ነገን ለማሳመር ከትናንት መማር ይኖርብናል – ከመርሐጽድቅ መኮንን አባይነህ

እንደማኮብኮቢያ

Merha Tibebወቅታዊው የሀገራችን የፖለቲካ ትኩሳት ተባብሶ ከእለት ወደእለት እየተወሳሰበ የሄደ ይመስላል፡፡ ለአራዊት አስተዳደር እንኳ ይመጥናል ተብሎ የማይታመነው አስቀያሚ የብሔር ፖለቲካችን ጡዘት የመጨረሻው ጠርዝ ላይ ደርሶ ሕብረ-ብሔራዊ አንድነታችንን ለማፈራረስ በጋራ ምለውና ተገዝተው በተነሳሱ እኩያን ሟርተኞች አስቀድሞ የተተነበየውን ያህል ባይሆንም የአንዲት እናት አገር ውድና ብርቅዬ ልጆች ከዚህ በቀደመው ዘመናችን ታይቶ በማይታወቅ ሁኔታ በዘር፣ በቋንቋና በትውልድ ሀረግ እየተቧደንን እርስበርሳችን አለአግባብ ወደመንቆራቆሱና አንዳንዴም በቡጢ ወደመቧቀሱ ማምራት ከጀመርን ትንሽ ሰነባብተናል፡፡

እነሆ የመላ ወገኖቻችንን ልብ ክፉኛ በሚያደማ ሁኔታ ‘ማነው ባለሳምንት’? እየተባለ ሰዎች በማንነታቸውና በሚከተሉት እምነት እየተመረጡ ሲጠቁና አረመኔያዊ የጭካኔ በትር በላያቸው ላይ እያረፈ ህይወታቸው በከንቱ ሲያልፍና አካላቸው ሲጎዳ እንደዋዛ እያየን፣ እየታዘብን ነው፡፡

ዜጎች እድሜ ዘመናቸውን ሙሉ በላባቸው ጥረውና ግረው ያፈሩት አንጡራ ሀብትና ንብረት ሳይቀር በግፈኞች እርምጃ በጠራራ ጸሃይ እየወደመ ዶግ አመድ ሲሆን ማየትና መስማት እየተለመደ መጥቷል፡፡

እኛ ኢትዮጵያውያን እንደአንድ ሥልጡን ህዝብ ዘግይተን ከታጠቅነው ዘመናዊ ሕግና ስርአት ባሻገር እጅጉን የበለጸገ፣ የዳበረና አንደኛው ማሕበረ-ሰብ ከሌላኛው ጋር በጥብቅ የሚተሳሰርበት አቃፊ ወግ፣ ባህልና እሴት ያልነበረን ይመስል ለምን በዚህ ደረጃ እስከመጨካከን እንደደረስንና እርስበርስ መጠፋፋት እንዳማረን በውል መጤን አለበት፡፡  ይልቁንም ቀስ በቀስ እየገባንበት ካለው አደገኛ የምስቅልቅል አዘቅት በአፋጣኝ ለመውጣት ቆም ብለን ማሰብና በየሰፈሩ ሸንጎ እየተቀመጥን የምራችንን በመምከር እንደገና የምናንሰራራባቸውን ብልሃቶች ማፈላለግና ወደቀደመው የተከበሩ እሴቶች ማማችን መመለስ ይኖርብናል፡፡

የሀጫሉ ግድያ አዲስ የሽብር ማቀጣጠያ ሰበብ ወይስ የተራዘመው መከራችን ማክተሚያ?

ኢትዮጵያና ወርሀ-ሰኔ እንደተኳረፉ ቀጥለዋል፡፡ ለክረምቱ የእርሻ ስራችን ዘወትር ተዘጋጅተን በተስፋ የምንጠብቀው እርጥቡ የሰኔ ወር ለምን ከተዳጋሚ ረብሻ ጋር መላልሶ እንደሚጎበኘን ፈጽሞ ግልጽ አይደለም፡፡ ፈጣሪ ራሱ በዚሁ ‘በቃችሁ’ ይበለን እንጂ እንዳለፉት አቻዎቹ ሁሉ የዘንድሮውን ሰኔም ቢሆን የተቀበልነው በሌላ የመከራ አዙሪት መሆኑ ያበሳጫል፡፡ የሀገራችንን መጻኢ እድል ለማጨለም ቆርጠው የተነሱና አዘውትረው የሚደክሙ ሀይሎች በወሰዱት ሌላ የተቀነባበረ እርምጃ ሰላማችን ተናግቷል፣ ህልውናችን ተፈትኗል፡፡

