ቸነፈር ቸርቻሪው ? – በጋዜጠኛ ተመስገን ደሳለኝ

” ተው ተው ! ከኢትዮጵያዊነት ጋርማ አታያይዘው !! ”

የውዝግቡ ሥረ-ምክንያት ዶ/ር ቴዎድሮስ ” በሽታውን በእንጭጩ እንዳይቀጭ ከቻይና ተመሳጥረው መረጃ አሳክረዋል ” ነው። በዚህም መቶ ሺዎች ተቀጥፈዋል፤ ለህመም ተዳርገዋል ፤ገና ይቀጥላልም ። የቫይረሱ ባህሪ አዲስነትና ተለዋዋጭነት እንደተጠበቀ ፤ ከሳምንታት በኋላ ፣ ዳይሪክተሩ አቃልለው በማቅረባቸው ጢምቢራ ለሚያዞር ወቀሳ አቀባብሏቸዋል።

92997159 2571416739736428 4254924929352335360 nየThe New York Time ጻሓፊ Denise Grady በ23/1/2020 ዓ.ም (እኤአ) ” Coronavirus is Spreading, but W.H.O Says it’s Not a Global Emergency ” በተሰኘ ርዕስ ባስነበበው ዘገባ፣ የW.H.O የቴክኒክ ኮሚቴ “ቫይረሱ ዐለም አቀፍ ወረርሽኝ ነው – አይደለም በሚል ለሁለት መከፈሉን አስታውሶ ፤ ዋና አለቃው “አይደለም ” የሚለውን ቡድን እንደመሩ ገልጿል ። ይህም ለእልቂቱ መባባስ ፣ በሳይንሳዊ ትንታኔ ተደግፎ የሰውየውን ኅጢአት አግዝፎታል ።

እናት ድርጅታቸው ወደ መቀሌ በማባረሩ ረገድ የተባበሩ የአሜሪካ ሴናተሮች ፣ የዶክተሩን ሥልጣን ሲነቀንቁ ፤ ጋዜጠኞች ደግሞ አሳ-ጎርጓሪ ሆነዋል ። ተዋቂዎቹ ሚዲያዎች ከኮሮና የማይተናነስ ‘ከቬሬጅ’ ሰጥተውት አብጠልጥለዋቸዋል ። የኢትዮጵያ ጤና ጥበቃ ሚንስትር በነበሩበት ወቅት የፈፀሟቸው ጥፋቶች (በእርግጥ ‘ስህተት’ ለማለት ይቸግራል ) አደባባይ በማስጣት አዘናብለዋቸዋል ። Peter Hasson በ23/3/2020 “China Helped Put This Man In Charge Of the World Health Organization -Is It Paying Off ? ” በሚል ርዕስ “The National Interest ” ድኅረ-ገጽ ላይ ባቀረበው ዳሰሳ፣ ከቴዎድሮስ አዳህኖም በቀር አንድም የህክምና ዶክተር ያልሆነ ሰው በዐለም ጤና ድርጅት ዳይሪክተርነት ተሾሞ አለማወቁን ጠቅሶ ሲያበቃ ፦ ” የኢትዮጵያ ጤና ጥበቃ ሚንስተር እያሉ ሦስት አይነት የኮሌራ ወረርሽኞችን በመደበቅ ይወነጀላሉ ፤ ” ሲል በእንዲህ አይነቱ ‘ሙያ’ የዳበረ የሥራ-ልምድ እንዳላቸው አስርግጧል ።

ቫይረሱ በቻይና ያደረሰውን የከፋ ጉዳት ለመሸሸግ ስሁት-ትርክት በማስተላለፍ ፣ ችግሩን ዐለም አቀፍ ማድረጋቸውን አግሎቶ ተችቷል ። ቻይና በሽታውን የተቀሰቀሰበትን ውሃን ግዛት እስከዘጋችበት ጊዜ ድረስ ፣ሰባት ሚሊዮን የሚጠጉ ሰዎች ወደ ተለያዩ አገራት መጓዛቸውንና ቫይረሱን ማሰራጨታቸውን የዘገበው ደግሞ ኒዮርክ ታይምስ ነው።

