በምድር ላይ ያሉ የመጨረሻ የክፋት መገለጫዎችን ከመፈፀም ወደ ኋላ የማይመለሰው ይህ ከሃዲ ቡድን

Demeke በምድር ላይ ያሉ የመጨረሻ የክፋት መገለጫዎችን ከመፈፀም ወደ ኋላ የማይመለሰው ይህ ከሃዲ ቡድን በተለያዩ ክልሎች ፅንፈኞች እና አሸባሪዎችን እያስተባበረ፣ ስምሪት እየሰጠ እና በፋይናንስ እየደገፈ በማንነት ላይ ያነጣጠረ ጭፍጨፋ መፈፀሙን ቀጥሎበታል፡፡
በተመሳሳይ በማይካድራ አካባቢ በንፁኃን ዜጎቻችን ላይ የደረሰው እጅግ ልብ ሰባሪ፣ ኢሰብዓዊ እና ፍፁም አሳዛኝ ዘር-ተኮር ጭፍጨፋ በከሃዲው ቡድን አስተባባሪነት የተፈፀመ ይቅር የማይባል ወንጀል ነው፡፡ ይህ ጭፍጨፋ እጅግ ሰው መሆንን ጥያቄ ውስጥ የሚከት ዘግናኝ ድርጊት ነው፡፡
ሁላችንም እንደታዘብነው ከሃዲው ቡድን ከቀናት በፊት በሰሜን ዕዝ የመከላከያ ሰራዊታችን ላይ የፈፀመው አሳዛኝ ጭፍጨፋ ሳይበቃው፤ አሁንም በንፁኃን ዜጎች ላይ የዘር ማጥፋት እርምጃ መውሰዱን አጠናክሮ ገፍቶበታል፡፡
እኩይ ድርጊቱን የቀጠለበት ዓብይ ምክንያት የኢትዮጵያውያንን አንድነት እና የአብሮነት ክብር ለማዋረድ ቆርጦ የተነሳበትን ዓላማ እስከመጨሻዋ ሰዓት ድረስ ለማስፈፀም ነው፡፡
ኢትዮጵያ በዘመናት ገፀ-ብዙ ፈተናዎች ያሳለፈች ሃገር ብትሆንም፤ በታሪኳ እንደህውሃት ዓይነት የወጣለት አረመኔ እና የጭካኔ ጫፍ የተቆናጠጠ ወንጀለኛ ቡድን ገጥሟት አያውቅም ለማለት ይቻላል፡፡
ይህ ቡድኑ ከአፈጣጠሩ ጀምሮ ፀረ-ኢትዮጵያ የሆነ የተግባር ስሪት አራማጅ እንዲሁም ፀረ-አማራ የሆነ የአስተሳሰብ ቅኝት ወላጅ ሆኖ ለበርካታ ዓመታት ሰፊውን ማህበረሰብ ሲያደናግር ቆይቷል፡፡
በተፈጠረበት ቅኝት እና ባደገበት ስሪት ሁልጊዜ “የበላይ” ሆኖ ለመኖር ካለው የተንጠራራ ምኞት፤ ከሌሎች የሃገራችን ህዝቦች ጋር በእኩልነት መራመድ ውርደት ስለሚመስለው “ጥፋት”ን የስነ-ልቦና ስብራቱ ማካካሻ አድርጎት ዘልቋል፡፡
በአሁን ሰዓት ሃገራችን በእጅጉ ፍትህን ተጠምታለች፤ ህዝብ እና መንግስት በጀመሩት የጋራ ርብርብ የከሃዲያኑን ስብስብ በፍጥነት ወደ ህግ ያቀርቡታል፤ እንዲሁም በማያዳግም ሁኔታ ያስወግዱታል፡፡
አሁንም ከሃዲ ቡድኑ በአንድ በኩል “ሰላም” በሌላ በኩል “ጥፋት” እያጣቀሰ ጊዜ ለመግዛት የሚያደርገው ጥረት ብዙ ርቀት የሚያደርስ ባለመሆኑ፤ ለዕውነት እና ለፍትህ መረጋገጥ ሲባል መንግስት የጀመረው ህግና ስርዓት የማስከበር ኦፐሬሽን እስከመጨረሻው ተጠናክሮ የሚቀጥል ይሆናል፡፡
~~~~~
የምክትል ጠቅላይ ሚኒስተር አቶ ደመቀ መኮነን
ህዳር 2፣ 2013 ዓ.ም
አዲስ አበባ

ሀሃሳብ እና አስተያትዎን ይስጡ

Your email address will not be published.