በመሆኑም ሰኔ 22 ቀን 2012 ዓ.ም ምሽቱ ላይ ከመዲናችን የተሰራጨው አስደንጋጭ ዜና ልብ ሰባሪና ተስፋ ቀባሪ ነበር፡፡ ገላን ኮንዴሚኒየም በተባለው የከተማይቱ መንደር ወጣቱ የኪነ-ጥበብ ባለሙያ ሀጫሉ ሁንዴሳ እስካሁን ድረስ ማንነታቸው በውል ካልታወቀ ወገኖች በተተኮሰ ጥይት ገና በለጋ እድሜው ውድ ህይወቱን ለመነጠቅ ተረኛው ሰለባ ሆኗል፡፡

በርግጥ ይህንን አሰቃቂ የወንጀል ድርጊት ማን እንደፈጸመው ከነምክንያቱ  ፖሊስ ገና በማጣራት ላይ እንደሆነ እንረዳለን፡፡ ያም ሆኖ የነኢንጂኒየር ስመኘው በቀለን አሟሟት ዛሬም ድረስ ቢሆን በቅጡ አናውቀውምና በዚህ ረገድ ያለብን ውሱንነት ተቀርፎ ለተልእኮው የተሰማሩት መርማሪ ፖሊሶቻችንና ሕግ አስከባሪዎቻችን የሀጫሉ ሁንዴሳን ደም አፍስሰውና አርቲስቱን ያለአንዳች ርህራሄ በልተው የተሰወሩትን ነፍሰ-ገዳዮች ማንነት ለይተውና ከኋላቸው የዘረጉት መረብ ቢኖር ይህንኑ በረቀቀ የክትትልና የምርመራ ዘዴ በጣጥሰው ውጤቱን በተፋጠነ ሁኔታ ለፍርድ እንዲያቀርቡልን በጉጉት እንጠብቃለን፡፡

ታዲያ ይህንን የምንለው በስራው ለተጠመዱት አካላት የሁላችንም ድጋፍ እንደሚያስፈልጋቸው ሳንዘነጋ መሆን አለበት፡፡ ያለሕብረተ-ሰቡ ንቁ ተሳትፎና ተባባሪነት በፖሊስ የተናጠል እንቅስቃሴ ብቻ የሚጣራ ወንጀልም ሆነ በአደባባይ ተይዞና በጥፋተኝነት ተፈርዶበት የሚቀጣ ሰው አይኖርምና፡፡

እንዲያም ሆኖ ከወጣቱ የኪነ-ጥበብ ባለሙያ የግፍ ግድያ በስተጀርባ በሀገሪቱ ህልውናም ሆነ በዜጎቿና በማሕበረ-ሰቦቿ ዘመን ተሻጋሪ አብሮነት ላይ ምን አይነት ሴራ በህቡእ ተሸርቦ ወይም ተደግሶ እንደነበር ለመገመት በመካሄድ ላይ ያለውን የወንጀል ምርመራ ውጤት የግድ መጠበቅ የሚያስፈልገን አይመስልም፡፡

የቀብሩ ስነ-ስርአት እስከተፈጸመበት እለት ድረስ ባሉት ተከታዮቹ ቀናት ከሟች ቤተ-ሰቦች ምርጫና ፍላጎት ባፈነገጠ አኳኋን ወደትውልድ ስፍራው በመጓጓዝ ላይ ሳለ የሰለባውን አስከሬን  በሀይል ነጥቆ በአስከፊ ሁኔታ ከማንገላታት አንስቶ ቡራዮ ላይ የኦሮሞ ወጣቶችን ስሜት በመኮርኮር ለአመጽ በማነሳሳትና በሚዲያ ጭምር ታግዞ በስፋት በመቀስቀስ በተጠቂነት ስሜት ወደአደባባይ ወጥተው ጉዳዩ በማይመለከታቸው የሌሎች ብሔር-ብሔረ-ሰቦች አባላት በሆኑ ንጹሃን ወገኖቻቸው ህይወትና ንብረት ላይ ያልታሰበ የበቀል እርምጃ እንዲወስዱና አዲስ አበባን በሚያክል ግዙፍ ከተማ ውስጥ የለየለት ሁከትና የርስበርስ ብጥብጥ እንዲስፋፋ ተሞክሮ የነበረው አደገኛና ኀላፊነት የጎደለው የወሮ-በሎች ኦፐሬሽን የዚህ እኩይ ሴራ አይነተኛ ማሳያ ነው፡፡

