ሽመልስ ተሊላ

ሀያሉ ፈጣሪ አላህ ጎድ እግዚአብሔር
ኢትዮጵያን ታደጋት በረቂቁ ምስጢር።
ዘር ጎሳ ጎጥ ብሔር ዘውጌ ብሎ ነገር
የሀገር ካንሰር ነው በቁም ገዳይ እውር።
ማንም የማይችለን ሰዉ የማይበግረን
ጦርነት ባህላችን ወደርየለሽ የሆን
የጀግኖችም ጀግና ተራራ አንቀጥቅጥ ነን።
ከቶም እጅ አንሰጥም
ሽጉጥ መርዜን ግጥም።
ያሉት አቦይ ስብሃት
ገደል ውስጥ ተይዘው ሲጋራዋን ጠጡዋት።
የዘረኝነትን ግፍና ጭካኔ
ከጉድጓድ ተቀብሮ ሲገኝ አረመኔ
በካቴና ታሰሮ ሲሄድ ከድቶት ወኔ
አይተሀል ሰምተሀል…ተማር ከወያኔ
ዘረኛ ዘውገኛ በልና ነግ በኔ።
ከሰውነት ባህሪይ በእጅጉ ማፈንገጥ
ሞቶ የአበቃለትን እሬሳ መቀጥቀጥ።
ከአዳምና ሔዋን ሰብዓዊ ተፈጥሮ
ከአንድ አብራክ ማህፀን በእትብት ተቋጥሮ።
የተወለደ ሰው
እሱነቱ ማን ነው?
ተጠየቅ ልጠየቅ
መልሱን በደንብ እወቅ።
ድል አድራጊው ጀግና መከላከያ ጦር
ገንጣይ ድባቅ መቶ ሕግ ሀገር ሲያከብር
የዘሩትን አጭደው ክምሩ ተወቃ
የዘረኞች ዘመን አከተመ በቃ።
ያ ሁሉ አጆሀ ያ ሁሉ ድንፋታ
እብሪቱ ተንፍሶ ቋጠሮው ተፈታ።
ሀያሉ ፈጣሪ አላህ ጎድ እግዚአብሔር
ኢትዮጵያን ታደጋት በረቂቁ ምስጢር።