ለእኛ ያለነው እኛው ነን፤ ኢትዮጵያን አለንሽ እንበላት – ጠቅላይ ሚኒስትር ጽሕፈት ቤት

PM Officeየጠቅላይ ሚኒስትር ጽሕፈት ቤት ዛሬ ባወጣው መግለጫ ለእኛ ያለነው እኛው ነን፤ ኢትዮጵያን አለንሽ እንበላት ሲል በፌስቡክ ገጹ አስፍሯል፡፡
የመግለጫው ሙሉ ሐሳብ እንደሚከተለው ቀርቧል፡፡
ኢትዮጵያ በፍጣሪዋ ታምና በሕዝቧ አንድነትና ጽናት የቆመች ሀገር ናት። ጥቂት ሰጥተው ብዙ ሊያዟት በሚሞክሩ ተማምና አታውቅም። ሕይወታቸውን ሰጥተው ሊታዘዟት በተዘጋጁ ልጆቿ እንጂ። ኢትዮጵያን የፈጠራት አምላኳ ነው። የገነቧት ደግሞ ልጆቿ ናቸው። እነዚህ ልጆቿ በከፈሉት መሥዋዕትነት ዓለምን ጉድ ያሰኙ ታሪኮችን ሠርታለች። እነዚህን አስደናቂ ታሪኮችን ስትሠራ አብረዋት ታሪክ የሠሩ ወዳጆች ነበሯት። የከዷት ወዳጆችም ነበሩ። ይህ ለኢትዮጵያ አዲስ አይደለም።
ነገር ግን የዓለም ታሪክ ያረጋገጣቸው ሁለት ሐቆች አሉ። ኢትዮጵያን ነክቶ በሰላም የኖረ የለም የሚለው ቀዳሚው ነው። ኢትዮጵያውያን በአንድነት ለአንድ ዓላማ ከቆሙ ድል ማድረጋቸው አይቀርም የሚለው ደግሞ ሁለተኛው። የሕዳሴው ግድብ የኢትዮጵያ ግድብ ነው። ኢትዮጵያውያን፣ አሰቡት፤ ኢትዮጵያውያን ጀመሩት፤ ኢትዮጵያውያን ገነቡት፤ ስለዚህ ኢትዮጵያውያን ይጨርሱታል። አይቀሬ ነው።
የሚያዋጣን ኅብረት አንድነታችን ነው። ለእኛ ያለነው እኛ መሆናችንን ዐውቀን ስለ እኛ ጉዳይ እኛው ራሳችን ኢትዮጵያን አለንሽ እንበላት። ኢትዮጵያውያን አንድ ሆነን ለኢትዮጵያ እንቁም። ከባዱ ፈተና ከውጭ የሚመጣው አይደለም። ከባዱ ፈተና ተለያይተን ችግሩን ከተጋፈጥነው ነው።
ማንም ገዝቶን አያውቅም። ወደፊትም ማንም አይገዛንም። ታሪክ የሠሩ እጆች ዛሬም አሉ። ኢትዮጵያና ኢትዮጵያውያን ወዳጆቻቸውን ለማክበር እንጂ ጠላቶቻቸውን ለመታዘዝ ተንበርክከው አያውቁም። ዛሬም ወደፊትም አናደርገውም።
ክንዳችንን እናበርታ። ትከሻችንን እናስፋ። ልባችንንም እናጽና። ከውጭና ከውስጥ የተሠነዘረብንን ጥቃት ድል አድርገን መሻገር ብርቃችን እንዳልሆነ እናስመስክር።
በምንምና በማንም ካሰብነው መንገድ እንቀርም። ያቀድነውን ከማሳካት የሚያግደን ምድራዊ ኃይል የለም። አንድ ሆነን የምንይዘው ጋሻ ኃያላኑን ሁሉ ሲመክት የኖረ ነው። ዛሬም ያንን ጋሻ በአንድነት እናንሣ። ሁላችንም፣ በየቦታችን፣ 24 ሰዓት፣ ለኢትዮጵያ እንቁም።

3 Comments

  1. እንዲህ ባአማራ ደም እንደቀለድህ አትቀርም !!! ደማቸው ወደ እግዛብሄር ይጮሀልና !!!

  2. “ለእኛ ያለነው እኛ መሆናችንን ዐውቀን ስለ እኛ ጉዳይ እኛው ራሳችን ኢትዮጵያን አለንሽ እንበላት”

    Haven’t you thought this day will come when you were killing the Amhara in thousands? And, now you cry for help.

  3. ሰለየትኛዋ ኢትዮጵያ ነው የሚያወራው? እያጠፋት ያለችውን ኢትዮጵያ ነው/ ይሄ የአፍ ሽንገላው ይመራል፡፡
    ጀግኖች አባታቶቻችን አያቶቻችን አጥንታቸውን ከስክስው የገነቡትን አገራችንን ይሄ አዛብ ፕ/ሚር ይበላቀጥበታል!! አማራን እያሳረደ የግልሰቦች ጸብ ነው እያለ ዜና ያስተላልፋል፡፡ እንደመሪ ሳይሆን እንደሰው እንኳን አስቦ ያለውን ችግር የብሄር የቋንቋ የኦርቶዶክስ ሃይማኖት ግድያ መሆኑን እንኳን መናገር አይፈልግም፡፡ ፕ/ሚሩ ደሞዝ የሚክፍላቸው አጋሰስ ክብቶች ይሄው ስንት ወራቶች አለፉ የነፍስ ግድያ ተባባሪ በመሆን ማህረሰቡን እያሳቀቁት ነው፡፡ አታላግጥብን!

ሀሃሳብ እና አስተያትዎን ይስጡ

Your email address will not be published.