ለ”Fox News ” አስተያየታቸውን የሰጡት የራፖብሊካን አባልና ሴናተር Martha Mcsally “ዶ/ር ቴዎድሮስ ዐለምን አታልሏል ” ወርፈዋቸዋል ። ከተራራ -የገዘፉ ማስረጃዎች እየታዩ ቻይና በሚገባ እንደተቆጣጠረችው አስመስለው ማወደሳቸውንም በማስታወስ ኮንነዋል።
አንድ ጥናት ፣ ወረርሽኙ ከተቀሰቀሰ ሦስት ሳምንት በፊት ይፋ ሆኖ ማስጠንቀቂያ ቢሰጥ ኖሮ እስከ 95 በመቶ ጉዳቱን መቀነስ እንደሚቻል የጠቆመው ላይ ፤ ቻይናውያን አክቲቪስቶች በውሃን ግዛት ኮሮና የፈጃቸው ሰዎች ቁጥር እነ ቴዎድሮስ እንደራገቡት 3300 ሳይሆን 42 ሺ ማለፉን መዘገባቸው ተደምሮ ሥርየት-የለሽ ጥፋተኛ አድርጓቸዋል ።

በእናቱ ስሙ ያልተጠቀሰ ቻይናዊ ሐኪም “kyo-do News ” ለተባለ የጃፓን ሚዲያ ፣ ዶ/ር ቴዎድሮስ ከቻይና መንግስት ጋር ያለው ቁርኝነት ሥር-ሰደድ እንጂ አዲስ አይደለም ማለቱ ፤ ለእኛም አዲስ ባይሆንም ጥቂት ነገሮችን ለመጨማመረ ወደ አገር ቤት እንመለስ ።

ምክንያቱም ፦ ሥልጣን የያዙ ተረኞች በሕዝባቸው ላይ የቱንም ያህል በደል ፈጽመው ፣ ጅምላ ጨፍጭፈው ፣ በገፍ መዝብረው ….ዐለም-አቀፍ መድረክ ‘በአንቀልባ ይቀበለናል ‘ በሚል እንዳይቀናጡ ቀይ መብራት ይሆናቸዋል።በርግጥም የዶክተሩ ኅፀፆች መዘርዘሩ ማን ያውቃል ? ነገ ደግሞ ‘ጌታቸው አሰፋ በተባበሩት መንግስታት ድርጅት የደህንነት አማካሪ ሆኖ ተሾመ ¡ ” ከሚል ዜና ሊታደግ ይችላል ። ጠቅላይ ሚንስትር ዐቢይ አህመድ ፈተናውን ገና አላለፈም ። ነፃ ተቋማትን የማዋለዱ ስትራቴጄዎች ፣ ለትራጄድ ቀርቧል ። ምናልባት ከሽሽግር ይልቅ ፣ በሽግሽግ አሽተውን ሲያበቁ ፤ ( የሴጣን ጆሮ አይስማና ! ) ኖቤሉን ቀብድ አሲይዘው አንቶኒዮ ጉቴሬዝን ለመተካት ቢንደረደሩስ ? ….ለእንዲህ አይነቱ ክብር የሚመጥን ሥራ ዛሬ እንጂ ፣ ነገ አለ-መሆኑን ለማስታወስ የቀደሞ ጤና ጥበቃ ‘ትሩፋቶች’ ን ፋይል ማገላበጡ ‘ የብዳ መድኃኒት ‘ ነው።
ተው ተው ! ከኢትዮጵያዊነት ጋርማ አታያይዘው !! እንዲያማ ቢሆን ፣ ዶ/ር ቴዎድሮስ በሥራ- አስፈፃሚነት የመሩት ኢሕአዴግ ለኮ/ል መንግስቱ ኃይለማርያም ከአዳኝ ስኳድ ይልቅ ፣ አገናኝ ሃውልት ባቆመ ነበር ። እንደ አበበ ቢቂላ በትጋትና ፍጋት የመጡ አታስመስለዋ ?!
በርግጥ የጭፍጨፋ ሚዛን በሰለባ እንጂ ፣ በተራፊ ሳፋ ሆኖ አያውቅም ። “ሊገሉኝ ነው ” ፣ ” በጥቁርነቴ ተሳለቁ ” ..ለቅሷቸውንም እንደማቅለያ ይዘን “እንለፋቸው ” ብንል ፤ “ለአራት ኪሎ መጥፎ ምልኪ ይሆናል ” አይነቱ ንቃቃት መሰንቀሩ አይቀሬ ነው ።
ወደ ጉዳይችን …..

