በተስፋ መቁረጥ ኦነግ ሲጋለጥ

ከሃምሳ ዓመት በላይ ኢትዮጵያን ለመሰባበር ታጥቆ የተነሳው የኦሮሞ ነጻ አውጭ ግንባር (ኦነግ) ነኝ የሚለው አሸባሪና ቅጥረኛ ቡድን ፣ ሲዳክርበት ከነበረው አሮንቃ ውስጥ ሆኖ አሁን ተስፋ በቆረጠ መልኩ አቋሙን በይፋ ቁልጭ አድርጎ በአደባባይ አውጥቷል።ይህ ቀደም ሲል በሶማሊያና በአረቦች እርዳታ ኢትዮጵያን ለመሰባበር ጫካ ገብቶ ሳይሳካለት ቀርቶ በየአገሩ ተበታትኖ የነበረ ቡድን ፣ከዛሬ ሃያ አምስት ዓመት በፊት በወያኔ ጥላ ስር ተሰብስቦ የወደቀ ዓላማውን ከቤተመንግሥት ተግባራዊ ለማድረግ ሲል ኢትዮጵያን ለማፈራረስ በሚያስችለው ቻርተር አውጭነት ተሳትፎ እንደነበረና በሽግግርም ስም የሥልጣኑ ተቋዳሽ እንደነበረ የሚታወቅ ነው።“ሌባ ሲሰርቅ ይስማማል ሲካፈል ይጣላል” እንደሚባለው ከሽግግሩ በዃላ በቅርምቱ ድርሻ ላይ በተነሳ አለመግባባት ከወያኔ ጋር ተጣልቶ አገር ጥሎ ወደመጣበት የውጭ አገር ጓዳ እንደገባ የሚታወቅ ነው። ከጥቂት ዓመታት ወዲህ በወያኔና በሻብያ መካከል በተፈጠረው የጥቅም ግጭት አሥመራ ከተማ ቢሮ ከፍቶ የመንቀሳቀስ ዕድል አግኝቶ የተበታተነ ሃይሉን ለማሰባሰብና የዘረኛ መርዙን መርጨት ከጀመረ ውሎ አድሯል።ይህን የመሰለውን አገር አጥፊና የውጭ ቅጥረኛ ቡድን የሚረዱት የኢትዮጵያን አንድነትና ሰላም የማይሹ ታሪካዊ ጠላቶቿና በወረራና በዘረፋ የተካኑት የውጭ አገሮች ጭምር ናቸው። በጣም የሚያሳዝነው በኢትዮጵያ መሬት ተወልዶ፣አድጎና ተምሮ ለቁም ነገር የበቃውም ዜጋ ለዚህ አደገኛ ቡድን ጆሮውን መስጠቱና ለራሱም የሚተርፈውን የጥፋት ነጋሪት አዋጅ በትእግስት ማዳመጡ ነው።በሌላም በኩል አንዳንድ ለኢትዮጵያ ሕዝብ እንታገላለን የሚሉ ቡድኖች ለምሳሌም እንደግንቦት ሰባት አይነቶቹ ከዚሁ ዘረኛ የኦነግ ቡድን ጋር እጅ ለእጅ ተያይዘው፣ “የጠላቴ ጠላት ወዳጄ ነው”፣ወይም ወያኔን ለመጣል ከጸሃይ በታች ካለ ጋር እንስማማለን በሚል ጮርቃ ስልት ከኦነግና ከመሳሰሉት ጸረ ኢትዮጵያ ሃይሎች ጋር ተሰልፈው ማየቱ ብዙዎችን ያሳሰበ ቢሆንም አሁን የቆሙበትን ዓላማ ከጥያቄ ውስጥ ያስገባዋል።ከአሁን በዃላ እያምታቱ የሚጓዙበት ሰዓት አይደለም፣ከወሳኝ ሰዓት ላይ ደርሰናል። ጠላታችንን አውቀናል ፣በአገር ቤት ወያኔና ደጋፊዎቹ፣በውጭ ደግሞ ኦነግና የኦነግ ደጋፊዎች ናቸው። በአገር ቤት በተቀጣጠለው ሕዝባዊ ትግል የኦሮሞና የአማራው ማህበረሰብ ለጋራ መብቱ ተቀራርቦ ሲታገል ያስበረገጋቸው የኦነግ መሪዎች ሕዝቡ ለምን ተቀራረበ፣ ኢትዮጵያን የመበታተን ተልእኮአችንን አከሸፈብን በሚል ቁጭት ሰሞኑን በእንግሊዝ አገር ዋና ከተማ ለንደን ውስጥ ተሰብስበው በተናገሩት ይፋ አድርገውታል።