ከሰኔ 22 ሌሊት ጀምሮ ባሉት በነዚሁ ቀናት እንደዝዋይ፣ ሻሸመኒ፣ አሳሳ፣ አርሲ-ነገሌና በመሳሰሉት የኦሮምያ ከተሞች ውስጥ በሚዲያ ጥሪ ተቀስቅሰው በጅምላ በወጡ ወራሪዎች እርምጃ በተከታታይ የተፈጸመውን ሰብኣዊ እልቂት፣ የእሳት ቃጠሎ፣ የንብረት ዘረፋና የተቋማት ውድመትማ ቤቱ ይቁጠረው ማለቱ ይሻላል፡

እንደእውነቱ ከሆነ ጽንፍ በረገጡትና ራሳቸውን አደባባይ ላይ አስጥተው በእብሪት ሲደነፉም ሆነ በየደረሱበት ፈር የለቀቁና መርዘኛ የጥላቻ ዲስኩሮቻቸውን ያለገደብ ሲረጩ እንደከረሙ ጠንቅቀን በምናውቃቸው በነዚያ አክራሪ የኦሮሞ ፖለቲከኞች ይመራና ይዘወር እንደነበር በስፋት የሚታመነው ይህ ነውረኛና ሕገወጥ እንቅስቃሴ የመጨረሻ ግቡ ሀገራዊ ትርምስ በመፍጠርና ሕብረ-ብሔራዊነትን ወደጎን አሽቀንጥሮ በመጣል በሥልጣን ላይ ያለውን ፌደራላዊ መንግሥት ለአንድ ብሔር የቆመ በሚመስል ጠባብ ቡድን መዳፍ ስር ጠቅሎ ማስገባት ነበር፡፡

እንግዲህ በሀጫሉ ላይ የደረሰው የሽብር ጥቃትና በህቡእ የተፈጸመበት ዘግናኝ የነፍስ ግድያ ወንጀል ወደተባለው የመጨረሻ ግብ ለመሸጋገር በመረማመጃነት ከማገልገል ባለፈ ያን ያህል ዋና ጉዳያቸው ነበር ለማለት ይቸግራል፡፡ ይልቁንም የሰለባውን አስከሬን “መቅበር ያለብን እዚሁ በመዲናችን አዲስ አበባ ነው” በሚል አጓጉል ሀኬት ጉዞው ተደናቅፎ ወደኋላ በመመለስ አመጽ ባረገዙ ወጣቶች ታጅቦ ወደኦሮምያ ባህል ማእከል እንዲወሰድና የታጠቁ የጃዋር መሀመድ አጃቢዎች የማእከሉን ጥበቃ በሀይል በመጣስ ወደውሥጥ ዘልቀው ለመግባትም ሆነ ለጊዜው በስብሰባ ላይ ከነበሩ የኦሮምያ ክልል ብልጽግና ፓርቲ አመራሮች ጋር ለመፋለም ያካሄዱት ግብግብ ፍንትው አድርጎ የሚያሳየን ቁም-ነገር ቢኖር በሟች የመቀበሪያ ስፍራ የትነት ላይ የመወሰን ሕጋዊ መብት የሌላቸው የነዚህ ሁከት ፈጣሪ ወገኖች አምባጓሮ መላው የኦሮሞ ህዝብ ለታዋቂው የኪነ-ጥበብ ፈርጥ የሚሰጠውን ክብርና የሚያሳየውን አድናቆት ለመበዝበዝና በከፍተኛ ደረጃ ላቀዱት የተደራጀ ወንጀል አፈጻጸም ቀላል ማሳለጫ አድርገው ያለአግባብ ሊጠቀሙበት ከጅምሩ ማሴራቸውን ነው፡፡

እነሆ በርካታ ተዋናዮችን በማካተት የተቀነባበረ መስሎ ከሚታየው ከዚህ የለየለት አገር የማፍረስና እርስበርስ የመጠፋፋት ተውኔት ጀርባ ጉራማይሌ ዜግነት እንዳለው የሚነገርለት ጃዋር መሀመድና ሸሪኩ የሆነው የኦሮሞ ፌደራሊስት ኮንግረስ (ኦ..ፌ.ኮ) ተቀዳሚ ምክትል ሊቀ-መንበር በቀለ ገርባ እጃቸው ሳይኖርበት አልቀረም ተብለው በቁልፍ ተጠርጣሪነት ከነግብረ-አበሮቻቸው መያዛቸው እምብዛም የሚያስገርም አይደለም፡፡

