በሁሉም አከባቢ ያሉ ፀረ-ዴሞክራሲያዊ ብሄርተኞች ሃገር የቆመበትን ምሰሶ የሚቦረቡሩ ቅንቅኖች ናቸው – መሰረት ተስፉ

እንደኔ ፍላጎት ቢሆን ቢያንስ በሶስት አራተኛ የህዝብ ድምፅ ተቀባይነት ያገኘ የትኛውም ቋንቋ ብሄራዊና የስራ ቋንቋ ቢሆን እመርጣለሁ። ባህሎችና ወጎችም እንዲሁ። ምክንያቱም ህዝቡ የመረጣቸው ቋንቋና ባህል የጥላቻና ያለመግባባት መነሻ አይሆኑም ነበር። ይህ ግን ቢያንስ አሁን ባለው የጦዘ የብሄርተኝነት ፖለቲካ የተነሳ የሚሆን አይመስልም። ይልቁንም የብሄርተኝነት ፖለቲካው በምን መልኩ ጤነኛ እንዲሆን ማድረግ ይቻላል በሚሉ ጉዳዮች ዙሪያ ሃሳብ ብንለዋወጥ፣ ብንነጋገር፣ ብንከራከር ይሻላል ባይ ነኝ።

Oromo Milበዚህ መሰረት ቢዚህ ፅሁፍ ውስጥ ስለብሄርተኝነት ያለኝን ግንዛቤ ለመግለፅ እሞክራለሁ። ብሄርተኝነት በተለያየ መንገድ ሊገለፅ ይችላል። አንዱ ዴሞክራሲያዊ የሆነ ብሄርተኝነት ሲሆን ሌላው ደግሞ ፀረ ዴሞክራሲያዊ ብሄርተኝነት ነው። ፀረዴሞክራሲያዊ የሆነ ብሄርተኝነት በተፈጥሮው የስግብግብነት፣ የግለሰበኝነት፣ የአግላይነት፣ የአምባገነንነት፣ የጠቅላይነት፣ የጭፍላቂነት፣ የመርህ አልባነት ምንጭ ነው ይህ አስተሳሰብ የተጠናወታቸው ሃይሎች የምንጊዜም ትኩረታቸው የኔ ነው የሚሉትን ህዝብ ሳይሆን ቡድን ጥቅሞች ማስጠበቅ ነው። እነዚህ ሃይሎች ካራሳቸው ቡድን አሻግሮ የማየት ፍላጎት የሌላቸውና ቢያዩም እንኳ ሌላውን ጥሎ በማለፍ የራሳችን ነው የሚሉትን ቡድን ለመጥቀም ብቻ ነው። በዚህ አስተሳሰብ የተለከፉ ሃይሎች በተለይ የመንግስትን ስልጣን ከተቆጣጠሩ በሃገርም ሆነ በህዝቦች አንድነት ላይ ሊያስከትሉት የሚችሉት አደጋ በቀላሉ ሊገመት የሚችል አይሆንም። የፀረ- ዴሞክራሲያዊ ብሄርተኞችን አደጋ በሚገባ ለመረዳት ከተለያዩ ጉዳዮች ጋር በማያያዝ በሚከተለው መንገድ ለማብራራት መሞከር ጠቃሚ ነው ብየ አምናለሁ።

አስተዳደር፡

ፀረ-ዴሞክራሲያዊ  የሆኑ ብሄርተኛ ሃይሎች የሚከተሉት  የስተዳደር ዘይቤ ዝግ የሆነና በተቻለ መጠን ሌሎችን የሚያርቅ ነው። ስለዚህ ዋና ዋና ናቸው ተብለው የሚገመቱ ተቋሞችን የራሳችን ናቸው በሚሏቸው ሰዎች እንዲሞሉ ያደርጋሉ። ሌሎች እንዲሳተፉ ቢያደርጉ እንኳ ከራሳቸው ጥቅም አኳያ ብቻ እየመዘኑና እየቃኙ ነው። በዚህ አይነት አስተዳደር ውስጥ ግልፅነት የሚባል አሰራር አይታሰብም። ሁሉም የሚፈፀመው በድብቅ ነው። ምክንያቱም ግልፅ የሆነ አሰራር ቢኖር የሚሰራው ሁሉ አደባባይ ይወጣና በቀላሉ ለትችትና ለጥላቻ ይዳርጋል። ለነዚህ ሃይሎች ተጠያቂነት የሚባል ነገርም ጉዳያቸው አይደለም። ተጠያቂነት ተግባራዊ የሚሆን ከሆነም ከፀረ-ዴሞክራሲያዊ ብሄርተኛው ሃይል ውጭ ባሉ አካላት ላይ ያተኩራል። በእርግጥ እነዚህ ሃይሎች ስግብግብ ጥቅማቸውን ለማሳካት እንቅፋት ይሆኑኛል ብለው ካሰቡ የራሳቸውን ብሄር አባላትም ቢሆን የተለያየ ሰበብ በመፍጠር ከማስወገድ ወደኋላ አይሉም።  የሚሰሩት ስራ ትክክል እንዳልሆነ ስለሚያውቁም ፍፁም የሆነ አታላይነት፣ አጭበርባሪነት፣ ሸንጋይነትና በዋነኛነት ደግሞ አምባገነንነት የሚያጠቃቸው ሃይሎች ናቸው። ለዚህ እንዲያመቻቸው ዋና ዋና የፀጥታ ተቋማትን ለመቆጣጠር ጥረት ያደርጋሉ። የሚታገላቸውና የሚተቻቸው ሃይል ካጋጠማቸውም የተለያየ ስም በመለጠፍ በዙሪያችው ባደራጁት የፀጥታ ሃይል ለመጨፍለቅ በሚችሉት መንገድ ሁሉ ይጥራሉ።  በጥቅሉ መልካም አስተዳደር ማስፈን የሚባል ነገር በብሄርተኞች ዘንድ አይታሰብም።