ያም አላማቸው ኢትዮጵያን መበታተን እንደሆነ ደጋግመው ሳያፍሩና ሳይፈሩ አረጋግጠዋል።የጥላቻ ዶር.የሆነውና የሱም አውታንቲ የሆነው ጁዋር ሙሃመድ የተባለው ተላላኪ የተናገሩትን በብዙሃን የዜና ማሰራጫዎች ያልሰማ ቢኖር ጥቂቱ ነውመሰማትም ያለበት ነው።ወያኔ ሳይቀር በአገር ቤት ሕዝቡን በሸምቀቆው ውስጥ ለማስገባትና ከተሳተፈበት ትግል እንዲርቅ ለማድረግ ቅስቀሳ አካሂዶበታል። እኔ ከሄድኩ የሚጠብቃችሁ ይህ ነው ብሎም ለማስደንበር ተጠቅሞበታል።በሌላ መልኩ ሲያዩት የኦነግን ስብሰባ ወያኔ ስፖንሰር ያደረገው ይመስላል።ታዲያ ኦነግን የትግል አጋሬ ነው የሚለው ግንቦት ሰባት ምን ዋጠው? አሁንም ተቃቅፎ ይሄዳል?በኦነግም ሆነ በሌሎቹ የነጻ አውጭ ነን ብለው ከጎኑ በተሰለፉት ቡድኖች ላይ ያለውን አቋሙን ግልጽ ማድረግ ይጠበቅበታል።ያንን ካላደረገ በገንዘብና በሃሳብ የሚረዳው ኢትዮጵያዊ ጉዳዩን በጥሞና መመርመርና አቋም መውሰድ ይገባዋል። በኦሮሞ ማህበረሰብ ስም የሚነግዱ ብዙ ድርጅቶች እንዳሉ አይካድም፤ በሌላውም ማህበረሰብ ስም እንዲሁ።ዓላማቸው አንድ ሲሆን የሚለያቸው ዓላማቸውን ለመተግበር የሚሄዱበት ስልት ነው።ይህ ያልገባው የዋህ ኢትዮጵያዊ በፊለፊት የገባውን ሌባ ወያኔን እየተቃወመ በጓዳ በር ልግባ የሚለውን ሌባ እንደቤተሰብ አይቶ አጅቦ መሄድ አይኖርበትም።ሌባ ሌባ ነው ብሎ ለንብረቱ ዘብ መቆም ይኖርበታል። በዚህም ሆነ በዚያ ኢትዮጵያን እንደ አንድ አገር፣ኢትዮጵያውያንን እንደ አንድ ሕዝብ የማያይ ቡድንም ሆነ ግለሰብ መልካም አቋም አለው ብሎ መገመትና ፣በዚያ ላይ ያለ ልዩነትን የዲሞክራሲና የእኩልነት መብት አድርጎ መቀበል ጅልነት ነው። ሰው በአገሩና በማንነቱ ላይ አይደራደርም።ይህ አገር የማዳን ትግልና አላፊነት የአንድ ማህበረሰብ ብቻ ሳይሆን ከጠባብነትና ከትንሽነት ይልቅ ትልቅነትን፣ከክልል እስረኝነት፣ይልቅ የሰፊ አገር ባለቤትነትን የሚሻ፣እንደአውሬ ሳይሆን እንደጤነኛ ሰው የሚያስብ ሁሉ የሚሳተፍበት ትግል መሆን ይኖርበታል። ከሃገር ወጥቶ መንደር ውስጥ መሰግሰግ የድህነትና የአውሬ ኑሮ ናፋቂ መሆን ነው።

አገር ሲባል መግለጫው ሰንደቅ ዓላማው ነው።ማንኛውም አገር የሚኖረው ሰንደቅ ዓላማ አንድ ብቻ ነው።ሌላ ባንዲራ ማውለብለብ ማለት የተለየሁ ነኝ ማለት ነው።የተለየሁ አገር ዜጋ ነኝ ብሎ የተሰለፈን ቡድን ማጀብ እራሱ የተለየህ ነህ ብሎ ማጽደቅና መቀበል ማለት ነው።ኦሮሞ ኢትዮጵያዊ ነው ካልን የኢትዮጵያን ሰንደቅ ዓላማ ልንነፍገው አይገባም።