የሕዝባዊ ወያኔ ሓርነት ትግራይ የአመራር አባል ዶ/ር ቴዎድሮስ አድሃኖም ፣የጤና ጥበቃ ሚንስተር ዶ/ር ከበደ ታደሰ ምክትል ተደርገው ረዘም ላለ ጊዜ ከቆዩ በኋላ ፤ በ1997 ዓ.ም ግድም ዋናውን ጨብጠዋል ። በወቅቱ በጎንደር ጎጃም ብዙ ሺዎችን የቀጠፈውን የወባ ወረርሽኝ መደበቅ የሥራ ማሟሺያ ማድረጋቸውን አስታውሳለሁ ። ግንባር ቀደም የመድኃኒት አቅራቢነትም የኢፈርቱ አዲግራት መድኃኒት ፋብራካ የሆነበት አድሏዊነት እዚህ ሠፈረ የተበጀ ነው፤ (አስደንጋጩ ነገር የፋብሪካው ምርት አልተማረም በምትለው አርሶ አድር ጭምር ፣ ፈውስ-የለሽ እየተባለ መተቸቱ ነው ። ከሕንድ ርካሽ መድኃኒቶች እንዲገቡ በማመቻቸትም ገና ያልተጠኑ የጤና መቃወስ በብዙዎች ላይ እንዲከሰት መግፍኤ ይደረጋሉ ። የፓስተር ኢንስቲትዮት ዘመናዊ ላብራቶሪ ግንባታ ፕሮጀክትን በመሳብ ይኮነናሉ ።

ጠበቅ ያለው የፀረ-ኤድስ ዘመቻ በእሳቸው ዘመን በመደብዘዙ ፤ዛሬ እንደ አዲስ ማገርሸቱን ይዘህ የቪኦኤን ዘገባ ተከታተል ፤ 2011 ዓ.ም ነው (በእነሱ) “Africa AIDA Conference Opens in Ethiopia “ርዕስ -ሥር የቀድሞ የአሜሪካ ፕሬዝዳንት ጆርጅ ቡሽ የመሩት “President’s Emergency Plan For AIDS Relief ‘PEPFAR’ ” ኢንሽቲቭ 1.6 ቢሊዮን (ሚሊዮን አይደለም) ዶላር ፣ የዶ/ር ቴዎድሮስ አድሃኖም ቢሮ በድፍን ኢትዮጵያ ኤች.አይ.ቪን ፣ ቲቢና ማላሪያን እንዲከላከል መሰጠቱን ታገኛለ ። መቼም ‘ሳቢውን’ ከቃሙ በኋላ ዘመቻውን ማቋረጣው ከዘር ማጥፋት ባይመደብም ፣ አንዳች ጥርጣሬ አይጫርም አትለኝም ?! (ግዴለም ፣ በ140 ሆስፒታሎች እንዲከፋፈል እንደተሰጠ የሚያትተው የቪኦኤ ዘገባ ጠቅስህ ፣ ኦዲት እንዲደረግ ጠይቀ ፤ ያኔ ” ዘንዶው ካላውጣ ፣ ከምላሴ ፀጉር )
አልጨረስንም ፤

ግዘፍ-የሚነሳው የመድኃኒት አስመጪነት ቢዝነስ በአብዛኛው በአንድ ቋንቋ ተናጋሪዎች እንዲያዝ ኔትወርኩን የዘረጋው ማን ነው ?! ወይስ እየደጋገመ የተመላለሰውን የኮሌራ ወረርሽኝ “አተት” በሚል የብዕር ስም ደብቆ ፣ የብዙሃኑን እልቂት ማንበር ለአቅመ-ወንጀል አልደረሰም ?! የዶክተሮች ፍልሰትም ጣራ የነካው በ” ሲብስቴ ነጋሢ ” ጊዜ አይደለም ፤ (በክልሎች እንጃ እንጂ ፣ በሸገር ያሰሩት አንድ ሆስፒታል ካለ ስለ-አቡነ አረጋይ አድራሻውን ስጡኝ ። )

