እዚያም ሊያ እዚህም ሊያ የሁለቱ እንስቶች ተቃርኖና ተመሳስሎሽ – ከመርሐጽድቅ መኮንን አባይነህ

Liya
ሊያ ካሳና ሊያ ታደሰ

ለመሆኑ ሊያ ካሳና ሊያ ታደሰ ማንና ማን ናቸው?

ሁለቱን ሊያዎች ከተጸውኦ ስማቸው በስተቀር የሚያገናኛቸው ነገር ይኖር ይሆን?

እንግዲህ እኔ ያለኝን ግርድፍ መረጃና በዚያ ላይ ተመስርቶ የተቀረጸውን ምልከታዬን ባጭሩ ላቅርብላችሁና የራሳችሁን ደግሞ በራሳችሁ አክሉበት፡፡

ያችኛዋ ሊያ የህዝባዊ ወያኔ ሀርነት ትግራይ (ህ.ወ.ሀ.ት)  አፈ-ቀላጤ ወይም የትግራይ ክልላዊ መንግሥት ኮሚዩኒኬሽን ጉዳዮች ቢሮ ኀላፊ ናት፡፡

ይህችኛዋ ሊያ ደግሞ ማታ ማታ ‘ጤና ይስጥልኝ’ እያለች ወደየቴሌቪዢን መስኮቶቻችን ከፈገግታ ጋር ብቅ ስትል የምናውቃትና የቤተ-ሰብ ብርቅዬ ወዳጅ ያህል የለመድናት የሀገራችን የጤና ጥበቃ ሚኒስትር ናት፡፡

የሰዎችን ተፈጥሯዊ ተመሳስሎሽና ተቃርኖ በጥሞና መታዘብ ምንኛ ያስደምማል ጎበዝ?

እዚያ ማዶ ያለችው ሊያ ካሳ አይኗን በጨው አጥባ መላ ሀገሪቱን ጨምሮ በክልሉ ውስጥ እንደሰደድ እሳት እየተስፋፋ የመጣውን የኮሮና ቫይረስ በሽታ ለመከላከልና የወረርሽኙን አስከፊነት ለማሕበረ-ሰቡ ይበልጥ ለማስገንዘብ እንዲያመች የልዩ ሀይሉን ሰራዊት ከታጠቀው ብሬን ጋር በአደባባይ ማሰለፍና በፉከራና በሽለላ የታጀበ ወታደራዊ ትርኢት ማሳየት ያለውን ጠቀሜታ ልታስረዳን የባጥ የቆጡን ትቀባጥራለች፡፡

እዚህ ማዶ ያለችው ሊያ ታደሰ ደግሞ ውድ ወገኖቿ በአደገኛው ቫይረስ እንዳንጠቃባት ጭንቅ ጥብብ እያለች አስቀድመው በተጎዱባትና ይህችን አለም በሞት በተሰናበቱ ዜጎች ህልፈተ-ህይወት ልቧ በመሪር ሀዘን እየተሰበረና እንባዋ እያቀረረ አካላዊ ርቀታችንን ጠብቀን እንድንቀመጥም ሆነ እንድንንቀሳቀስ ብቻ ሳይሆን አይንና አፍንጫዎቻችንን በማስክ እንድንሸፍን በየምሽቱ ያለመታከት አጥብቃ ትመክረናለች፣ ታስጠነቅቀናለችም፡፡

ምግባረ-ብልሹነት አብዝቶ የተጣባት የምትመስለው የሊያ ካሳ ሀሰተኛና ይሉኝታቢስ መግለጫ እዝነ-ህሊናን ክፉኛ ይበክላል፣ ያቆሽሻልም፡፡

ፍጹም ትህትናና የተሟላ ስነ-ምግባር የዘወትር ገንዘቧ ከሆነው ከዶ/ር ሊያ ታደሰ ጥኡም አንደበት ግን የማር ወለላ ያለማቋረጥ ይፈሳል፡፡

እንደመታደል ሆኖ ይህችኛዋ ሊያ ምሽቱን እየጠበቀች ወደየመኖሪያ ቤቶቻችን ብቅ ባለች ቁጥር የምትጠቀምባቸው ቃላት ምጥንና በወጉ የተመረጡ ናቸው፡፡

