የቅዱስ ሲኖዶስ ርክበ ካህናት ምልዓተ ጉባኤ መደበኛ ስብሰባ መግለጫ

ቅዱስ ሲኖዶስ፣ የ2012 ርክበ ካህናት ምልዓተ ጉባኤ መደበኛ ስብሰባውን ማጠናቀቁን፣ ርእሰ መንበሩ ብፁዕ ወቅዱስ ፓትርያርክ አቡነ ማትያስ፣ ዛሬ ኀሙስ ግንቦት 6 ቀን ረፋድ፣ በንባብ ባሰሙት ባለስድስት ነጥቦች መግለጫ አስታውቀዋል፡፡

mathias

የመግለጫው ዐበይት ነጥቦች፡-

  • በኮረና ቫይረስ/ኮቪድ-19 ወረርሺኝ የተጠቁትን ምሕረት እንዲሰጥልን እስከ አኹን በቫይረሱ ያልተጠቁትንም እንዲጠብቅልን ተማኅፅኖውን ለእግዚአብሔር አቅርቧል፤
  • ምእመናን ከቤተ ክርስቲስቲያን ተለይተው መኖር ስለማይችሉ፣ የሚሰጠው መንፈሳዊ አገልግሎት፥ በየአጥቢያው በተመደቡ የሰንበት ት/ቤት ወጣቶች አስተናጋጅነት ጥንቃቄ በተሞላበት መንገድ እንዲከናወን ጉባኤው አዟል፤
  • ለወደፊቱም፣ ካህናትም ኾኑ ምእመናን፣ ወደ እግዚአብሔር የሚያደርጉትን ጸሎት፣ በቤተ ክርስቲያንም ኾነ በቤታቸው አጠናክረው እንዲቀጥሉ ጉባኤው አበክሮ አሳስቧል፤
  • ያለውን ለሌለው በማካፈል ደግነታችን ይበልጥ ጎልቶ እንዲታይ የሚያስፈልግበት ወቅት ላይ የምንገኝ በመኾኑ፣ ኹላችንም ባለን ነገር ኹሉ በመረዳዳት ይህን ፈታኝ ጊዜ እንድናልፈው የቅዱስ ሲኖዶስ ምልዓተ ጉባኤ ጥሪውን አቅርቧል፤
  • በፖሊቲካ ድርጅቶች መካከል እየታየ ያለው አለመግባባት እና የቃላት መወራወር በአጭሩ፣ ተጨማሪ አገራዊ ቀውስ ከማስከተሉ በፊት በአጭሩ ተገትቶ፣ ለአገራዊ ሰላም እና ለሕዝባዊ አንድነቱ በጋራ እንዲቆሙ ቅዱስ ሲኖዶስ ጥሪውን አቅርቧል፤
  • የሕዳሴ ግድባችን፣ አብዛኛው የግድቡ ሥራው እየተጠናቀቀና ወደ ፍጻሜውም እየደረሰ መኾኑ ስለተገለጸ፣ የግድቡን ፍጻሜ ለማየት፣ እንደ አባቶቻችን ለትውልድ የሚተርፍ ታሪክ ለመሥራት፣ ሕዝባዊ አንድነቱ እና ተሳትፎው እንዲቀጥል ቅዱስ ሲኖዶስ አሳስቧል፡፡

‡‡‡‡‡‡‡

በስመ አብ ወወልድ ወመንፈስ ቅዱስ አሐዱ አምላክ፤ አሜን፡፡

በፍትሕ መንፈሳዊ አቀንቀጽ 5 ተራ ቁጥር 164 ድንጋጌ መሠረት፣ ከግንቦት 4 እስከ ግንቦት 6 ቀን 2012 ዓ.ም. ድረስ የተካሔደውን የቅዱስ ሲኖዶስ ምልዓተ ጉባኤ አስመልክቶ ከቅዱስ ሲኖዶስ የተሰጠ መግለጫ