እንደ ኢሕአዴግ የአመራር አባልነታቸው በውል ከሚጠየቁበት ወንጀሎች ደግሞ ጥቂቱን እንጥቀስ ፦ የ97ቱን ጨምሮ ከአራት ያለነሰ ምርጫ ማጭበርበር ፣ በአያሌ ዜጎች ላይ የሰብዓዊ መብት ጥሰት መፈጸም ፣ ዘር ተኮር ማፈናቀል ፣ በተለያዩ አካባቢ ዘግናኝ የዘር ማጥፋትና መሰል ጉዳዮች መድረሳቸው.. … ግድግዳው ላይ የተቸከቸኩ እውነታወች ናቸው ።

የውጭ ጉዳይ ሚንስተር በነበሩበት ጊዜም የዲያስፖራ ተቃዋሚ አባላትን ከመሰለልና የኢትዮጵያን ኮሚኒቲ ከመከፋፍል በቀር የፈየዱት ካለ ወዲህ በል ? በየኢምባሲዎቹ አቶ ስዩም መስፍን በዘር-ያስተሳሰሩትን ኔትዎርክ አጠናክረው በማስቀጠል የሕውሓትን ” አቃፊነት “ማስረገጣቸውን በትምህርተ -ስላቅ እለፈው ። በአውስትራልያ የምትኖር አንዲት የ14 ዐመት ህፃንም በትምህርት ቤት ውድድር ሃያ ሚሊዮን ዶላር ማሸነፏንና በኢትዮጵያ ትምህርት ቤት ለማሰራት እንደምትፈልግ መቀለዷን አምነው በመቀበል በፕሮፓጋዳ ካጨሱን በኋላ ውሸት መሆኑ ሲጋለጥ ” ህፃናቶች የውሃ ናቸው…” በሚል ለማስተባበል መሞከራቸው ፤ ተስፋዬ ካሳ በየት ዞሮ መጣ ? ያሰኛል ። እንደው በአባ-ጃሌው ! በዚህ ዐውድ ህፃን ማን ነው ?!

ዶ/ር ቴዎድሮስ እንደ አባዱላ ገመዳ ፣ ገዱ አንዳርጋቸው ፣ ኃይለማርያም ደሳለኝ…. ያልተወራረደ ዕዳ አለባቸው ። እንደ ዐባይ ፀሀዬ ፣ አዲሱ ለገሠ ፣ ሽፈራው ሹጉጤ እጃቸው ላይ ደም አለ ። ሆኖም ዐለም ቲያትር ናት እንዲሉ ፤ ከፍርግርጉ ሾልከው የWHO ዳይሪክተርነትን ጠቅልለዋል ። መቼም የታመሙ እናቶች በቃሬዛና በሰው ትከሻ ረዥም መንገድ ሲኳትኑ ከመዋል ያልታደገ ፣ የሕብረተሰብ ጤናን የመጠበቅ ሥራን አጓለማውታ ያደረገ ተቋም መሪን ፣ ” ስኬታማ ” ተብሎ እዚህ መድረሱ ትንግርት ነው ። የምርጫ ቅስቀሳው ከሎጂክ ፣ በሎጅስቲክ መሳለጡን አልዘነጋሁትም ፤ ( የካምቤኑ ዋና መሪ ፣ ከድሉ በኋላ ዋና አማካሪ ዶ/ር ሰናይት ፍስሃ በጤና ጥበቃ መስሪያ ቤት ተጽኗቸው ምንድን ነው ? ጥያቄ ነው ። የተሻረውን ዶ/ር አሚር አማንን “Su-san Thompson Buffect Foundation ” ሲያስቀጥሩ ፤ የተሾሙትን ዶ/ር ሊያ ገ/መድህንን ደግሞ ‘ ፕሮሞት ‘ አድርገዋል ። በሚካኤል ሥዑልኛ ተረዳው ። )

