናልፈውም ።
″ የሁለት ለማኞች ወግ ″ የጽሁፉ ማሰረጌ
በጊዮርጊስ ቤተክርስቲያን በራፍ ላይ ሁለት የእኔ ብጤዎች ጎን ለጎን ሆነው ይለምናሉ ። አንዱ ለማኝ ጀማሪ ና የዋህ ለማኝ ነው ። ፊደል ያለቆጠረ ከመሆኑም በላይ ሥለ ኃይማኖት የጠለቀ ዕውቀት የለውም ። አጠገቡ ያለው ደግሞ የ30ውንም ቀን ድርብና ነጠላ የመላእክት ና የሰማዕታትን ቀን ጠንቅቆ የሚያውቅ ነው ።
ዕለቱ ጊዮርጊስ እንደመሆኑ ይኼ የነቃው የእኔ ብጤ ” ጋሼ ! አባባ ! ልጄ! ሥለ ፈረሰኛው ጊዮርጊስ ! ሥለ ፈረሰኛው ጊዮርጊስ ! …” እያለ ሲለምን ይሰማል ጎኑ ያለው የዋህ ለማኝ ። ከእርሱ ለየት አድርጌ መለመን አለብኝ በማለት ፣ ” ሰለ ፈረሰኛው ገብርኤል ! ሥለ ፈረሰኛው ገብርኤል ! …” እያለ መለመን ሲጀምር ፣ አጠገቡ ያለው የነቃው ለማኝ ” ገብርኤል ፈረስ የለውም ። ” ይለዋል ። ይኽንን እንደ ሰማ አጠገቡ ያለው ለማኝ ደንግጦ ” ወይ ! በምትኩት ! ነበረው እኮ ! ቸግሮት ሸጠው እንዴ ?! ” አለ ይባላል ።
መቼም መላዕክት ሰው እንዳይደሉ ይታወቃል ። ተጠሪነታቸውም ለኃያሉ እግዚአብሔር ነው ። መንግሥትሥ ተጠሪነቱ ለህዝብም አይደል ?