ጃዋርን ከመነሻው የተጠናወተው ክፉ መንፈስ

ራሱን በብዙኃኑ ቄሮዎች መሪነት የሰየመው ጃዋር መሀመድ እንደሌሎች አማጽያን ሁሉ ለውጡን ተንተርሶ ወደአገር ቤት እንደገባ በብርቱ ጉጉት ይጠብቁት ለነበሩ ወጣቶች ብሩህ ተስፋ የሰነቀ መስሎ ታይቷል፡፡ በማር የተሸፈኑት የጥላቻ ቅስቀሳዎቹ ብዙዎች በሀዋርያነት እንዲቀበሉትና እርሱ ያዘዛቸውን ሁሉ ያለማመንታት ለመፈጸም ሲሉ ህይወታቸውን ሳይቀር እንዲገብሩ አነሳስቷቸዋል፡፡ ሆኖም በሰላማዊ ሰዎች ላይ ድንጋይ በመወርወር፣ የተሳለ ሜንጫና ገጀራ በመሰንዘር፣ ዘረፋ በመፈጸም፣ ቤት/ንብረት በማውደምም ሆነ አውራ ጎዳናዎችንና አደባባዮችን በመዝጋት በተጎጂዎች በኩል ከሚደርስባቸው የመልሶ ማጥቃት ምትና አልፏልፎም ከሚያጋጥማቸው የሞት አደጋ ውጭ ያተረፈላቸው አንዳች በረከት አልነበረም፡፡ ባልሆነ ፕሮፓጋንዳ እየተታለሉ በነፍጠኛ ስም በንጹሃን ወንድምና እህቶቻቸው ላይ በጅምላ የሚፈጽሙት የደመ-ነፍስ ጥቃት በነርሱም ላይ የማያልቅ የመከራ ውርጅብኝ ሲያወርድባቸው ታዝበናል፡፡

ለነገሩ ጃዋር መሀመድ የባለራእይ ጀግና ያህል በሰፊው ሲመለክና ሲሰገድለት የምናየውና የምንሰማው ግንባር-ቀደም ተከታዮቹ በሆኑት የኦሮሞ አማጽያን ብቻ ነው ለማለት ያዳግታል፡፡ ልደቱ አያሌው በዚያ ሰሞን ይህንን የአካይስት አለቃ አብዝቶ በአደባባይ ያንቆለጳጰሰ መስሎት “ለኔ እኮ ከኢሳይያስ አፈዎርቂ ይልቅ ጃዋር መሀመድ ይሻለኛል” በማለት ኦሮምያ ሚዲያ ኔትዎርክ (ኦ.ም.ን) ላይ ቀርቦ ተረግርጎልን ነበር፡፡ ሰውየው የሚጥመውን የሚያውቀው ራሱ ባለቤቱ ነውና ምርጫውን ልናከብርለት ይገባ ይሆናል፡፡

‘ግራዝማች ግሪሳ’፣ (እኔ ሳልሆን ታየ ደንድኣ ያወጡለት መጠሪያ ነው) የዛሬውን አያድርገውና ለኦሮምያ ክልል ቱባ ባለስልጣናትና ከፍተኛ የጸጥታ አመራሮች ሳይቀር ቢያንስ እስካለፈው ጥቅምት ወር 2012 ዓ.ም ሁለተኛ ሳምንት ድረስ አብዝተው የሚወዱትና ‘ሰበብ ፈልገው የሚያሞካሹት ወንድማቸው’፣ እንዲያውም በአንዳንዶቹ የቁልምጫ አጠራር ‘የአይን ብሌናቸው’ ጭምር ነበር፡፡ አገር ሁሉ ‘መፍቀሬ-ጃዋር’ የሆነች በሚመስል አሳሳች አቀራረብ ይህ መናጢ ግለሰብ ከስደት ወደአገር ቤት የገባ ሰሞን ወደአማራ ክልል ሳይቀር ጎራ በማለት አሸብራቂ ጃኖ እንዲጎናጸፍ ተፈቅዶለት በከፍተኛ አጀብ እየተጎማለለ አሹፎብንና አላግጦብን እንደተመለሰ የምንዘነጋው አይደለም፡፡

ውድ ወገኖቼ

መሳሳት በርግጥ ለሰው ልጆች ያልተፈቀደ ዝንፈት አይደለም፡፡ የሆነ ጊዜ በሆነ ምክንያት ድንገት አዳልጦንም ቢሆን ተንሸራተን ልንወድቅና ልንጎዳ እንችል ይሆናል፡፡ ቁምነገሩ በማወቅም ሆነ ባለማወቅ ትላንት ከፈጸምነው ስህተት ዛሬ ላይ ወደአእምሯችን መለስ ብለን ለመማርና ከወደቅንበት በመነሳት ነገን ለማሳመር ያለን ዝግጁነት መሆን አለበት፡፡