የህግ የበላይነት፡

ፀረ ዴሞክራሲያዊ ብሄርተኝነትና የህግ የበላይነት ሆድና ጀርባ ናቸው። የህግ የበላይነት በሚከበርበት ስርዓት ውስጥ ሁሉም ሰው እኩል ከመታየቱ በተጨማሪ እኩል ጥበቃም ይደርግለታል። ፀረዴሞክራሲያዊ የሆኑ ብሄርተኞች ግን ከነሱና ከቡድናቸው ውጭ ያለው ማህበረሰብ እኩል እንዲታይም ሆነ እኩል ጥበቃ እንዲደርገለት አይሹም። ለምሳሌ እነዚህ ሃይሎች የራሳችን ነው ከሚሉት  ቡድን አንድ ተቀናቃኝ  ቢኖራቸውና  ከነሱ ቡድን ውጭ ካለው የማህበረሰብ ክፍል ደግሞ ሌላ ተቀናቃኝ ቢኖራቸው የተሻለ ጥበቃ የሚያደርጉለት እንኳ ከራሳቸው ብሄር ለወጣው ተቀናቃኛቸው መሆኑ አይቀርም።

ሰላም፡

ፀረ ዴሞክራሲያዊ የሆኑ ብሄርተኞች ቅድሚያ የሚሰጡት የራሳችን ነው ለሚሉት ቡድን ሰላም ነው። የሌላው ሰላም የሚያሳስባቸው ከሆነም የራሳቸውን ሰላም የሚያደፈርስባቸው መስሎ ሲሰማቸው ብቻ ነው። ከዚያ ውጭ ባለው ሁኔታ ምናልባትም ከነሱ ቡድን ውጭ ያሉት የማህበረሰብ ክፍሎች ሰላማቸውን ቢያጡ ሊፈልጉት ይችላሉ። በራሳቸው ድብቅ ሴራም የሌሎች ሰላም እንዲረበሽ ከማድረግ ወደኋላ አይሉም። አንዳንዴም ራሳቸው የሚያስተዳድሩት አከባቢ በሰላም ማጣት እየተናጠ የሰላም አባት መስለው በመታየት ሌሎች ጋር ገብተን እንፈትፍት የሚሉበት ሁኔታ ይኖራል። ይህን የሚያደርጉት ሰላም እንዲመጣ ፈልገው ቢሆንም ጥሩ ነበር። መነሻቸው ግን የሌሎቹን ግጭቶች አባብሰው በሚፈሰው ደም ትርፍ ለማግኘት የሚጠቀሙበት እጅግ በጣም ርካሽ የሆነ ፖለቲካዊ ስሌት ነው።

ልማት፡

ፀረ ዴሞክራሲያዊ የሆኑ ሃይሎች ፍትሃዊ የሚባል የልማት ክፍፍል ጉዳያቸው አይደለም። በተቻላቸው መጠን ሁሉ ቅድሚያ የሚሰጡት የራሳችን ነው ለሚሉት አከባቢ ነው። ሲጀመር ፍትሃዊና ሚዛናዊ የሆነ የልማት ቀመር እንዲኖር አይፈቅዱም። ከዚህ በመነሳትም  በቻሉት መጠን የተለያዩ ምክንያቶችንና ሰበቦችን በመደርደር ቀመሮቹ ሁሉ የራሳቸውን አከባቢ በተለየ መንገድ ለመጥቀም በሚያስችል መልኩ እንዲቀረፁ የሚችሉትን ሁሉ ጥረት ያደርጋሉ።