  1. በዓለማችንና በአገራችን ኢትዮጵያ ጭምር ከቅርብ ወራት ወዲህ የተከሠተው የኮረና ቫይረስ/ኮቪድ-19/ ወረርሺኝ እስከ አኹን በብዙ ሚሊዮን የሚቆጠሩ ሰዎችን በመያዙ እና ከመቶ ሺሕዎች ላላነሱ ሰዎች ሕይወት መጥፋት ምክንያተ በመኾኑ የቅዱስ ሲኖዶስ ምልዓተ ጉባኤን በእጅጉ ያሳዘነ ሲኾን፣ ጉባኤው፣ በቫይረሱ የተጠቁትን ምሕረት እንዲሰጥልን እስከ አኹን በቫይረሱ ያልተጠቁትንም እንዲጠብቅልን ተማኅፅኖውን ለእግዚአብሔር አቅርቧል፡፡
  2. ይኸው ተላላፊ እና የሰው ልጆችን በሞት እየነጠቀ ያለውን ቫይረስ፣ እግዚአብሔር አምላክ በምሕረቱ እንዲያጠፋልን፣ ምእመናን፣ እንደ አንድ ልብ መካሪ እና እንደ አንድ ቃል ተናጋሪ በመኾን እንዲጸልዩ፤ ተይዞ የነበረውን የሱባኤ ጊዜ በአግባቡ መከናወኑን ጉባኤው ተገንዝቦ ለወደፊቱም ካህናትም ኾኑ ምእመናን ወደ እግዚአብሔር የሚያደርጉትን ጸሎት በቤተ ክርስቲያንም ኾነ በቤታቸው አጠናክረው እንዲቀጥሉ ጉባኤው አበክሮ አሳስቧል፡፡
  3. በዚኹ ወረርሺኝ መከሠት ምክንያት፣ በየአጥቢያ አብያተ ክርስቲያናቱ የሚሰጠው መንፈሳዊ አገልግሎት መቋረጡ፣ በምእመናን ሕይወት ላይ ችግር እየፈጠረ መኾኑና ምእመናን ከቤተ ክርስቲያን ተለይተው መኖር ስለማይችሉ፤ በቀጣይም፣ የሕዝብ ጤና መጠበቅ በሚያረጋግጥ መልኩ፥ የሚመለከታቸው የሃይማኖት አባቶች እና የጤና ባለሞያዎች በሚሰጡት ሞያዊ ምክር እና መንግሥትም በሚሰጠው መመሪያ መሠረት አኹንም የአካላዊ ርቀት እና ንጽሕና አጠባበቅ ከምንጊዜውም በላይ ትኩረት ተሰጥቶት፣ ለዚኹ ተግባር በየአጥቢያ አብያተ ክርስቲያናቱ በተመደቡ የሰንበት ት/ቤት ወጣቶች አስተናጋጅነት ጥንቃቄ በተሞላበት መንገድ እንዲከናወን፤
  4. አገራችን ኢትዮጵያ አገረ እግዚአብሔር፣ ሕዝቧም ሕዝበ እግዚአብሔር እየተባለ እንደሚጠራ ይታወቃል፡፡ መጠራትም ብቻ ሳይኾን፣ ሕዝባችን በፈሪሃ እግዚአብሔር ተከባብሮ እንኳን የራሱ የኾነውን ወገኑን ቀርቶ ሌላውን እንደራሱ አድርጎ የሚወድ፣ ያለው ከሌለው ጋራ የሚካፈል እና በደግነቱ የሚታወቅ ሕዝብ መኾኑን ዓለም የሚመሰክረው ነው፡፡

በመኾኑም፣ ይህ የደግነት ምሳሌነታችን በተለይም በዚህ የኮረና ቫይረስ ወረርሺኝ በጸናበትና ኹሉም ወገን የችግሩ ተጋላጭ ኾኖ በተገኘበት በአኹኑ ጊዜ፣ ያለውን ለሌለው በማካፈል ይበልጥ ደግነታችን ጎልቶ እንዲታይ የሚያስፈልግበት ወቅት ላይ እንደምንገኝ የተገነዘበው የቅዱስ ሲኖዶስ ምልዓተ ጉባኤ፣ ኹላችንም ባለን ነገር ኹሉ በመረዳዳት ይህን ፈታኝ ጊዜ እንድናልፈው ጥሪን ያቀርባል፡፡