“አገር ሲያረጅ ጃርት ያፈራል” እንዲሉ የጃዋር ወንጀል ማለቂያ የለውም፡፡ ለሐገሪቱ የግዛት አንድነትና ዘላቂ ሕብረ-ብሔራዊነት ግድ ሳይሰጠው “በጉልበትም ቢሆን ተገንጠሉ” ሲል ለተቃውሞ ሰልፍ የወጡትን ደመ-ሞቃቶቹን የሲዳማ እጀቶዎች በአደባባይ ቀስቅሷል፣ ሐይል ለተቀላቀለበት አመጽ አነሳስቷል፡፡ ይኸው ሰበብ ሆኖም በሀምሌ ወር 2011 ዓ.ም በአዋሳና በሌሎች የቀድሞው የሲዳማ ዞን ከተሞችና የገጠር አካባቢዎች ይኖሩ በነበሩ በርካታ የሌሎች ብሔር-ብሔረ-ሰቦች ተወላጆች ህይወትና ንብረት ላይ የደረሰውን ጥፋትና ውድመት የምናስታውሰው በከፍተኛ ሀዘንና ቁጭት ነው፡፡

ያ የጃዋር አደገኛ የአመጽ ጥሪ በኢ.ፌ.ደ.ሪ የወንጀል ሕግ አንቀጽ 241 መሰረት የሀገሪቱን የፖለቲካና የግዛት አንድነት በመንካት የሚያስጠይቅና የሚያስቀጣ ከባድ የወንጀል አድራጎት እንደሆነ ገልጾ ይህ ጸሀፊ አፋጣኝ እርምጃ ይወስድ ዘንድ መንግሥትን በወቅቱ እስከማሳሰብ ደርሶ እንደነበር አይዘነጋውም፡፡

ዛሬም ልድገመውና ተጠቃሹ የወንጀል ሕግ አንቀጽ 241ድንጋጌ እንደሚከተለው ይነበባል፡-

 

“ማንም ሰው በሀይል ወይም በሌላ በማናቸውም ሕገ-መንግሥቱን በሚጻረር መንገድ በቀጥታ ወይም በእጅአዙር የሀገሪቱ ህዝቦች አንድነት እንዲፈርስ ወይም ፌደሬሽኑ እንዲከፋፈል ወይም ከፌደሬሽኑ ግዛት ወይም ህዝብ ከፊሉ እንዲገነጠል የሚያደርግ ተግባር የፈጸመ እንደሆነ ከ10 (አስር) ዓመት እስከ25 (ሃያ አምስት) ዓመት ለመድረስ በሚችል ጽኑእ እስራት ወይም ነገሩ ከባድ በሆነ ጊዜ በእድሜ-ልክ እስራት ወይም በሞት ይቀጣል”፡፡

“የወጋ ቢረሳ የተወጋ አይረሳም”ና እስከቅርብ ጊዜ ድረስ እንደልቡ ይሆን ዘንድ በመንግሥት አካላት ሳይቀር የተፈቀደለት መስሎ ይታይ የነበረው ይህ ጽንፈኛ ግለሰብ ጥቅምት 11 ቀን 2012 ሌሊት፣ (ለ12 አጥቢያ)፣ የሆነውንም እኮ ፈጽሞ ልንዘነጋው አይቻለንም፡፡ አዲስ አበባ ውስጥ በግል መኖሪያ ቤቱ መሽጎ “ከነአጃቢዎቼ ተከብቤያለሁና ድረሱልኝ” ሲል ባስተላለፈው ሀሰተኛ የፌስ ቡክ ጥሪው ሳቢያ እንዳሻው የሚዘውራቸውን እነዚያኑ የኦሮሞ ወጣቶች እንደልማዱ ለአስከፊ አመጽ አነሳስቶ ባስከተለው ሁከትና ትርምስ ከኛ ከኢትዮጵያውያን  አልፎ መላውን የአለም ሕብረተ-ሰብ ክፉኛ ባሳዘነ ሁኔታ ከ85 ለማያንሱ ንጹሃን ወገኖቻችን ያልታሰበ ህልፈተ-ህይወት ምክንያት ሆኗል፡፡