ቋንቋና ባህል፡

በቋንቋ ጉዳይ አንድ ወጥ የሆነ እይታ በሌለበት አገር ፀረ ዴሞክራሲያዊ ብሄርተኞች በሁኔታዎች ካልተገደዱ በስተቀር የሌላውን ቋንቋ መናገር አይፈልጉም። የራሳቸው ቋንቋ ግን በሌሎች እንዲነገር የማይፈነቅሉት ደንጋይ አይኖርም። አንዳንዶቹ እንዲያውም የሌላውን ቋንቋ በማዳከም የራሳቸው ቁናቋ ከፍ ብሎ እንዲታይ ለማድረግ ጥረት ሊያደርጉ ይችላሉ። እነዚህ ሃይሎች ምንጊዜም በእኔነት አባዜ የሚናውዙ በመሆናቸው የተለያዩ ቋንቋዎች እኩል ቢዳብሩ ለህዝቦች ግንኙነት መጠናከር የሚያበረክተው አስተዋፅዖ አይታያቸውም። የራሳችን ነው የሚሉት ባህል ወይም ወግ  እድገትና ተቀባይነት እንጅ የሌላው አያሳስባቸውም። ምናልባትም ልክ እንደቋንቋቸው ሁሉ እነሱ የሌላውን ባህል ሳያከብሩ ወይም ለማዳከም እየዳከሩ ሌላው የነሱን እንዲያከብርላቸው የሚፈልጉ ሃይሎች ናቸው።

ሰብዓዊ መብቶች፡

ፀረ ዴሞክራሲያዊ ሃይሎች የሁሉንም ዜጎች መብቶች እኩል የማስከበር ቁርጠኝነት የላቸውም። በተነፃፃሪነት ከታየ ግን የራሳችን ነው የሚሉት ቡድን ሰብዓዊና ዴሞክራሲያዊ  መብቶች እንዲከበሩ አንዳንድ እንቅስቃሴዎችን ሊያደርጉ ይችላሉ። የተለያየ ቦታዎች ላይ በተመሳሳይ መንገድ በተፈፀመ ድርጊት ሰዎች ቢጎዱ መርጠው የሚጮሁት የኛ ነው ለሚሉት ቡድን አባላት መሆኑ አይቀርም። በነሱ አከባቢ በሌሎች ላይ ጥቃት ቢፈፀም ግን የተለያየ ሰበብ በመደርደር አጥቂውን ለመከላከል የማይፈነቅሉት ደንጋይ አይኖርም። አስፈላጊ ከሆነም ተጠቂውን ጥፋተኛና ወንጀለኛ አድርገው በመቁጠር ተጠያቂ ሊያደርጉት ሁሉ ይችላሉ።

ከአጥቂውና ከተጠቂው ውጭ ያሉ ሌሎች ብሄርተኞች ደግሞ እነሱን እስካልነካቸው ድረስ እንደነገሩ ሁኔታ  ድርጊቱን ከማውገዝም ሆነ ከመደገፍ ይቆጠባሉ። ነገሮች ገፋ ብለው ከቀጠሉም ጡንቻ አለው ብለው ለሚያስቡት ሃይል ወግነው መጮህ ሊጀምሩ ይችላሉ።

ህዝባዊነት፡

ፀረ-ዴሞክራሲያዊ ብሄርተኞች ህዝባዊነት የሚባል ነገር አልፈጠረባቸውም። እነዚህ ሃይሎች ራሳቸው ለወጡበት ብሄር/ብሄረሰብ እንኳ አይጨነቁም። ብሄራችን ካሉም በስሙ ሊነግዱበት ካልሆነ በስተቀር ሊጠቅሙት አይደለም። ሲፈልጉ የወጡበትን ብሄር ከሌላው ጋር እያጋጩ የፖለቲካ ትርፍ ሊያገኙበት ይጥራሉ። ካልተመቻቸው ደግሞ ሌሎች ብሄሮችን በማጋጨትና በማባላት  የራሳቸውን የበላይነት ለመጫን ይሞክራሉ።

የሚገርመው ነገር ደግሞ ፀረ-ዴሞክራሲያዊ ብሄርተኞች የራሳችን ነው የሚሉትን ቡድን ለመጥቀም የሚንቀሳቀሱት ለራሳቸው የሚጠቅማቸው መሆኑን እርግጠኛ ሲሆኑ ብቻ ነው። ከዚያ ውጭ ግን ደንታ ቢሶች ናቸው። በተጨማሪም እነዚህ ሃይሎች ሌሎችን የሚፈልጉት ራሳቸው ብልጫ ይዘው ሌሎቹ እንዲያኗኑራቸው እንጅ በእኩልነት መርሆዎች ላይ ተመስርተው አብረው እንዲኖሩ አይደለም። ያ እንደማይሆን ባወቁ ጊዜ ግን ራሳቸውን ለመቻል ሲሉ አገር በጥብጠው ሊነጠሉ ምናልባትም ደግሞ በልተው ለበይ ሊሰጡ ይችላሉ። ከዚህ በመነሳት ፀረ ዴሞክራሲያዊ የሆኑ ብሄርተኞች የሃገርን ቋሚ ምሰሶ የሚቦረቡሩ ቅንቅኖች ናቸው ቢባል ስህተት የሚሆን አይመስለኝም።

ይቀጥላል…………

መሰረት ተስፉ (Meserettesfu4@gmail.com)

ሀሃሳብ እና አስተያትዎን ይስጡ

Your email address will not be published.