ጎበዝ ! ዜግነት ፣ ጥቁርነት … በሚሉ ግርድፍ ቃላቶች አንሸነጋገላ ! ካርል ቦንዝም ሆነ ካትሪን ሀምሊን ከጎንድርም ከጉደርም አይደሉም ።

በጋዜጠኛ ተመስገን ደሳለኝ

2 Comments

  1. ተመስገን፡ ይህ ጥግ የረገጠ ዘረኝነትን ተወው የትም አያደርሰንም በሬ ወለደ ወሬህን ወደ ጎን ትተህ ጥሩ ጥሩ ሀገርን ህዝብን የሚጠቅም ህዝቡ ከዚህ በሽታ እንዴከላከል ምን ማድረግ አለብኝ ብለህ አስብ ጠቃሚ ገንቢ ሀሳቦችን አፍልቅ፤ ሀሳብህን አጋራ

  2. አምበሳዉ አግኝተኸዋል አገር ቤት እሱና መሰሎቹ አገሩን ምስቅልቅሉን አዉጥተዉ የዘረፉትን ዘርፈዉ የገደሉትን ገድለዉ ሸተት ብለዉ ሲወርዱ ለፍርድ ይቀርባሉ ሲባል እንደዉም እድሜ ለዶ/ር አብይ ሹመት ላይ ሹመት ሁነዉ የዘረፉትን ይዘዉ እያስፈራሩ ነዉ። ታዲያ በነዚህ ወንጀለኞች ድጋፍና ጥልፍልፍ ለዚህ ከፍተኛ ስልጣን የወጣዉ ቴድሮስ አድሃኖም እና ሰየ አብረሀ ያለ ችሎታቸዉ አለም አቀፍ መስሪያ ቤት ፊጥ ብለዉ መከራቸዉን እያዩ ነዉ። የኢትዮጵያ አምላክ ነገሩን እንደ ባቢሎን አወሳሰባቸዉ እንጅ የቴድሮስ አድሃኖም ዋናዉ አላማዉ ወደ ኢትዮጵያ መጥቶ በህወአት አማካይነት ጠ/ሚኒስተር መሆንን ነበር።
    ሰዉየዉ ችሎታ የለዉም ለዚህ ስራ በቃለ መጠይቁ ጊዜ ጥያቄዉ አልገባ ብሎት ይባስ ብሎ አንደኛዉ ተወዳዳሪ ማብራሪያ ሲሰጠዉ ነበር። ይኸዉ ነገሩ ተጋለጠ ትግሬዎችም ከስልጣን ተፈነገሉ በደህና ጊዜ የማያዉቃቸዉን ጥቁር አፍሪካዉያን ጥቁር ስለሆንኩ ነዉ ድረሱልኝ የሚል ቀልድ ይዟል።
    ተዎድሮስ አድሀኖም ሰየ አብረሀ፤ጻድቃን ገ/ተንሳይ፤አርከበ እቁባይ፤ መቀሌ የመሸጉ ትግሬዎችና ስልጣን ላይ ስልጣን ዶ/ር አብይ የሰጣቸዉ አባ ዱላ ገመዳ፤በቆየ ወንጀል የሚፈለገዉ አረጋዊ በርሄ፤በኢዝላሚስት ንቅናቄ በተለያዩ ምእመናንና ቤተክርስቲያን ቃጠሎ ያደረሰዉና በሻሸመኔ አያቶች ያንን አሰቃቂ ትእዛዝ ያስተላለፉት አህመዲን ጀበልና ጁዋር መሀመድ፤አቡበከር መሀመድ፤ጁነዲን ሰዶ፤ እና ተባባሪዎቻቸዉ እንደ ቴዎድሮስ አድህኖም ከሰዉ ቢያመልጡ እግዜር ጠብቆ እጃቸዉን በካቴና እንደሚያስገባ ጥርጥር አይኖረንም።
    ላሁኑ ተመስጌን ደሳለኝ ባርሜጣችንን አንስተን ምስጋናችን እናቀርባለን።

ሀሃሳብ እና አስተያትዎን ይስጡ

Your email address will not be published.