ይልቁንም ሰሞኑን ይህ አሃዝ የሀጫሉ ሁንዴሳን ግድያ ተከትሎ ወደ97 እንዳሻቀበ ተሰምቷል፡፡ በርግጥ ትክክለኛውን ቁጥር የሚያውቁት ለነገሩ ቅርበት ያላቸው አካላት ናቸውና ምናልባት ዘግይቶ የተነገረውን ቁጥር ማመኑ ሳይበጅ አይቀርም፡፡

ከጃዋር በስተጀርባ

የሀገሪቱ ሕግ እንደማይፈቅድለት ቢያውቅም ቅሉ ጥንድ ዜግነቱን ያለአግባብ እየተጠቀመ ከአንዱ ስርቻ ወደሌላው በመሽሎክሎክና የደለበ ሀብቱን መንጠላጠያ በማድረግ በተደራጀ መንገድ ከሚፈጸሙ ድንበር-ዘለል ወንጀሎች ጋር ጥብቅ ትስስር እንዳለው የሚነገርለት ይህ የሚዲያ ታይኩን፣ (ጃዋር መሀመድን ማለቴ ነው)፣ ፈርጀ-ብዙ በሆነው እንቅስቃሴው ብቻውን እንዳልሆነ ለመረዳት ያን ያህል ምስጢረ-ስላሴ ሊሆንብን አይችልም፡፡ ስለሆነም የጠቅላይ ሚኒስትር ዶ/ር አቢይ አህመድ አስተዳደር እስካሁን አለቅጥ አብዝቶ ባሳየው መንግሥታዊ ዳተኝነት የተጎዱ ዜጎቹን በወጉ ሊክስና በሀገሪቱ ውስጥ የሕግ የበላይነትን በአስተማማኝ ሁኔታ ሊያረጋግጥ የሚችለው በተለይ ጃዋር መሀመድንና የክፋት ሸሪኩን በቀለ ገርባን ማንም ተራ ሰው በቀላሉ ከሚመለከተው ከፊት ለፊታቸው ብቻ ሳይሆን ከጀርባቸው በኩል ዘልቆ በስፋት ከመረመረና እስከመቀሌ ብቻ ሳይሆን እስከካይሮና እስከሚኖሶታ ድረስ በስውር የተዘረጋውን ውስብስብ የወንጀል መረባቸውን በሚገባ አጣርቶ ከደረሰበትና ከበጣጠሰው -ነው፡፡

ምላሰ-ረዥሙ ግሪሳ ከሁሉም የበለጠ ከአራት ኪሎው የዳግማዊ ምኒልክ ቤተ-መንግሥት ከሁለት ዓመታት በፊት ሳያስበው በህዝብ አመጽ ተባሮ ወደመቀሌ ከኮበለለውና በዚያ መሽጎ ሱባኤ ከተቀመጠው ወራዳው የደደቢት ጭፍራ ጋር ያልተቀደሰ ጉድኝት በመመስረት እጅና ጓንት ሆኖ ሲንቀሳቀስ እንደቆየ ከማንም የተሰወረ ነገር አልነበረም፣ አይደለምም፡፡ ለኦሮሞ ነጻነት ‘ከኔ በላይ ላሳር’ ሲል በየደረሰበት የጥላቻ መርዙን የሚረጨው ይህ ግብዝ ግለሰብ መሰረቴ ነው በሚለው በትግራይ ህዝብ ስም እየማለና እየተገዘተ በሀገሪቱ ውስጥ የማእከላዊ መንግሥቱን በትረ-ሥልጣን በሀይል ተቆጣጥሮ በቆየባቸው የሰላሳ ፈሬ ዓመታት እንደሌሎች ሰለባዎች ሁሉ የኦሮሞ ጎልማሶችን የዘር ፍሬ በጭካኔ ሲያኮላሽ ከኖረው ጎጠኛ ቡድን ጋር በሀፍረተቢስነት ሲሞዳሞድ አላማው ሌላ ሳይሆን በርሱና በጌቶቹ ፍረጃ የነፍጠኛውን አከርካሪ በተጣመረ ክንድ መስበርና ማንኮታኮት ነው፡፡