የዚያ ማዶዋ ሊያ ግን እንደአንድ የህዝብ ግንኙነት የበላይ ሹም መሽቶ በነጋ ቁጥር ድንገት ወደሚዲያ እየወጣች ባልተገራ አንደበቷ በመረጃ ስም የምትለቃቸው ፍሬ-ከርስኪ ወሬዎች ደረቅና በቀላሉ ተላምጠው የማይልሙ ሆነው እናገኛቸዋለን፡፡

ሊያ ካሳ የእህልና ውሃ ነገር ሆኖባት “ሳትዋጋ ንገሥ ቢሉት ግድ ተዋግቼ” በማለት በወገኖቹ ላይ ጦር ለሚሰብቀውና ጠብመንጃ ለሚወለውለው ቡድን አድራ እድሜውን ለማራዘም ከጠዋት እስከማታ አንዳች መታከት ሳይታይባት እንደቁራ ስትጮህ እንከታተላታለን፡፡

ባለፈው ሀምሌ 26 ቀን 2012 ዓ.ም በመቀሌ፣ በማይጨው፣ በሁመራና በአላማጣ ከተሞች የተካሄደውን የጠብ አጫሪነት ትእይንተ-ህዝብ ጠባይ አስመልክቶ ሴቲዮዋ ለመገናኛ-ብዙኃን የሰጠችው የተዛባ መግለጫ የዚህ አይነተኛ ማሳያ ተደርጎ ሊወሰድ ይችላል፡፡

ሩቅ መሄድ ሳያስፈልግ የትግራይ ክልል ጸጥታ ቢሮ ራሱ “ሠላማችንን ለመጠበቅ ያለንን ዝግጁነት ያሳያል” ሲል ነበር ያንኑ ግዙፍ የታጣቂዎች ሰልፍ በተቃራኒው ተኩራርቶ በድህረ-ገጹ ላይ አስፍሮት የተመለከትነው፡፡

ዶ/ር ሊያ ታደሰ ግን በኮቪድ 19 ምክንያት ብሔራዊ ምርጫ ቦርድ ባሳሰበው መሰረት ምርጫው እንዲራዘምና ለህዝቡ ደህንነት ቅድሚያ እንዲሰጥ ጥብቅና ትቆማለች፣ እማኝነቷንም በአደባባይ ለመግለጽ አልተሸማቀቀችም፡፡

ሊያ ካሳ ኢትዮጵያውያንና ኢትዮጵያውያት በሠላም ውለን ማደራችን ራሱ ክፉኛ እየከነከናት የጦርነት ነጋሪት የሚጎሰምባቸውን የህ.ወ.ሀ.ት ተከታታይና የማያባሩ ድንፋታዎች ተቀብላ ኀላፊነት በጎደለው መንገድ በየእለቱ እያስተጋባች ስጋታችንን የበለጠ ታንረዋለች፡፡

ሊያ ታደሰ ግን ምን ጊዜም ቢሆን ከመዘናጋት ተቆጥበን ራሳችንንና ቤተ-ሰቦቻችንን ከወረርሽኙ ጥቃት እንድንከላከል በየደቂቃው እየወተወተች በህይወት የመቀጠል ተስፋችንን ታለመልመዋለች፡፡

ወገኖቼ ምን አለፋችሁ፤

ከተጸውኦ ስማቸውና ከጾታቸው በስተቀር እነዚህን ሁለት ቱባ እንስቶች የሚያመሳስላቸው ሳይሆን የሚያለያያቸው ባህርይ እንደሚያመዝን በቀላሉ ለመገንዘብ አያዳግተንም፡፡

ለነገሩ ‘የእናት ሆድ ዥንጉርጉር’ ሆኖ ነው እንጂ የዳር አገሯም ሆነች የመሃል አገሯ ሊያዎች ሁለቱም ከዋክብት እህቶቼ የትግራይ ማህጸን ፍሬዎች ናቸው መባልን በጭምጭምታም ቢሆን ሰምቻለሁ፡፡

አጃይብ ነው እኮ ዘመዶቼ!!!

 

ሀሃሳብ እና አስተያትዎን ይስጡ

Your email address will not be published.