5. ከዚኽም ጋራ ዜጋው እንደ ሀገር በኹለት እግሩ ቁሞ፣ ህልውናው ተጠብቆ ሊኖር የሚችለው እና አገራዊ ልማትም ኾነ ሕዝባዊ ዕድገት ሊመጣ የሚችለው በኹሉም ዘንድ ሰላም እና አንድነት መግባባትም ጭምር ሲኖር እንደኾነ ይታወቃል፡፡

ኾኖም በአሁኑ ጊዜ በአገራችን በፖሊቲካ ድርጅቶች መካከል እየታየ ያለው አለመግባባት እና የቃላት መወራወር በአጭሩ ካልተገታ እና ወደ መግባባት በመምጣት መፍትሔ ካልተበጀለት፣ ተጨማሪ አገራዊ ቀውስ ሊያስከትል፣ ከፍተኛም ዋጋ ሊያስከፍል እንደሚችል በመገንዘብ፣ የሚመለከታችኹ የፖሊቲካ ድርጅቶች ኹሉ፣ ለአገራዊ ሰላም እና ለሕዝባዊ አንድነቱ በጋራ እንድትቆሙ ቅዱስ ሲኖዶስ ጥሪውን ያቀርባል፡፡

6. አገራችን ኢትዮጵያን ለከፍተኛ ዕድገት ያበቃል፣ ሕዝባችንን ከድህነት አረንቋ ያወጣል፤ በሚል እምነት ክጅም ጊዜ አንሥቶ ሕዝባችን ትኩረት ሰጥቶ ምንም ሳይኖረው፣ ጦሙን እያደረ አስተዋፅኦ በማድረግ እዚኽ ደረጃ ላይ ያደረሰው የሕዳሴ ግድባችን፣ አብዛኛው የግድቡ ሥራው እየተጠናቀቀና ወደ ፍጻሜውም እየደረሰ መኾኑ ስለተገለጸ፣ ጉባኤው፣ በከፍተኛ አድናቆት ተመልክቶታል፡፡ በቀጣይም፣ የግድቡን ፍጻሜ ለማየት፣ የመላውን ሕዝባችን ርብርብ እንደሚጠይቅ ግንዛቤ የተወሰደ በመኾኑ፣ እንደ አባቶቻችን ለትውልድ የሚተርፍ ታሪክ ለመሥራት፣ ሕዝባዊ አንድነቱ እና ተሳትፎው እንዲቀጥል ቅዱስ ሲኖዶስ ያሳስባል፡፡

በመጨረሻም፣ ከግንቦት 4 እስከ ግንቦት 6 ቀን ለሦስት ቀናት ያኽል፣ በቤተ ክርስቲያናችን መንፈሳዊ እና ማኅበራዊ፣ እንዲሁም አገራዊ ጉዳይ ላይ ሲነጋገር የቆየው የቅዱስ ሲኖዶስ ምልዓተ ጉባኤ ተጠናቅቆ በዛሬው ቀን በጸሎት ተዘግቷል፡፡

እግዚአብሔር ኢትዮጵያን ይባርክ

ወስብሐት ለእግዚአብሔር፤ አሜን፡፡ 

አባ ማትያስ ቀዳማዊ

ፓትርያርክ ርእሰ ሊቃነ ጳጳሳት ዘኢትዮጵያ

ሊቀ ጳጳስ ዘአኵስም ወእጨጌ ዘመንበረ ተክለ ሃይማኖት

ግንቦት 6 ቀን 2012 ዓ.ም.

አዲስ አበባ፤ ኢትዮጵያ

 