የአንድ ጀንበር መዘዝ ያለዘጠኝ ወር አይመዘዝ

በመሰረቱ ጃዋርና በቀለ፣ ህዝቅኤልና ጸጋዬ፣ አሉላና ብርሀነ-መስቀል… እርስበርስ እየተቀባበሉ በሀሰት እንደሚሰብኩት በኢትዮጵያውያንና በኢትዮጵያውያት መካከል የጠራ ዘር ፈልጎ ማግኘት ግመልን በመርፌ ቀዳዳ ለማሳለፍ የመሞከር ያህል ከባድ ነው፡፡ በጠላቶቻችን የተጣመመ እሳቤና የተንጋደደ ትርክት መሰረት ኢትዮጵያ እየተባለች በምትጠራው ሁሉን አቃፊ ምድር ንጹህ ኦሮሞ፣ ንጹህ አማራም ሆነ ንጹህ ትግሬ ወይም ወላይታ… ለራሱ ብቻ ተለይቶ ከተሰጠውና እርሱ ብቻ ተቆራኝቶ ከሚኖርበት የመሬት ክፍል ጋር ፈልገን ልናገኝ ከቶ አይቻለንም፡፡ እነርሱም ቢሆኑ ይህ ይጠፋቸዋል ተብሎ አይታመንም፡፡

በአንዲት ሉአላዊት አገር ውስጥ ወጥነት ካለው ህዝብ ይልቅ ተሰበጣጥሮ የሚታይ የተለያዩ ማሕበረ-ሰቦች ዴሞግራፊያዊ አወቃቀር የሚኖረው ቀለም ለእይታ እንኳ ይማርካል፡፡ ጠላቶቻችን ግን በቡድን ደረጃ ሊገለጹ የሚችሉ ተፈጥሯዊ ልዩነቶችን ጠብቆና እርስበርስ ተከባብሮ በሚያስደምምም ጥንካሬ እንደአንድ ህዝብ ተዋዶና ‘ጭቃና ጨፈቃ’ ሆኖ መኖር ወንጀል የሆነ ይመስል ጠዋት ማታ በአሃዳዊነት ሊከሱንና ሊያጠለሹን ሲደክሙ እንታዘባቸዋለን፡፡ እነርሱን ደስ አይበላቸውና እነሆ መላ ኢትዮጵያውያን ዳር እስከዳር ቅይጦችና በደም ሳይቀር የተሳሰርን የአንዲት እናት ልጆች ነን፡፡

ይሁን እንጂ “አውቆ የተኛን ቢቀሰቅሱት አይሰማም” ነውና እነዚህ ወገኖች ቀድሞ ነገር በግንባር-ቀደምትነት የቆሙለት አላማ ለህዝባዊ ወያኔ ሀርነት ትግራይ (ህ.ወ.ሀ.ት) በታማኝ አሽከርነት አድረው በዚህ ጠባብ ቡድን ፊታውራሪነት ሕብረ-ብሔራዊቷን ምድር በጎሳና በሀይማኖት ከፋፍሎ ለዘመናት ተሳስበንና ተደጋግፈን የኖርነውን ዜጎቿን እርስበርስ በማባላትና ሀገሪቱን ጨርሶ በማፈራረስ እስከወዲያኛው ከአለም ካርታ መሰረዝ በመሆኑ አፋጣኝ እርማት የሚያስፈልገውን የብሄር ፌደራሊዝም በመንደርደሪያነት ተጠቅመው ከናካቴው ሊያጠፉን አለን በሚሉት አቅም ሁሉ መረባረባቸው የማይጠበቅ አልነበረም፡፡

እነሆ “አሃዳውያን በግድ ጨፍልቀው ኢትዮጵያ ሳይሉን በፊት ለየብቻችን የነበርን ብሔር-ብሄረ-ሰቦችና ህዝቦች ነንና የየራሳችንን ትናንሽ ክልሎች ፈጥረን በየጎበዝ አለቆቻችን ምሪትና ዘዋሪነት የመተዳደር መብት አለን” ሲሉ ማንነታቸውን በሀሰተኛ የዴሞክራሲ ጭንብል ሸፍነው ይነሳሱብን ዘንድ በማእከላዊ ይዘቱ እምብዛም ከህ.ወ.ሀ.ት የፖለቲካ ፕሮግራም የማይለየው የሀገሪቱ ሕገ-መንግሥት ሳይቀር በተዘዋዋሪ መንገድ እንደፈቀደላቸው መዘንጋት የለብንም፡፡ በአሁኑ ወቅት እንደሚስተዋለው እርስበርስ መጠቃቃትን በቀጥታ ባያበረታታ እንኳ የአብዮታዊ ዴሞክራሲ ጠቢባን እስከጫፍ ድረስ ዘልቀው አለቅጥ የተጠበቡበት አይነኬ-መሳዩ የኢ.ፌ.ደ.ሪ ሕገ-መንግሥት ገና ከጅምሩ የተሰናዳው ከአንድነታችን ይልቅ በልዩነታችን ላይ አተኩረን ያለእረፍት እንነታረክ ዘንድ እንዲገፋፋን ተደርጎ ነው፡፡