የነውጠኞቹን ባንዲራ ተሸክሞ የሚነጉደውን የዋህ ከጥፋት ጎዳና እንዲወጣ መምከር እንጂ፣ በርታ እያሉ ከጎኑ ሊሰለፉለት አይገባም። የተለያዩ ቋንቋዎች ባህሎችና፣እምነቶች መኖር የሌላ አገር ዜጋ አያደርግም።እንደ ኢትዮጵያ ባለብዙ ቋንቋና ባህል እንዲሁም ሃይማኖት ባለቤት የሆኑ አገሮች ብዙ ናቸው።እነዚያ ግን በዛው ተዋረድ ተለያይተው እርስ በርስ ሲጋጩ አይታይም።በልዩነት አንድነትን፣በመከባበር መተባበርን መርጠው የእድገትና የሥልጣኔ ባለቤቶች ለመሆን በቅተዋል። የኦነግንና የመሰሎቹን፣ የዘር ትግል የሚያራምዱትን ቡድኖች እራሱ የራሳቸው ቋንቋ ተናጋሪ የሆነው በስሙ የሚነግዱበት ማህበረሰብ ሊታገላቸው ይገባል።አይሳካላቸውም እንጂ ቢሳካላቸው መልሰው የሚቀጠቅጡት መሆኑን ካሁኑ መገንዘብ አለበት።ብዙ የኦሮሞ ተወላጅ በኢትዮጵያዊነቱ የሚያምንና ለኢትዮጵያ አገሩም የደም ዋጋ የከፈለ ለመክፈልም ዝግጁ የሆነ ነው።በስሙ ስልጣን ይዘው መቀመቅ ሊከቱት የተነሱትን በየአገሩ ተበትነው በስሙ የሚነግዱትን ተዋርደው ሊያዋርዱት የሚቅበዘበዙትን ቅጥረኞች ወግዱ ሊላቸው ይገባል።በሰሞኑ የለንደኑ ስብሰባ የኦነግን ዓላማ የተገነዘቡት የኦሮሞ ልጆች በቁጣ ተነስተው ድምጻቸውን በማሰማት ላይ ናቸው።ኢትዮጵያዊነታቸውን አስመስክረዋል።ሌላውም እንዲሁ የዝምታንና የፍርሃትን አጥር አፍርሶ ኢትዮጵያዊነኝ ፣አትወክሉኝም ብሎ ሊያሳፍራቸው ይገባል። አሁን ጊዜው የመኖር ወይም ያለመኖር ነው።በኦነግና በመሰሎቹ ፣በወያኔና ባጃቢዎቹ የዘረኞች ካምፕ ውስጥ የሚከናወነው ደባ በተባበረ የኢትዮጵውያውያን ክንድ መሰበር አለበት።እነሱን ማሶገድ ማለት ኢትዮጵያን ከመበታተን፣ እራስን ከእልቂትና ከሽብር ማዳን፣ሁሉንም የሚያገለግልና የሚያረካ ስርዓት ማስፈን ማለት ነው።መቀራረብና መነጋገር የሚቻለው አንድ አይነት ዓላማና ፍላጎት ካለው ጋር እንጂ ልዩ ነኝ ከሚልና ሊያጠፋ ከመጣ ጠላት ጋር አይደለም።ስለሆነም ኢትዮጵያዊ ነኝ የሚል ድርጅትም ሆነ ስብስብ ከኦነግና ከመሳሰሉት ጋር መደራደሩን ማቆም አለበት።ግንኙነቱ በግልጽ ያጥፊና የጠፊ እየሆነ መጥቷል።ለይቷል! እራስንና አገርን ከአደጋ ለማዳን ከሚሹት ጋር ውይይት ማድረግ እንጂ በስም ከሚለዩ ከጥፋት ሃይሎች ጋር መደራደር አይገባም።ትልቅ ስህተት ነው።ምርጫው ከጅንጀሮ ቆንጆ ነው።ትግሉ የወያኔን ስርዓት በኦነግ ወይም በተመሳሳይ ስርዓት ለመተካት አይደለም።መሆንም የለበትም።የዘረኞችን ስርዓትና ዓላማ የሚደመስስ ፣ዳግም አምባገነኖች የሚፈልቁበትን ምንጭ የሚያደርቅ መሆን አለበት። መጃጃል ይብቃ! የአንድነት ሃይሉ በዚህ ወሳኝ ወቅት መሰባሰብ አለበት!
ኢትዮጵያ በነጻነት ለዘላለም ትኑር!! ፣
አገሬ አዲስ