2 Comments

  1. የኢትዮጵያ ኦ/ቤን ለምን በተደጋጋሚ ጊዜያት የአስቸኳይ ጊዜ አዋጁንና የሃማይኖት ተቋማት ስምምነትን መጣስ እንደምትቸኩል ግራ ያጋባል፡፡ በፋሲካ ሃሙስና/እሁድን አስመልክተው የሰጡት ቃል ሳይደርቅ ዛሬም ደገሙ፡፡ ለምንስ ለሌሎች የማይሆን መንገድ እንመራለን፡፡ ሌላውም ተነስቶ የዘጋሁትን ማምለኪያ ስፍራ እከፍታለሁ ቢል ያስኬዳልን፡፡
    የመቀሌው ፊት አውራሪ ምርጫ አደርጋለሁ እያለ ያቅራራል፡፡ እኔ የጭፈራ ቤቶችም፣ ካስ ሜዳዎችም፣ ት/ቤቶችም ጥንቃቄ በማድረግ እኛም እንከፍታለን እንዳይሉ እሰጋለሁ፡፡
    ካልተከፈተ እያሉ የሚያነሳሱ ሰዎች አላማቸው ምን እንደሆነ ብነረዳው መልካም ነው፡፡ አገሪቷ በሴራ ፖለቲከኞች የተሞላች መሆኑ ይታወቃልና ለዚ አይነት ድፍረት ከተሞላበት ውሳኔ ብንጠነቀቅ

  2. ከላይ የተሰጠው አስተያያት ትክክል ነው፡፡ሰፋ ባለ መልክ ቢጨመርበትም ያማረ ነው፡፡ በበኩሌም ደግሞ በተራ ቁጥር ሦስትን በተመለከተ “በእየአጥቢያ ቤተክርስቲያናት መንፈሳዊ አገለግሎት መቋረጡ በምዕመናን ሕይዎት ላይ ችግር እየተፈጠረ መሆኑን ና ምዕመናንም ከበተክርስቲያን ተለይተው መኖር ስለማይችሉ የሕዝብ ጤና በመጠበቅ በማረጋገጥ መልኩ በአጥቢያ ቤተ ክርስቲያናት በተመደቡ የሰንበት ተማሪ ወጣቶች አስተናጋጂነት ጥንቃቄ በተሞላበት አገልግሎቱ እንዲካሔ ” በማለት የቅዱስ ሲኖዶስ ርክበ ካህናት መግለጫ ተሰጠ ብለው አንበውታል፡፡ በጣም ያሳዝናል በዓለም ታላላቅ ሀብታም እና ታላላቅ መንግሥታት መቋቋም ያቃታቸውን በሽታ ፤ ለመቋቋም እየታገሉ ያሉት የህዝብን ስብስብ በመግታት መሆኑ እየታወቀ እንዲሁም መንግሥት ይህንኑ ለመቋቋም የማቴሪያል እርዳታ ሌት ተቀን እየለመን፤ ሲኖዶሱ ተቀላቀሉ ብሎ መግለጫ ማውጣት በራሳቸው የተሸከሙት አስኬማ ለበጎ ነውን ወይስ ለሁከት? ለመሆኑስ ምዕመናን ያለ ቤተ ክርስቲያን መኖር ስለማይችሉ የሕይወት ጉዳት የደርሰባቸው ከየት ነው መቸስ ነው? ይህ የወጣው መግለጫ ክርስቲያኑን ከመንግሥት ጋር ያጋጫል መንግስት ይህንን በሺታ ለመቋቋም የጊዜ ገደብ ስጥቶአል፡፡ ቅዱስ ሲኖዱሱ የመንግስትን ህግ እየጣሰ ነው፡፡ ይህን በሺታም በዚች ደካም ሀገር ለማዛመት የተጠነሰሰ ተግባር ይመስላል እና ክረስቲያን ወገኖች ቀን እስኪያልፍ ያለፋል እንዲሉ፤ይህንን መጥፎ ጊዜ እግዚአብሔር በጥበቡ እስኪመልሰው ድረስ የመንግስትን ትዕዛዝ እና የጤና በለሞያዎችን በመቀበል በእያለንበት ለፈጣሪ ምሥጋና እናቅርብ በማንኛውም ቦታ ሁነን ከልብ ከለመነው የሰጠናል እንጂ አይነፍገንም፡፡አንድም ሁለትም ሁናችሁ ከለመናችሁ በመሃከላችሁ እገኛለሁ ብሎአልና፡፡ በመሆኑም የመንግስትን ትዕዛዝ እንቀበል፤ የጤና በለሞያዎችን ምክር እንጠብቅ፡፡የሲኖዶሱን መግለጫ ለጊዜው ወደኋላ እንተወው፡፡

ሀሃሳብ እና አስተያትዎን ይስጡ

Your email address will not be published.