ስለሆነም እንደዚህ ጸሀፊ የጸና እምነት ከሆነ የዛሬዎቹ ባላንጣዎቻችን ሕ.ወ.ሀ.ትና ኦ.ነ.ግ/ሸኔ ልብ ገዝተውና ወደአእምሯቸው ተመልሰው የበሉበትን ወጭት በመስበር ያለአግባብ የሰበቁትን ጦር ቢስቡ ወይም ይህንን ማድረጉ ተስኗቸው በመንግሥት ቁርጠኝነትና በብዙኃኑ የተባበረ ክንድ ተደቁሰው ከምድረ-ገጽ ቢጠፉ ወይም ቢወገዱ እንኳ በኀገሪቱ የበላይ ሕግነት የሚያገለግለው ይህ ህዝብ ከፋፋይና ብሔር-ፈልፋይ አውራ ሰነድ በመላ ኢትዮጵያውያን የጋራ ፍላጎትና ውሳኔ በስፋትና በጥልቀት ተመክሮበት ካልተሻሻለ ወይም ካልተለወጠ በስተቀር መጻኢው እድላችን ምን ጊዜም ቢሆን እነርሱን ለመሳሰሉ ሌሎች አገር አፍራሽ ሀይሎች እንደተጋለጠ መቀጠሉ ከወዲሁ ተገማች ነው፡፡

ጭራሽ ቂልነት ካልሆነ በስተቀር በምድረ-ኤርትራ ሰንኣፌ ላይ በበረኸኞቹ ሴራ ተጠንስሶ፣ በድብቅ ተረቆና አዲስ አበባ ላይ ለተጠራው የኢ.ህ.አ.ዴ.ግ ካድሬዎች ጉባኤ ቀርቦ እንደተመከረበትና እንደጸደቀ ተቆጥሮ ከፍላጎታችን ውጭ የተጫነብን ሕገ-ማደሪያ መቀበሪያችን እስኪሆን ድረስ መፍቀድ ያለብን መስሎ አይሰማኝም፡፡

በተለይ የዚህችን አገር ለምለም ሳር ያለአንዳች ተሻሚ እየጋጠና ትኩስ ወተቷን እየጨለጠ ለአካለ-መጠን የደረሰው ከሀዲው የወያኔዎች ስብስብ መቀሌ ላይ ሆኖ ‘የፌደራሊስት ሀይሎች’ እያለ የሚያንቆለጳጵሳቸው አገልጋዮቹ ማእከላዊውን መንግሥት በጉልበት ፈንቅለው እንዲጥሉ ቀጭን ትእዛዝ አስተላልፏል፡፡ ይህንንም ሕገ-መንግሥቱ ሳይቀር እንደሚፈቅድለት ሀፍረተቢሱ የደደቢት ቡድን ጨምሮ ሲቀባጥር በአንክሮ አድምጠነዋል፡፡

ህ.ወ.ሀ.ት በርግጥ ከዚህም በላይ ገና ብዙ ሊለፍፍና የመጨረሻ እስትንፋሱ እስኪቋረጥ ድረስ ያዙኝ-ልቀቁኝ በማለት የሞት ሞቱን ሊወራጭ ይችላል፡፡ ሆኖም ትላንት ዛሬ አይደለምና ለዚህ ቡድን አታካች ቱሪናፋም ሆነ ለውስጥና ለባህር ማዶ ተባባሪዎቹ ዱለታ በቀላሉ ሳንምበረከክ ልዩነቶቻችንን አሸንፈን እጅ ለእጅ በመያያዝ የጋራ ቤታችን የሆነችውን ውድ አገራችን ኢትዮጵያን ከተደቀነባት መከራ የመታደግና ለልጆቻችን የማስተላለፍ ኀላፊነት አለብን፡፡

እኛስ ብንሆን ያገኘናት በዚሁ መልክም አይደል?

አበቃሁ፡

—-

1 Comment

  1. Ato maratsiyon
    I read your opinion which is equivalent to court of law verdiction on Johar Mohammed. Such opinion never anticipated from a lawyer like you. Your opinion is imanated from the usual disrespect and hate of Oromo. Such a percieved and braised opinion toward Oromo and oromo eliet never serve for healing the polarized community. Therefore you and the like Amhara eliets to change their set of mind have and accept the reality on theground.

ሀሃሳብ እና አስተያትዎን ይስጡ

Your email address will not be published.